Ads by Google Ads by Google

Silia ma le 10 tagata a’afia galuega i le ASTCA

Ua i ai nisi o le aufaigaluega a le ASTCA po’o le Ofisa o Feso’otaiga a le malo ua maua tusi fa’ailo e malolo mai galuega o i ai. O nisi ua maua tusi fa’ailo e ao ina faia se fa’aiuga pe ua tatau ona vave litaea ae le’i o’o i tausaga e 55 e ono litaea ai. O nisi ua maua tusi e fa’amotusia vave ai konekarate faigaluega ae le’i uma le taimi na saini feagaiga e mae’a ai latou konekarate, peita’i e tasi le auga ua so’ofa’atasi ai nei sui uma, ua silia ma le 30 tausaga o le tautua i le ASTCA, pe ua silla ma le 60 tausaga o le soifua.

 

E oo mai i le aso Lulu, sa tatau ai ona motusia le tautua a nisi e to’alua o tagata sa fa’akonekarate e le o mautinoa le taimi tonu e totogia mai ai la’ua taimi o totoe na fa’akonekarate ai e tusa o le feagaiga e ao ina totogia, ma sa fa’aalia e le sui ua faamalolo, “E tatau e tusa ai ma le maliliega o le Konekarate, peita’i ina ua fa’afeso’ota’i atu le matou Pule o le Ofisa o Tagata faigaluega [HR] ae fa’ailoa mai e le’i i ai se tala mai le pulega e tusa ai o lena mataupu.”

 

O se tasi o i latou, e le o fia fa’ailoa lona suafa mo le lomiga, ua maua le tusi fa’ailo e mafai ona litaea vave, ae toe tolu tausaga atoa le 55 o tausaga o le soifua e agava’a ai mo le litaea, ua ia fa’ailoa mai lana fa’ai’uga ua faia i le tusi fa’ailo, “Ua ou toe fa’afo’ia le tusi lena na ou maua, aua o la’u aia tatau lena ou te fa’ailoa atu ai i le pulega, ou te le fia litaea vave, ou te mana’o ia atoa pea au tausaga fa’ato’a litaea aua e eseese fo’i le aofa’i o le tupe ou te maua i lou litaea sa’o i le taimi fa’atulagaina, ma le litaea vave pe afai la ua ou ma’i ma ua le toe agava’a ai i la’u galuega na fa’afaigaluegaina ai a’u mai le amataga e le faletelefoni.”

 

O nisi o nei sui ua mae’a oo i le Ofisa o le Litaea a le malo ma fesiligia se fesoasoani mai le pulega, ua fa’amanino atili le ituaiga litaea o lo’o ofoina mo tagata faigaluega a le malo ma ua iloa ai, “E ese mai aiaiga o lea lava ituaiga Feagaiga Litaea mai le 401K, o le tinoitupe e agava’a ai le tagata faigaluega e tusa o lona totogi ma le aofai o le tinoitupe ua mae’a fa’auia i lona litaea, ae fa’ato’a mae’a lava le litaea e totogia i le tagala faigaluega, pe a o’o ina maliu. O vaega tupe fo’i mo e sa ia tausia o lona aiga, e tu’uoti fo’i lena vaega tupe mo ta’ito’alua, pe motusia foi tausiga o fanau pe a atoa tausaga e 18 o le fanau laiti.”

 

“Peita’i, o le fa’apea e ao ina talia le litaea ae le’i atoa tausaga e 55, e le mafai ona fa’amalosia e se matagaluega se’i vagana ua ofoina atu ma ni penifiti e ese mai lava i le aofa’i o le tupe e agava’a ai le sui pe atoa tausaga e 55 o le soifua, ina ia fai ai se fuafuaga a le sui  faigaluega.”

 

O i latou na soloa’i mo ni fautuaga mai le Ofisa o Litaea, ua latou toe faia ni filifiliga mo le lumana’i, ma ua alagatatau ai ona latou toe fa’afo’ia tusi sa mauaina. Peita’i o nisi sui ua latou maua tusi e fa’amuta ai le auaunaga, ona ua silia ma le 60 tausaga le matutua, peita’i o tausaga o le tautua i le ASTCA e na’o  le 13 ma ua leai se isi ala, a’o le talia o le tusi fa’ailo ma usita’i.

 

Ua fa’ailoa mai fo’i e se tasi  totino o le Komiti Fa’afoe a le ASTCA, “E le’i faia se fonotaga fa’apitoa a le Komiti Fa’afoe e talanoaina ai se tulaga fa’apea e ono faia i tagata faigaluega, ae maise o i latou ua tele tausaga o le tautua. O le mataupu fo’i ua mae’a fesiligia e lo’u sui i totonu o le Komiti Fa’afoe le ituaiga Litaea lea e maua e tagata faigaluega ma ona aiaiga i aia tatau a tagata o totogi litaea, pe mafai ona litaea ae le’i atoa le 55 tausaga e pei ona tamau i lea feagaiga. Ua tula’i mai e se’i vagana lava ua i ai se tusi fa’amaonia a le foma’i ua le toe agava’a le sui litaea i le galuega o faigaluega ai, ona fa’ato’a mafai lea ona litaea vave ae le’i atoa le 55 tausaga.”

 

O le sui ua maua le tusi e motusia ai lana auaunaga o se tasi sa mau fa’atuatuaina tele i le aoina o tupe maua mai le Pepa Telefoni, lea ua fa’akonekarate ai se Kamupani  ma ona tagata faigaluega e aoina tupe ma tufa atu pepa telefoni i faleoloa i le teritori.

 

O tagata o lo’o faia lea tiute ua le totogia sa’o e le ASTCA, ae ua totogia e le kamupani tuma’oti TechConnect. Peitai, ua fa’afaigaluega fo’i le e ona lea Kamupani e le ASTCA mo le ono masina. O lona uiga o le tagala e ona le pisinisi ua faigaluega i le ASTCA toe fa’atautaia ai ma lana  pisinisi.

 

O ituaiga omioga nei ua mafua ai ona a’afia tele lagona o i latou ua loa tausaga o le tautua, sa tatau ona faia alogia ni fonotaga ma i latou ma feutaga’i lelei, ae o lea ua na’o kiliva mai o le tusi fa’ailo ma le lagona e ao ina usita’ia. O nisi ua suia tofiga e galulue ai, ua aofia ai ma se tasi ua leva ona tautua i le ASTCA. Alex Sene Jr, sa avea fo’i ma CEO. Lea ua tula’i mai e le’i fa’amavae, ae o lo’o malaga i fafo.

 

I tala sa mua’i tusia ma fa’asalalauina, sa iloga ai le naunauta’i o Kovana Lolo Moliga ina ia faia suiga tetele i le fa’atautaiga o le ASTCA, ma ua matauina o le mea lea ua aga atu i ai i lenei vaitausaga. O i latou uma sa tutula’i mai le Kamupani a le Bluesky Communications, lea ua ulufale atu nei i le ASTCA ma amata ona suia atoa le fa’avae o le tautua tau feso’ota’iga sa sau a’i le tatou faletelefoni.

 

I se tala a se tasi ua loa i le ASTCA ua sauni e motusia lana tautua, sa ia fa’apea ai, “O le mea muamua e ao ina silafia, e le o se pisinisi a ni tagata faisiea le ASTCA, o le tautua lautele a le Malo, e ao ina fai ma le alofa i tagata nu’u uma ina ia maua le so’otaga ma aiga i fafo i so’o se taimi, ia gafatia fo’i le totogi e tagata e to’atele o le atunu’u.”

 

O nei tusi uma, ua fa’ailoa mai, e le o sainia e le Komiti Fa’afoe o le ASTCA, lea ua toe to’alima e pei ona suia ai nei e le Kovana Sili i lenei tausaga, ae ua sainia to’atasi e le Chief Executive Officer, o le Taitaifono fo’i lea o le Komiti Fa’afoe, Puleleiite Tufele Liamatua, ae o ia fo’i o le Faipule o le Itumalo o Sua.

 

Ona ua le mafai ona maua le susuga le Faipule mo se fa’amatalaga e tusa o nei suiga tetele i le ASTCA, ua fa’aagaaga ai se avanoa lelei mo sana folasaga e fa’amanino ai lenei mataupu i le lomiga o le aso a taeao.