E silia i le to’a 60 le aofa’i o fanau aoga ua mae’a ona lesitalaina i le polokalame, e a’oa’oina ai aganu’u eseese fa’apea ai tomai ma taleni a le Ofisa o Tu ma Aganu’u a le malo, lea na tatalaina i le taeao o le aso Gafua o le vaiaso lenei.

E 6 vaega eseese ua vaevaeina i ai lenei polokalame, lea fo’i ua mafai ona vaevaeina i ai fanau aoga ua mae’a ona lesitalaina, e aofia ai le a’oa’oina lea o le lalagaina o le fala, ili, ato, taulima, ma isi lava ituaiga galuega lalaga a Samoa, o le a’oina lea o le siva, a’oa’oina o le tusi ata, vaneina o fa’atagata ma mamanu e fa’aaoga ai laupapa ma laau, fa’apea ai le a’oa’oina lea o le faiga o le elei ma le siapo.

O se sauniga lotu puupuu e tatala aloaia ai le polokalame na taitaia e le afioga i le Tiakono ia Sauleone, sosoo ai ma le saunoaga autu mai le afioga i le Fa’atonusili o le Ofisa o Tu ma Aganu’u a Amerika Samoa, tofa Paogofie Fiaigoa, lea na ia fa’afeiloaia ai matua aemaise ai fanau ua mafai ona lesitalaina i le polokalame o lenei tausaga.

“E le i faia fua e le kovana ma le malo lenei polokalame, ae na mafua ona faia ina ia maua ai se avanoa o faiaoga ua i ai le tomai i auala eseese e a’oa’oina ai outou le fanau, e a’oa’o ma fa’ailoa atu isi auala fou e fa’atatau ia Samoa ma lana aganu’u”, o le saunoaga lea a Paogofie.

“Aua la ne’i outou o mai iinei e tafafao ma eva ai, a ia fa’aaoga tatau lenei avanoa ua outou maua e a’oa’oina ai se lesona aoga e te fo’i ma oe i lou aiga”.

Na taua e le Fa’atonu o le Polokalame, susuga Rex Yandall i le Samoa News, le to’atele o isi fanau aoga e le i lesitalaina, ae ua mae’a ona fa’aoo atu e matua o latou suafa e fia auai i le polokalame.

Talu mai le taeao o le aso Gafua na amata aloaia ai le polokalame, e to’a 64 le aofa’i o fanau aoga ua mae’a ona lesitalaina, ma le fa’amoemoe o lo o silia i le to’a 20 ma ona tupu isi fanau aoga o lo o i ai pea le fa’anaunauga e fia auai i le polokalame.

E pei ona silafia e le atunu’u, ua tele tausaga o fa’agasolo mai pea le polokalame lenei a le Ofisa o Tu ma Aganu’u a le malo, e aoaoina ai fanau aoga i gaioiga eseese o le aganu’u a Samoa, e pei ona fa’atupe mai ai e se vaega tupe mai le vaega o le National Endowment of the Arts a le feterale.

E 4 vaiaso le umi o le polokalame ma ua fa’amoemoe o le aso 28 Iulai e fa’amae’a aloaia ai lenei polokalame mo fanau, lea e amata mai i le 7 tausaga e o o atu i le 14 tausaga le matutua o i latou o lo o auai.

O Matua o Faiva o lenei fa’amoemoe e pei ona saunoa Yandall, o ni isi o le atunu’u ua i ai le tomai e fa’atinoina ai aoaoga eseese e pei ona taua, lea ua ofo mai lo latou taimi e a’oa’oina ai fanau aoga mo lenei polokalame.

E to’atele fo’i ni isi o matua sa auai i le lagolagoina o le ulua’i aso o le polokalame a fanau, lea sa latou fa’aalia i le Samoa News le taua tele o polokalame faapenei, e fesoasoani ai i fanau aoga e fa’amasani ai i latou i auala eseese o le aganu’u a Samoa.