Ads by Google Ads by Google

Sasa’a tofa afioga Senatoa pili faia ai suega tagata faigaluega malo


[ata: foa'i]
ausage@samoanews.com

E tulaga ese fetufaaiga a afioga i Senatoa i le vaiaso nei, i le taimi na fetufaa’i ai le tofa ma le fa’autaga e fa’atatau i le pili a le Senate, e faia ai suega mo tagata faigaluega uma a le malo ina ia fa’amaonia, latou te le o tagofia fulaau fa’asaina ma le ‘ava malosi.

 

O ni isi o molimau sa valaauina mo lenei iloiloga, e aofia ai le Loia Sili a le malo ia Talauega Eleasalo Ale; Sui Komesina o Leoleo ia Vaimaga Maiava; Fa’atonusili o le Puipuiga Fa’alotoifale ia Samana S. Ve’ave’a, ma le Fa’atonusili o le Ofisa o Tagata Faigaluega a le malo ia Eseneiaso Liu.

 

O se tasi o mataupu na mamafa i ai felafolafoaiga a afioga i Senatoa, o le tulaga i le aofia lea o i latou i seuga pe leai fo’i.

 

Na taua e le afioga i le ali’i senatoa Magalei Logovi’i, e le tatau ona a’afia ai afioga i senatoa i le suega, ona e le o i latou o ni tagata faigaluega mo le malo, ae o i latou o sui na filifilia e itumalo i le Fono Faitulafono. O lona la talitonuga, e le tusa ma le Fa’avae Toe Teuteu a le atunu’u le tulafono, ona o le a aveese ai aia tatau o le tagata faigaluega.

 

Na fa’amanino e Talauega e fa’apea, e le na o Amerika Samoa lea ua tau fuafua ai le ituaiga tulafono lenei, ae ua i ai foi isi setete o le malo tele ua latou faia suega nei mo a latou tagata faigaluega, ona o le faanaunautaiga lava ina ia malu puipuia tagata faigaluega ma nofoaga o lo o galulue ai.

 

Na faamanino atili e le loia sili e fa’apea, o le talitonuga ina ua fausia lenei tulafono, e le o se aia tatau a le tagata faigaluega le galuega ua galue ai, ae o le avanoa ua ia maua e galue ai mo le malo.

 

Na toe fesili Magalei pe fa’apefea la pe a musu le tagata faigaluega e su’e lona tino, ae na tali le loia sili e fa’apea, afai ae musu le tagata faigaluega, o lo o manino i le tulafono le aveesea o le aia tatau na ia maua ai le avanoa faigaluega.

 

E le i nofo lelei i le finagalo o Magalei le fa’amaninoga a le loia sili, ae sa ia toe saunoa e fa’apea, “O lo’u popolega o lo o i ai, ina ne’i i ai ni mataupu e afua mai i le tulafono lenei e tofu i le fa’amasinoga, aua o lea ua outou fai mai e aveese le avanoa sa ou galue ai mo le malo pe afai ae ou musu, ae ia outou silafia, o a’u na tofia e lo’u itumalo e fai ma o latou sui i le fono, ae ou te le i saili galuega i le malo, afai la ou te musu, e mafai ona outou aveesea a’u mai le nofoa a lo’u itumalo.”

 

Na fa’amanino e le afioga i le ali’i senatoa ia Paepae Iosefo Faiai, o se tasi lea o senatoa na fa’auluina le tulafono e fa’apea, e le o i ai se agaga o le tulafono ina ia su’e uma tagata faigaluega a le malo, pau le agaga o le tulafono, ia su’e na o tagata ua masalomia, aemaise ai fo’i tagata fou uma e ulufale atu ma galulue mo le malo.

 

Na ioe Paepae i le i ai lea o aia tatau o le tagata faigaluega, ae o le aia tatau o le malo, e le tatau ai ona fa’a faigaluega se tagata na te fa’aaogaina fualaau fa’asaina poo le ‘ava malosi, ona o puipuiga i le saogalemu o nofoaga o lo o fa’atinoina ai galuega a le malo e tautua ai le atunu’u.

 

Na taua e le afioga a Satele Galu Satele lona lagolagoina o le tulafono, ae tatau la ona i ai se vaega e fa’aagafua ai Tama o le atunu’u mai le a’afia i suega nei. Sa ia taua e fa’apea, o le tagata matua lava ia, e avea le ‘ava malosi o se auala e tua i ai mai galuega o le aso, aemaise lava pe afai sa mamafa ni galuega, afai ae su’e uma tagata faigaluega a le malo, o le mea o le a tula’i mai, o le a tete’e uma tagata faigaluega, ona leai lea o se isi e toe faia galuega a le malo.

 

Ae i le talitonuga o le afioga i le ali’i senatoa ia Tuiagamoa Tavai, e le tatau lava ona i ai se tagata e sao mai i tulafono fa’apenei, ona o tulafono o lo o faia ina ia puipuia ai le saogalemu o le atunu’u atoa ma tagata faigaluega a le malo.

 

Sa ia fa’atula’i fo’i se fautauga ina ia fau se tulafono e aofia uma ai ma maota e lua a le fono faitulafono i le taimi e faia ai suega, ae ia faia le suega i le taimi lava e mae’a ai ona filifilia le senatoa poo le faipule e le itumalo, e lelei lena e faigofie ai ona toe faia se isi suiga i le tofi o le itumalo, pe afai e su’e atu o lo o fa’amaonia le tagofia e le sui ua filifilia o fualaau fa’asaina poo le ‘ava malosi.

 

I lona talitonuga, o le taimi lava e mae’a ai ona fa’atauto le senatoa poo le faipule, ona le toe mafai loa lea ona toe faia i ai ni suega.

 

Na taua e le afioga i le taitai komiti ia Fa’amausili Mau Jr le manino o le agaga o le tulafono o lo o i ai, ina ia mafai ai ona sailia tagata o lo o tagofia fualaau fa’asaina i taimi o galuega.

 

Na toe fa’amanino atili fo’i e le Loia Sili i afioga i senatoa le maualuga o le fa’aaloalo o le malo ma tagata uma i sui filifilia o itumalo ta’itasi, o le mafua’aga fo’i lena e le o i ai se manatu, e aofia i latou i le suega e pei ona taua i le tulafono, ae afai e finagalo i ai le maota maualuga, o se tulaga lelei fo’i mo le silasila mai a le atunu’u.

 

Ua i ai le fuafuaga o le a toe faia isi iloiloga e fa’atatau i le tulafono lenei i se taimi o i luma, pe a mae’a iloiloga a le fono mo le paketi lea o le a alo atu i ai.