Ads by Google Ads by Google

Pili sui ai fa’asalaga mo i latou solia tulafono fualaau fa’asaina


[ata: foa'i]
ausage@samoanews.com

Ua i luma nei o le maota maualuga a le Senate se pili sa fa’aulufale e le afioga i le ali’i Peresetene o le Senate ia Gaoteote Palaie Tofau, mo se tulafono e sui ai le gagana poo le fa’aupuga o le fa’asalaga e maua e le tagata e ta’usala e le fa’amasinoga, i lona soliina lea o tulafono tau fualaau fa’asaina a Amerika Samoa.

 

O le suiga e pei ona taua i le pili tau fa’aofi, o lo o taua ai le tulaga lea, soo se tasi na te solia pe le usitaia lea vaega o le tulafono, e ala i lona umia, tufaina atu, fa’atau pe gaosia fo’i tulaga o fualaau fa’asaina, e tatau ona fa’asala i le fa’asalaga falepuipui e le itiiti ifo ma le 5 tausaga, e le sili atu foi ma le 20 tausaga lona umi.

 

O le gagana o le tulafono o lo o i ai i le taimi nei, soo se tasi e ta’usala i lona soliina o le tulafono o fualaau fa’asaina i Amerika Samoa, e ala i lona umia, fa’atau atu, gaosi pe i ai fo’i ia te ia fualaau fa’asaina, e mafai ona fa’asalaina lea tagata i se fa’asalaga fa’a falepuipui ia le silia ma le 20 tausaga le umi.

 

O le to’atele o tagatanu’u ua ta’usala e le fa’amasinoga i lenei solitulafono, e fa’asalaina e le fa’amasinoga i latou i fa’asalaga fa’anofovaavaaia, e aofia ai lo latou tuliina lea o le tasi o vaetolu (1/3) o le 5 tausaga i le falepuipui, tusa lea e 20 masina.

 

O ni isi o taimi e fa’aleo ai e le afioga i le Fa’amasino Sili ana saunoaga e fa’atatau i fa’asalaga ua mae’a ona fa’atulaga e le Fono Faitulafono, fa’asaga ia i latou e ta’usala i le soliina o tulafono tau fualaau fa’asaina a le malo, ona ua saisaitia ai le fa’amasinoga mai lona tu’uina atu o se fa’asalaga talafeagai mo i latou o loo molia.

 

Na taua e ni isi o afioga i Senatoa sa fesiligia e le Samoa News e uiga i lenei mataupu e fa’apea, o se tasi o agaga autu ua mafua ai ona manatu le Fono e faia se suiga i le tulafono o lo o i ai nei, ina ia fai ma aoaoga i le to’atele o tagata o loo fiafia e umia, fa’atau ma gaosi fo’i fualaau fa’asaina, e le o se mea lelei lo latou faia o lea tulaga.