Ads by Google Ads by Google

Onosa’i I Mea Tiga

Vaega: 119

 

Alo maia, o le a toe fa’aauau atu la tatou tala, na muta mai la tala ina ua taunu’u manuia le malaga a le tamaloa o Roger i Samoa nei. O lea fo’i ua tu tonu lava le ta’avale la’upasese lea na alu ane ai le tamaloa i le fale o Filipina.

 

O le lea ua tu tonu nei le ta’avale i luma o le faleoloa o Filipina ma lana tama, a’o tua atu o lo’o i ai fale o le aiga, lea o lo’o i ai Lilo, Loleta ma le la fanau, o Luisa ma Vesi ma le la fanau, ia fa’apea fo’i ma le fale ua uma ona fai e Roger, ae e le i alu i lana malaga umi lea na alu nei.

 

Fai mai, ua le mautonu le loto o le ali’i Palagi, ona e fou i lana va’ai lea tulaga, i lona manatu, e leai se faleoloa tele fa’apea sa i ai muamua, a’o lea ua ia va’aia se faleoloa ua sili ona matagofie. O le taimi lea ua tumu luma o le paka i ta’avale, o tagata e o’o ane e fai a latou fa’atauga.

 

Na tilotilo atu nei Roger i le ali’i ave ta’avale, ae geno ane i ai le tama, ma ta’u ane i ai, e sili pe a la savavali i totonu se fai mai sana fa’atau, ma se i matamata fo’i i mea o lo’o maua i totonu o le faleoloa. Ua alu nei le solo i totonu, fai mai, ua te’i le Papalagi i le va’ai atu, so’o se mea lava, o lo’o maua uma i totonu o le faleoloa lenei.

 

Ae o le mea na mata’ina e le tamaloa, o tama’ita’i fa’atau oloa, fai mai, e ‘ese le mata ‘ata’ata o tama’ita’i. Ua tu nei Roger ma tilotilo atu i le isi itu, o lo’o tautau mai ai so’o se ituaiga ofu, o ‘ofu e maua e Hawaii, ma so’o se itu o le lalolagi, o lea ua maua uma i le faleoloa lenei.

 

Ua fa’asolosolo pea le maimoaga a le ali’i Palagi, a’o le taimi lea, ua savali fa’asasa’o lava le ave ta’avale i totonu o le Ofisa tele lava, o lo’o galulue ai Filipina ma le tama a lona uso, le tama’ita’i o Samalaulu, ma isi tama’ita’i e to’alua. O i latou ia o lo’o fesoasoani malosi i le okaina o mea uma lava, ma le fa’avasegaina o tupe a le faleoloa.

 

Na fa’ate’ia Samalaulu i le ulufale atu o le ali’i ave ta’avale, aua e masani uma ai i latou nei, ona e i ai fo’i taimi e pisi ai, ona vala’au lea o Filipina e alu ane e o ma se tama’ita’i e fai feau ma teu tupe o le faleoloa.

 

“Semo, ua a, o fea na e alu i ai, pe ua i ai fo’i sau pasese ua e au maia e fai sana fa’atau i lenei aso.?” O le fesili ane lea a Samalaulu, a’o le taimi lea, o lo’o talanoa Filipina i luga o le telefoni, ae talotalo ane lona lima i a Semo. Ua ‘ata Semo ma tilotilo ane i a Samalaulu, ma fa’apea ona mafaufauga, ma’imau pe ana fa’apea o o ta la’ititi pea, se manu o la’u pa’aga lelei a lenei, o Samalaulu.

 

Ae fai mai ua musumusu ane le tama’i isumu lea e fetamo’ea’i solo i totonu o le  ofisa, “E Semo, kalofa e, ia soloi la’ia o ou maka, ma fogifogi lou isu, o gafea lava o oe e maga’o i ai Samalaulu, alu i le fale e va’ai lou ko’alua ma lau fagau e ko’a iva, e le lalolagi e, ma mea o kumukumu ai.”

 

Na ona savali atu lava o Semo, u’u loa ma le lima o Samalaulu, “Samalaulu, sau lava ta o i fafo, sau ta o, se e va’ai i la’u pasese lea na au mai nei pe e te masani ai.” Ua tu a’e nei i luga le teine ma savavali loa i fafo ma Semo. Ae manatua, o lea lava e usi le maimoa a Roger i totonu o le faleoloa i le matagofie o mea uma. Ua savali ane nei le tamaloa i le itu o lo’o i ai so’o se ituaiga se’evae ae tutu loa Semo ma Samala’ulu ma mata’i ane le tamaloa Palagi.

 

Ua na o le tilotilo toto’a i ai o le teine, aua e manatua fo’i, e alu Roger o pepe lava le teine o Samala’ulu. E le o iloa la e le teine foliga o le to’alua o le tuafafine o lona tama. Ae fai mai le tala, ina ua pupula sa’o ane nei le tamaloa ma talotalo ane i a Semo, o foliga uma lava o Ali’ioaiga.

 

E faia pea...