Na fa’ai’u puta le malaga a se ali’i Faifeau mai Savai’i lea na ulufale mai i le vaiaso na te’a nei e auai i le fa’alavelave a lona aiga i Amerika Samoa nei, ina ua taofia o ia i le toese i Tafuna i le po o le aso Lua o le vaiaso lenei, e mafua mai i tu’uaiga i lona ‘ona lea ma fa’ao’olima i se isi ali’i o le latou aiga.

I lona tula’i ai i luma o le Fa’amasinoga Fa’aitumalo i le taeao ananafi, na fa’ailoa i ai e le afioga i le ali’i Fa’amasino ia Fiti Sunia i le ua molia e fa’apea, “O le pemita e ulufale mai ai i Amerika Samoa, o se avanoa lelei lea e te asiasi mai ai i lo matou atunu’u, ae le o se avanoa e te asiasi mai ai i le Fale Fa’amasino”.

O le susuga a Selesitino Teofilo, lea na fa’amaonia mai e ni isi o lona aiga i le Samoa News, o se Faifeau a le latou aiga o lo o galue i se tasi o aulotu i Savai’i, sa ia teena moliaga mama e lua ua tu’uaia ai o ia e le malo ina ua tula’i i luma o le Fa’amasinoga Fa’aitumalo i le taeao ananafi, le moliaga o le fa’ao’olima i le tulaga tolu atoa ai ma le fa’atupu vevesi i nofoaga faitele.

O se fa’alavelave na tula’i mai i Auma, Leone i le po o le aso Lua, lea o lo o tu’uaia ai le fa’ao’olima o Teofilo i se ali’i o le latou aiga, na mafua ai loa ona tofu atu lenei mataupu i le Ofisa o Leoleo i Tafuna, ia ua fa’afeso’ota’i e le ali’i na a’afia le Ofisa o Leoleo mo se fesoasoani.

Na taua e le ali’i na a’afia i Leoleo e fa’apea, i le po o le aso Lua, sa la aga’i atu ai ma lona to’alua e asi ni isi o aiga o lona to’alua sa malaga mai i Apia i le maliu a le latou aiga. I le mae’a ai o talanoaga sa faia, sa fa’ai’u ai loa i se latou inugapia ma talatalanoa ma sui o le aiga sa malaga mai e aofia ai ma le Teofilo.

O le ali’i na a’afia sa alu e fai mai fa’atauga fagupia mai le faleoloa i taimi uma e mana’omia ai, ae o lana malaga mulimuli lava e fa’atau mai pia mo le latou tafaoga, na fa’ateia ai o ia ina ua fo’i mai ma le fa’atau ae fa’afetaui atu o ia e ni isi o le au malaga mai Apia i luma o le fale, ma faia ai se latou talanoaga puupuu.

A o faia lea talanoaga puupuu, sa fa’afuase’i ona osofa’i o ia e Teofilo e ala i lona ta tu’i ona foliga ma palasi ai i lalo, sa ia taumafai e fusu atu ia Teofilo peita’i sa faigata ona ua lagona lona niniva i le malolosi o tu’i na a’afia ai o ia.

Na laga atu ni isi o le aiga ma vaovao le vevesi, ma maua ai loa lona avanoa e tau tevateva ai i le latou fale, ma ia manatu ai loa e vili le Ofisa o Leoleo mo se fesoasoani mo ia.

Na taunu’u Leoleo ma latou fesiligia le ua molia e tusa ai o le fa’alavelave sa tula’i mai, ma ia fa’amaonia ai lona fa’ao’olima i le ali’i na a’afia. Sa ia fa’ailoa atili fo’i o i Leoleo, e na o ia lava na fa’atinoina le fa’alavelave, ae o isi tagata o le aiga na tulioso atu e vaovao ma taofi le vevesi.

I fa’amaumauga a le fa’amasinoga o lo o taua ai e fa’apea, a o fa’agasolo pepa e taofia ai Teofilo i le toese i Tafuna i le po o le aso Lua, sa fa’alogoina e Leoleo le malosi o lona manogi pia.

Na fa’ailoa e le loia a Teofilo ia Kate Hannaher le teena e le ua molia o tu’uaiga fa’asaga ia te ia, ae mana’omia le toe fa’atulaga o lana mataupu i le aso Faraile o le vaiaso nei, ona o le aso fo’i lea o lo o fa’atulaga e toe malaga ese atu ai ma Amerika Samoa.

Na fa’ailoa e le sui o le Ofisa o Femalagaaiga i luma o le fa’amasinoga i le taeao ananafi e fa’apea, o Teofilo na malaga mai i le aso Faraile o le vaiaso na te’a nei, Iuni 16, 2017 i le pemita e 14 aso, ma ua fa’amoemoe e toe fo’i i Samoa i le aso Faraile o le vaiaso nei, Iuni 23.

Na umi se taimi o fesiligia e Sunia le sui o le Ofisa o Femalagaaiga a le malo, i aiaiga a le Ofisa o Femalagaaiga i pemita e 14 aso atoa ai ma pemita e 30 aso, ona o le finagalo o le ali’i Fa’amasino, ia lava se silafia o le Fa’amasinoga i tulaga fa’apenei e fesoasoani ai i ni isi o mataupu fa’apenei e tutupu mai i se taimi o i luma.

Na malie Sunia e tatala Teofilo i tua e aunoa ma se tupe e totogi, i lalo o poloaiga e tatau ona ia usita’i i ai, e aofia ai le fa’asa lea ona ia toe soli se tulafono, fa’asa ona ia toe tagofia le ‘ava malosi, a ia auai i le taimi ma le aso lea ua fa’atulaga e toe valaau ai lana mataupu, ma ua fa’asa ona ia toe taumafai e fa’afeso’ota’i le ali’i na a’afia i lana solitulafono.

“Fa’alogo lelei mai lava lau susuga”, o le saunoaga lea a Sunia ia Teofilo, “Ia e fa’autagia lelei mai tuutuuga ua avatu e le fa’amasinoga e tatala ai oe i tua, tusa lava pe e te toe fo’i i Samoa i le aso 23 Iuni, ae afai e te toe solia se tuutuuga ua tu’uina atu ia te oe, o le a taofia loa oe i le falepuipui e fa’atalitali ai le faaiuga o lau mataupu, e te le alu fo’i i Samoa i le aso 23 Iuni”.

“O le pemita e ulufale mai ai i Amerika Samoa, o se avanoa lelei lea e te asiasi mai ai i lo matou atunu’u, ae le o se avanoa e te asiasi mai ai i le Fale Fa’amasino”, o le saunoaga lea a Sunia. Saunoa atili le ali’i fa’amasino e fa’apea, e le o se taimi muamua lenei ua tula’i mai ai le tulaga lenei, o tagata e malaga asiasi mai i Amerika Samoa ae emo ane ua a’afia i solitulafono ma i’u ai i luma o le fa’amasinoga.

O le itula e 8:30 i le aso Faraile o le vaiaso nei lea ua fa’atulaga e toe valaau ai le mataupu a Teofilo.