Ua molia nei e le malo o Amerika Samoa ni tama’ita’i se to’alua sa galulue i le Fale e lafo ai tupe mo atunu’u i fafo, le Western Union Company i moliaga mamafa ta’i 2 o le gaoi, faapea ai ma moliaga mamafa ta’i 2 o le ave fa’agaoi o meatotino a isi tagata sa tu’uina atu i lalo o le la vaavaaiga.

O i laua ua molia o Judy Leilua Tautalaga ma Lagavale Angelina Sasa, o i laua ia sa galulue i le lala o le Western Union i Nu’uuli. O lenei mataupu na alia’e mai i le tausaga e 2016, peita’i o le vaiaso na te’a nei na fa’atoa taofia faapagota ai e le malo ia Tautalaga ma Sasa ma faila aloaia ai loa moliaga fa’asaga ia te i latou.

E $35,000 le tupe lea ua faatulaga e le ali’i Fa’amasino ia Fiti Sunia e totogi, ona fa’atoa mafai lea ona tatala Tautalaga i tua, ae $15,000 ua fa’atulaga e tatala ai Sasa i tua. E pei ona taua i fa’amaumauga a le fa’amasinoga, o lenei mataupu na tofu atu i le Ofisa o Leoleo a le malo i le aso 11 Iulai 2016, ina ua malaga mai se sui sinia o le Western Union mai Niu Sila mo le suesueina atili o lenei mataupu, ma mafua ai loa ona tu’uina atu le tagi i le Ofisa o Leoleo.

A o le i tuuina atu lenei mataupu i le Ofisa o Leoleo a le malo mo le su’esu’eina, na muamua fa’atino se su’esu’ega fa’alotoifale a le Ofisa o le Western Union i Nuuuli, le lala na galulue ai Tautalaga ma Sasa e uiga i lenei mataupu, ma taua ai le faatoese o i laua ua molia i le Pule o le Western Union i Nuuuli, ma la ta’utino i ai lo la ave fa’agaoi o tupe e pei ona fesiligia.

O lenei mataupu na mafai ona alia’e ina ua fesiligia e se ali’i Asia le lala o le Western Union i Nuuuli, i lana tupe e $7,000 na alu atu e lafo i Saina i le masina o Me 2016, peita’i na fiu lona aiga i Saina e fa’atali le tupe e leai se mea na maua.

Na taua e Sasa i Leoleo ina ua fesiligia o ia e fa’apea, e fa’alua ona ia faia gaioiga e gaoia mai ai se vaega tupe, ma le fa’amoemoe e fa’atumu ai le tupe lea sa gaoi e Tautalaga i le 30 aso talu ai. Na taua atili e Sasa i Leoleo e fa’apea, e ui ua faamalolo Tautalaga mai le galuega ona o le tupe sa ia gaioia, ae sa fa’aauau pea ona ia fesootai atu ia te ia ma talosagaina sana fesoasoani, i se auala e mafai ai ona toe faatumu tupe sa ia gaoia.

I suesuega a Leoleo na mafai ai ona maua le tulaga lea, e 2 gaioiga eseese sa faia e Sasa ma mafai ai ona gaoia le ta’i $7,000 mai le gaioiga e tasi, i le aso 10 & 14 Iuni 2016. I le mataupu a Tautalaga, e 3 gaioiga eseese sa ia faia, ma mafai ai ona ia gaoia le ta’i $7,000 mai le gaioiga e tasi, mai le aso 25 & 31 Me, atoa ai ma le aso 2 Iuni 2016.

Na maua le avanoa e fesiligia ai le ali’i Saina e ana le tupe o lo o tu’uaia na a’afia i lenei gaioiga. Na taua e le ali’i Saina i Leoleo e fa’apea, sa alu i le Western Union i Nuuuli e lafo lana $7,000 i Saina i le so 25 Me 2016. O Sasa sa fesoasoani i le ali’i Saina i le fa’agaioiina o lana mataupu.

Ina ua mae’a ona totogi le tupe ma tu’u atu e Sasa le lisiti i le Saina e fa’amaonia ai le aofa’i o lana tupe ua uma ona totogi atu, sa fai ai loa Sasa i le Saina, fa’atoa kilia lana tupe i totonu o le masina atoa. Na toe alu le Saina i le Western Union ina ua tuana’i le masina, ae na toe fa’ailoa i ai e Sasa e i ai le fa’aletonu o lo o tupu ua mafua ai ona le kilia lana tupe, ae toe fa’atali mo le isi masina atoa atonu e oo atu i ai ua kilia lana tupe, ma mafai ai loa ona maua e lona aiga i Saina.

Na taua e le isi tagata Asia o lo o a’afia fo’i i lenei mataupu i Leoleo e fa’apea, o le aso 9 & 10 Iuni 2016 na alu ai e lafo lana tupe i Saina. E ta’i $7,000 le aofa’i o le tupe sa ia lafo i Saina i aso eseese ia e lua. Ina ua uma ona lafo le tupe ma tuu atu e Sasa le lisiti ia te ia, sa fai atu Sasa ia te ia, e alu atu i le isi masina atoa e toe siaki atu pe ua kilia lana tupe.

Ina ua oo i le aso 20 Iuni na fa’atonu ai e Sasa le ali’i Asia e toe alu atu ai, na toe alu ai loa o ia i le Western Union e toe siaki lana tupe, peita’i sa faailoa i ai e Sasa e toe alu atu i le aso 30 Iuni 2016, e lei kilia lava lana tupe.

I le aso 23 o Iuni, na toe alu ai loa le ali’i Asia lea i le Western Union e toe lafo le isi ana tupe, peita’i e alu atu e le o faigaluega Sasa, ma maua ai loa ma le avanoa la te talanoa ai ma le Pule, ma ia fesiligia loa i ana tupe ua silia i le masina o lafo ae lei maua lava e lona aiga i Saina.

O iina na faatoa iloa ai loa e le Pule le fa’aletonu o lo o tula’i mai, ma amata ai loa ona suesueina lenei mataupu. E $10,000 le tupe na ta’utino Sasa sa ia gaioia, ae $14,000 le tupe na ta’utino Tautalaga sa ia gaoia. Ua mae’a ona toe totogi uma e le Western Union tupe a tagata na a’afia i lenei mataupu.

O lo o fa’agasolo pea lava i le taimi nei taualumaga o le mataupu a Sasa ma Tautalaga i luma o le Fa’amasinoga.