Ads by Google Ads by Google

Leai se ripoti a Leoleo fa’asaga mataupu aafia ai fanau aoga mai Leone


Le Puleaoga a le Aoga Maualuga a Leone fa’atasi ai ma le Sui Fa’atonusili o Aoga ia Philo Jennings i le taimi na lulu aao ai ma afioga i Senatoa, ina ua mae’a le iloiloga a le Komiti o Aoga a le Senate i le taeao ananafi. [ata AF]
ausage@samoanews.com

O le iloiloga sa faia a le Komiti o Aoga a le Senate ma sui o le Matagaluega o Aoga a le malo i le taeao ananafi, na manino ai i saunoaga a molimau le leai o se ripoti a le Ofisa o Leoleo fa’asaga i le mataupu lea o lo o tu’u fesili ai le to’atele, i le faiaoga mai le Aoga Maualuga a Leone lea o lo o fa’asaga i ai tu’uaiga, i lona faia lea o ni uiga mataga i ni ali’i aoga talavou.

 

O le Sui Fa’atonusili o Aoga a le malo ia Philo Jennings, atoa ai ma le Puleaoga a le aoga maualuga a Leone na molimau i le iloiloga sa fa’atautaia e le ta’ita’ifono o le Komiti o Aoga a le Senate, afioga i le ali’i Senatoa ia Faiivae Iuli A. Godinet.

 

O le mataupu lenei sa ripotia e le Samoa News i ni nai masina e le i mamao atu, i le mae’a ai lea ona fa’amaonia mai e se sui sinia o le Matagaluega o Leoleo, le faigata lea ona faia o su’esu’ega a le Ofisa o Leoleo fa’asaga i lenei mataupu, ona e le o mafai e le foma’i sa ia faia le suega fa’asaga i le tamaititi aoga na a’afia ona ia fa’amatu’u mai fa’amatalaga e fa’atatau i le suega, ma talosagaina ai loa le fesoasoani a le atunu’u lautele mo le tu’uina atu o ni isi fa’amatalaga e fa’atatau i lenei mataupu.

 

E le gata sa taua i le ripoti a le Samoa News le fa’amaonia i le suega sa faia a le falema’i, le a’afia o le tamaititi i faiga fa’afeusuaiga (STP), ae o le faiaoga fo’i o lo o tu’uaia i lenei mataupu, o se Fa’afafine, lea e talitonu ua ia tuua le atunu’u ae ua malaga atu nei i se vaega o Amerika.

 

Na taua e le afioga i le ali’i Senatoa ia Paepae I. Faiai i le taimi o le iloiloga e fa’apea, o se ripoti sa ia faitau ai i le nusipepa i se taimi ua mavae atu e uiga i le mataupu lenei, na mafua ai loa ona ia talosagaina le Komiti o Aoga a le maota mo se iloiloga, se’i fesiligia ai le tulaga ua o o i ai le su’esu’eina o lenei mataupu, ae pe ua i ai fo’i se fa’aiuga a le Ofisa o Aoga ua faia i le faiaoga o lo o tu’uaia.

 

Na fa’amanino e Jennings i luma o le Komiti e fa’apea, ua mae’a ona logoina Ofisa uma a le malo e gafa ma le su’esu’eina o lenei mataupu e aofia ai ma le Ofisa o Leoleo, i le ulua’i taimi na logoina ai le Ofisa autu o Aoga e fa’atatau i le mataupu lenei.

 

“Pau le tala mulimuli na ou toe maua lata mai, e le o mafai e le Ofisa o Leoleo ona su’esu’eina lenei mataupu, ona e le o mafai e le falema’i ona fa’amatu’u fa’amaumauga e fa’atatau i le suega sa faia i le tamaititi na a’afia, ona o puipuiga mo le tamaititi e laititi i lalo o le tulafono”, o le saunoaga lea a Jennings.

 

Na fa’apupula atili e le afioga a Paepae i le taimi o le iloiloga e fa’apea, na avea fa’amatalaga e fa’atatau i le fa’amaonia i le suega a le falema’i sa faia le a’afia o le tamaititi aoga i faiga fa’afeusuaiga, ma itu na mafua ai loa ona mapuna a’e fa’amatalaga e uiga i lenei mataupu, peita’i e foliga mai o lo o faigata galuega a Leoleo ona o tulafono o lo o puipuia ai fanau e laiti i lalo o le tulafono.

 

Na fa’amanino e le Puleaoga a le aoga maualuga a Leone le fa’atolu lea ona fesiligia e le Ofisa a le aoga le faiaoga o loo tu’uaia e tusa ai o lenei mataupu, ma ia teena fa’atolu ai fo’i lona faia o tulaga e pei ona tu’uaia ai o ia.

 

Na taua fo’i le faia o se suega a le faiaoga i le falema’i, peita’i e le o manino mai le fa’aiuga o lea suega sa faia.

 

Ina ua taumafai atu afioga i Senatoa e fesiligia le sui faatonusili o aoga, i se tulaga ua oo i ai le tamaititi na a’afia, atoa ai ma le faiaoga o loo masalomia, ae poo le a se isi gaioiga a le Ofiasa o Aoga e fesoasoani ai i taumafaiga a Leoleo mo le su’esu’eina o le mataupu, na pau le tali na tu’uina atu e le sui fa’atonusili o aoga i luma o le komiti, e le o i ai lava sona silafia i tulaga uma e fa’atatau i lenei mataupu, vagana ua toe taliu mai le Fa’atonusili o Aoga o loo malaga ona fa’atoa toe maua lea o se isi tulaga lata mai e fa’atatau i lenei mataupu.

 

Na taua e le afioga i le ali’i senatoa ia Paepae e fa’apea, o le a le muta ai galuega a le komiti, ae o le a su’esu’e pea ina ia mautinoa e manino le tulaga tonu e uiga i lenei mataupu.

 

Sa ia talosagaina fo’i le sui fa’atonusili o aoga ina ia fa’amalosia foi i taimi e faia ai fonotaga tuufaatasi a le matagaluega ma faiaoga ituaiga mataupu faapenei, ina ua maituina e fa’amamafa i faiaoga le le tatau lea ona faia ituaiga fa’apenei i fanau, ona o loo tuuina atu uma le fa’atuatuaga a matua i faiaoga mo le aoaoina o a latou fanau.