O le avanoa lea o lo o maua e tagata mai fafo e pei o Asia e avea ai ma tagata faipisinisi fa’apea ai ma tagata fai fa’atoaga i Amerika Samoa, ua manino mai ai le leai lea o se puipuiga a le malo i pisinisi ma atina’e o lo o tua i ai le tamaoaiga ma le ola soifua lelei a ona lava tagata.

O lea tulaga na mafai ona fa’ailoa i le iloiloga sa faia a le Komiti o le Soifua Maloloina a le maota maualuga, fa’apea ai molimau e to’alua mai le malo sa valaau e molimau i ni isi o mataupu o lo o atugalu i afioga i Senatoa, e pei o le mataupu i tagata fai faiva o lo o fa’atau a latou tau i’a i tafatafa o le alatele.

O le afioga ia Fuiavailiili K. Lafaele ma Motusa T. Nua na avea ma molimau a le malo i lenei iloiloga, lea sa la taua ai le tatau lea ona i ai se tulafono e puipuia ai le soona galulue o tagata mai fafo i pisinisi ma atina’e e tatau ona fa’apitoa lava mo tagata o le atunu’u.

Ina ua talanoaina tulaga i fa’atoaga ma faiga faiva, na taua ai e le afioga i le ali’i Senatoa ia Magalei Logovi’i le tatau lea ona i ai se tulafono e puipuia ai tagata mai fafo mai le o mai ma ave alamanuia o lo o fa’alagolago i ai manuia o aiga o le atunu’u.

Na fa’atula’i e Magalei se fa’ata’ita’iga o lana folasaga, ona sa ia sapalaiina le fa’i mo le falema’i i Faga’alu mo le 7 tausaga, peita’i ua ia le toe mauaina lea avanoa, ina ua manumalo le tauofoga a se ali’i fai fa’atoaga mai Filipaina ia te ia, ma sapalai ai loa e le ali’i Filipaina le fa’i mo le falema’i, e ui e leai se fa’atoaga a lea ali’i mai Asia.

Saunoa Magalei e faapea, afai ae i ai se tulafono a le malo e puipuia ai tulaga nei, ona mafai ai loa lea ona patino lava ituaiga pisinisi ma atina’e nei e pei o fa’atoaga ma faiga faiva i tagata Samoa lava ia.

Na lagolagoina e le afioga a Fuiavailiili le fautuaga a Magalei, ona o aso ua mavae sa na o tagata Samoa na galulue i pisinisi ma faleoloa i le atunu’u, peita’i o le taimi nei, ua pulea atoa e tagata mai Asia pisinisi ma faleoloa i le atunu’u.

E o o lava fo’i i fa’atoaga, sa na o tagata Samoa na galulue ma faia a latou fa’atoaga, peita’i o le taimi nei, ua matua to’atele lava tagata mai Asia ua aumai ma galulue i le totoina o fa’atoaga eseese, ma ua faigata ai i tagata o le atunu’u ona fa’amanuiaina i latou i tulaga tau fa’atoaga, ae i le tulaga o faiga faiva, e to’alua tagata Asia na taua e le ali’i Fa’atonusili ua i ai ana va’a fagota alia, ma ua foliga mai o le a aga’i mai fo’i tagata Asia i le atina’e o le faiga faiva.

E i ai le tulafono a le malo o Samoa e pei ona saunoa Fuiavailiili, e fa’apitoa ai lava ituaiga atina’e ma pisinisi mo na o tagata Samoa, e pei o pisinisi o pasi ma taxi la’upasese, e le mafai ona agava’a ai tagata mai isi atunu’u.

“O se tulaga lelei pe afai e fausia sa tatou tulafono fa’apena, ina ia fa’apitoa ai lava fa’atoaga ma faiga faiva i tagata Samoa, ma taofia ai tagata mai isi atunu’u i lo latou ulufale mai ma taumafai e fai mo latou a tatou atina’e o lo o tua i ai le tamaoaiga o aiga ta’itasi”, o le fautuaga lea a Fuiavailiili na fa’aalia ai le ioeina e ni isi o afioga i Senatoa.

I le taumafai ai pea o le malo e tu’u atu le fesoasoani i le aufai fa’atoaga a le atunu’u, na taua ai e Fuiavailiili le i ai o se polokalame ua galulue fa’atasi ai le Ofisa o Fa’atoaga faapea ai ma le Vaega a le Land Grants mai le Kolisi Tuufaatasi, atoa ai ma faletupe i le atunu’u, e fesootai atu ai i tagata fai fa’atoaga ma le aufai faiva i nu’u i tua, e ala i le tau sailiina o ni alagatupe e fesoasoani ai i le fa’atuputeleina o a latou atina’e ma pisinisi laiti.

“O le agaga atoa o lenei taumafaiga, ia maua le avanoa e fa’agaioi ai i latou nei ni a latou pisinisi laiti ma le fa’amoemoe e maua mai ai se tupe fa’asili, ma fa’aauau ai pea ona latou galulue fa’atuputeleina ia atina’e ma pisinisi mo le manuia o le aiga”, o le saunoaga lea a Fuiavailiili.

O se tasi o fa’afitauli e pei ona taua i le iloiloga, ua avea le naunau o tagata Asia i le atina’e o le fai fa’atoaga ma auala ua fa’atupulaia ai tagata mai fafo ua ulufale mai ma nonofo i le atunu’u.