Ads by Google Ads by Google

Le fiafia ni isi aufai fa’atoaga Samoa fa’aiuga taofi ai le latou taro


[ata: arcjive]
ausage@samoanews.com

APIA, Samoa - E to’atele ni isi o le aufai fa’atoaga mai Samoa ua fa’aalia o latou finagalo le fiafia i le fa’aiuga lea ua faia e le Fa’atonusili o le Ofisa o Fa’atoaga a Amerika Samoa, e taofia ai mo se taimi le tumau le toe auina mai o le taro mai Samoa lea o lo o mafai ona fa’atauina i soo se faleoloa i totonu o le atunu’u.

 

E le gata i le fa’asea o le aufai fa’atoaga a Samoa i le le sa’o o le fa’aiuga ua faia e taofia ai le toe auina mai o le latou taro e fa’atau i le teritori, ae ua latou tu’uaia fo’i le fa’aiuga e fa’aituau toe taulamalama i auala e taofi ai fa’amanuiaga mo i latou i Samoa.

 

“I lo’u lava taofi ua fai lava si vave o le fa’aiuga a le Fa’atonusili e taofi ai le toe auina atu o a matou taro e fa’atau i Amerika Samoa, a o lea e le i fa’amaonia tulaga o le vairusi (virus) ua masalomia le a’afia ai le taro i Samoa nei, sa tatau lava ona fa’atali le fa’aiuga a le Ofisa o Fa’atoaga a le teritori sei maua mai le fa’aiuga o su’esu’ega o lo o auina atu i fafo a le Ofisa o Fa’atoaga a Samoa”, o le saunoaga lea a le afioga a Mulipola Lavasi’i, o se tasi o le aufai fa’atoaga mai Samoa na fesiligia e le Samoa News i le fa’aiuga o le vaiaso na te’a nei i le maketi i Fugalei.

 

Ae na taua e le Tina fai fa’atoaga ia Asenati Faumui mai Faleata e faapea, ua leva tele ona taumafai le Ofisa o Fa’atoaga a Samoa e saili se auala e taofia ai le toe auina mai o le latou taro e fa’atau i le teritori.

 

“Ia te a’u lava ia e pei lava e taulamalama le fa’aiuga a Amerika Samoa ua faia, e foliga mai ua leva na tau saili se auala e taofi ai le toe auina atu o le matou taro e fa’atau i Amerika Samoa, ae o nai auala fo’i ia o lo o maua ai nai tupe e fesoasoani ai ia matou fa’atoaga, aua o lea e maua i ripoti mai le teritori e le gafatia e le aufai fa’atoaga a Amerika Samoa ona sapalai le taro mo pisinisi ma le polokalame a le School Lunch, ae o lea o lo o maua atu sia avanoa mai Samoa nei”, o le saunoaga lea a Faumui.

 

O le vaiaso na te’a nei na fa’alauiloa ai e le Ofisa o Fa’atoaga a Samoa sa latou ripoti e fa’atatau i ni vairusi se 2 ua masalomia le a’afia ai o le tiapula i Samoa, ma ua fa’amaonia le auina atu o ni vaega o ia tiapula e su’esu’eina i Siamani, ona fa’atoa maua ai loa lea o le fa’aiuga sa’o i ituaiga vairusi o lo o masalomia le a’afia ai o le taro.

 

Ae ui i vairusi e pei ona masalomia le a’afia ai o le tiapula i Samoa, o lo o lapataia pea e le Ofisa o Fa’atoaga a Samoa le aufai fa’atoaga a le atunu’u, e leai se tulaga e fa’apopoleina ai fua i latou i lea tulaga, ona e le o mafai ona fa’amaonia i le taimi nei, peita’i mo le Ofisa o Fa’atoaga a Amerika Samoa, e leai se tulaga e ta’u o le “le popole” i vairusi ua maua, ona o lo o i ai le popolega i le ono sao mai ai o ni isi fa’ama’i fou ma a’afia ai fa’atoaga a le atunu’u i taro o lo o aumai i Samoa.

 

Ona o lea tulaga, na faia ai loa e le Fa’atonusili o le Ofisa o Fa’atoaga a Amerika Samoa, susuga Filifa’atali Michael Fuiava le fa’aiuga atamai ma le fa’anatinati e taofia ai le toe auina mai o soo se taro mai Samoa mo le taimi nei, se’i fa’atali se fa’aiuga o le suega ua auina atu i Siamani.

 

Na fa’amaonia e Filifa’atali i le Samoa News e fa’apea, e leai lava se isi mafua’aga ua ala ai ona faia lenei fa’aiuga, sei vagana ai le manatu e puipui i le saogalemu o fa’atoaga i le atunu’u, ina nei toe fa’aluaina le fa’afitauli lea na a’afia ai fa’atoaga taro i Amerika Samoa i se taimi o le 1993, ina ua sao mai le fa’ama’i o le Lega mai Samoa ma a’afia ai fa’atoaga taro uma i le teritori.

 

Na taua e se ali’i su’esu’e i tulaga o fa’atoaga mai le Ofisa o Fa’atoaga a Samoa i le Samoa News, susuga Mauga Taualai e fa’apea, a o fa’atali ai se fa’aiuga o le suega lea ua auina atu i Siamani, ua manatu le Ofisa e galulue fa’atasi ma le aufai fa’atoaga mai nu’u ua masalomia le a’afia ai o le taro e pei o Safata ma Salani, ina ia taumafai se isi auala e foia ai le sosolo atu o le vairusi ma a’afia ai fa’atoaga i isi vaega o le atunu’u.

 

Sa ia taua atili le taumafai o le Ofisa o Fa’atoaga a Samoa e faia soo se auala ina ia taofia ai le a’afia o ma’umaga taro i se isi tulaga pagatia, aemaise lava le puipui mai le a’afia atu ai ma fa’atoaga i le motu i Salafai.