Ads by Google Ads by Google

Lava mau lagolagoina ai tu’uaiga fou fa’asaga ia Tolupo Hodges

ausage@samoanews.com

O le maea ai o le ulua’i iloiloga a se ali’i na ta’usala muamua i le umia fa’asolitulafono o fualaau fa’asaina i le vaiaso na te’a nei, na fa’ailoa aloaia ai loa e le afioga i le Fa’amasino Sili ia Michael Kruse, le lava o mau na tuuina atu e le malo e lagolago ai le latou tagi fou fa’asaga i lea ali’i.

 

Ua toe taofia nei le susuga a Tolupo Hodges i le toese i Tafuna e fa’atali ai le aso 18 Me lea ua fa’atulaga e tuuina atu ai le fa’aiuga a le fa’amasinoga fa’asaga ia te ia, ina ua fa’amaonia lona le usitaia o poloaiga sa tuuina atu mo lana fa’anofovaavaaia e 5 tausaga i le 2010.

 

E tasi le molimau sa valaauina e le malo mo le ulua’i iloiloga sa faia i le vaiaso na te’a nei, o le susuga lea i le ali’i Leoleo Suesue ia Det. Ioane Paselio, lea sa ia molimau e faamanino mau e lagolagoina ai le tagi fou fa’asaga ia Hodges.

 

O tuuaiga fou e aofia ai lona umia o vaega o le pauta faasaina o le aisa, atoa ai ma lona umia o pulufana o a’upega fa’asaina, o ni isi ia o vaega sa poloaina e le fa’amasinoga o ia i le 2010 e aua ne’i ona toe tagofia ao fa’anofovaavaaia ai o ia.

 

Na taua e Det. Paselio i lana molimau e fa’apea, o le mae’a ai ona sainia e le fa’amasinoga o sana poloaiga e sailia ai le fale ma le ta’avale a Hodges i le aso 12 Me 2017, na faia ai loa se galuega a le Vaega o Leoleo o lo o suesueina mataupu e fa’atatau i Fualaau Fa’asaina i le aso 18 Me o le tausaga lava na te’a nei, ina ia mautinoa e fa’ataunu’u le poloaiga a le fa’amasinoga.

 

A o faia le poloka a Leoleo i luma o le aoga a Fagaitua i le aso lea, sa vaaia le aga’i atu o Hodges i lana ta’avale ma taofi loa e Leoleo lana ta’avale ae fa’ailoa i ai le poloaiga a le fa’amasinoga e saili ai lona fale ma lana ta’avale.

 

Na sailia e leoleo le ta’avale ma maua ai le anoanoa’i o mea e fa’aaoga e utu ai fualaau faasaina o le pauta e pei o tama’i pepa iila, atoa ai ma le seleulu lea e fa’apipi’i ai tulimanu o pepa iila.

 

Ina ua sauni Leoleo e aga’i atu e saili le fale a le ua molia i Alofau, sa fa’aailoa e Hodges i Leoleo, o lo o i ai i totonu o le taga o se tasi o ona ofu o lo o tautau i totonu o se faleie i luma o lona fale se paipa tioata o lo o i ai vaega o le pauta o le aisa i totonu.

 

Na aga’i Leoleo i le fale o Hodges i Alofau ma latou maua i ai le paipa tioata e pei ona ia taua, o lo o i ai vaega o le pauta o le aisa i totonu. Sa fa’aauau le sailiga o le fale ma maua i ai le anoanoa’i o pepa iila e utu ai le pauta oona, atoa ai ma straw ua maea ona tipi tulimanu, o vaega uma ia e fa’aaoga e i latou e tagofia fualaau fa’asaina.

 

O isi vaega na maua e Leoleo i lea osofaiga, o pulufana atoa ai ma se vaega e tuu i ai pulu fana o se a’upega otomeki e fa’asa i le atunu’u o lo o tumu i ututau ua uma ona utu i ai.

 

O vaega uma na maua e Leoleo na mafai ona auina atu i le Ofisa ma teuina ai ma le fa’amoemoe e fa’aaoga o mau fa’amaonia mo le taimi o le fa’amasinoga.

 

O le alii loia ia Woodrow Pengelly o lo o tula’i mo le malo i lenei mataupu.

 

O se tasi o itu sa matua finau malosi ai le loia a Hodges, susuga Douglas Fiaui, o le le mafai lea e le malo ona latou tuuina atu i luma o le fa’amasinoga o ni mau faatino e lagolagoina ai la latou tagi fou fa’asaga i le ua molia.

 

E le gata e leai se kopi o le poloaiga tusitusia a le fa’amasinoga e sailia ai le fale o Hodges, ae o o lava fo’i i mea o lo o tu’uaia sa maua i lona fale e aofia ai fualaau fa’asaina ma pulufana, e leai ma se vaega o ia mau fa’amaonia na tuuina atu e le malo.

 

Na fa’ailoa e Kruse i ali’i loia e fa’apea, e le tau manaomia ni mau faitino e tuuina atu e lagolago ai le tagi fa’asaga ia Hodges i taimi o ulua’i iloiloga fa’apenei.

 

Saunoa atili Kruse e fa’apea, ua fa’amalieina le fa’amasinoga i mau sa tuuina atu e le malo e lagolago ai le le usitaia e le ua molia o tuutuuga o lana nofovaavaaia.