Ads by Google Ads by Google

Gaosiga Mea Taumafa Samoa - Kosi Kuka Matagaluega o Tina & Talavou


O se va'aiga i tina laufofoga fiafia ma sa la'ua vavalua ulu o le suavai. [ata: Leua Aiono Frost]

O se tasi o ali'i o le vasega o kuka Samoa a le DYWA ua ia tatauina le pe'epe'e. [ata: Leua Aiono Frost]

Ona ua tulata i le taimi e fa'amae'a ai a'oa'oga a le Matagaluega o Tina ma Tupulaga Talavou (DYWA) a le malo mo le tolu masina talu ai, o lea ua faia ai le aso mo le tapenaga, gaosia ma fa'avela mea taumafa Samoa e ala i le suavai e pusa ma toe taoina ai.

 

O le taeao o le aso ananafi sa tapena ai le matagaluega mo lea gaoioiga, ma sa faia lava e le Vasega Kuka a le DYWA.

 

O le tama'ita'i Faia'oga i le vasega Kuka, Malia Masalosalo, o ia lava lea sa ia fa'atautaia le gaoioiga atoa ae mafuli ane le vasega mo le tapenaga o le gaosiga o mea taumafa nei: Manapua po'o le Keke Pua'a, Faia'i Pilikaki, Faia'i I'a, Lua'i Mamoe po'o le Lu, Lua'i Povi Masima, Palusami, o le Taufolo, ma le umu loa o Ulu,Fa'i ma talo.

 

O nei mea uma sa pu'ea i ata fa'asolo e le vasega, ia toe faila lelei aua fo'i nisi vasega o le a soloa'i mai e a'oa'oina e ia peita'i, e manatu fo'i ina ia fa'amauina lea ulua'i vasega o mea ‘ai taumafa Samoa.

 

"Ona o lenei vaitau o le tu'uaga o a'oga a le fanau i le tau mafanafana, ua manatu ai e ao ina faia lea vasega o kukaina o mea'ai Samoa moni, aua o vasega sa faia mai i tausaga ua mavae, o kuka lava i mea tausami e matele ina faatauina i fale'aiga fa'apapalagi. Lea ua suia, ina ia tamau fo'i i mafaufau o le fanau talavou lea e to'atele i ai le vasega o lenei tausaga, le iloa lelei saunia, gaosi ma kuka lelei mea'ai Samoa mo le tausiga lelei o latou matua matutua, aua o latou vaisu nei tausami ua lisia i luga,” o se tala lea a Malia.

 

E le'i faigofie le suavai, ona o le tele o mea taumafa sa tapena, peita'i, ona o le vasega ua mae'a a'oa'oina lelei, na vave ai le ga'o'oga ma na tao le suavai ae ua manogi fa'asoloatoa le nofoaga o DYWA i Pago Pago i le sasala o mea'ai Samoa ua mae'a saunia lelei a'o fa'avela fo'i i le umu lea.

 

Ina ua fu'e mai, matua fa'afiafiaina i latou uma aua o le ulua'i taimi lea ua gaosia ai e nisi o talavou le Taufolo. "O lea fa'ato'a ou tago lea e fofo'e se ulu tunu e tapena ai mo le taufolo,” o se tala lea a le tama'ita'i Senileva Tyrell, ua mae'a pasia le a'oga maualuga i le Nuuuli Voctech.

 

Ona o le naunau e fia iloa gaosia le Taufolo, sa matua momoe ai lava talavou fa'atasi ma Tina uma o le vasega Kuka i le Faleta'alo i Pago Pago, ina ia auai i le gasesega o le suavai o mea taumafa Samoa.

 

O le fa'asoa atu a nei talavou e to'alua, o le au uso fo'i, Matalasi ma Senileva Tyrell, o le la'ua a'oa'oina lea o nei tina i le gaosiga o le Manapua fa'a-Hawaii ae fa'aaogaina ai le siusiupipi mo le a'ano o manufasi e faia ai. E 10 pauna le falaoa mata sa gaosia fa'apitoa ai le pani mo le Manapua, ae tasi fo'i le pusa siusiupipi sa tapena ai lea taumafa.

 

O le mea sili ona faigata i le gao'oga o le suavai, o le papa tetele lea o ma'a a'asa o le umu, peita'i, na matua fa'ama'ai atili le latou va'ai i le taimi na tu'i ai le taufolo, fofo'ea ulu, le taimi tonu e ave'ese mai ai le ulu ua tatau ona vela, o le gaosiga fo'i o le alava o le laumiu e afifi ai le taufolo.

 

O le susunuina o le suka ina ia fa'alanu ma fa'asuamalie ai le Taufolo, ua ese fo'i lena gaoioiga, ae maise o le vanega ese o fatu ma se'i ese le fune o le Ulu a'o le'i tu'ia le ulu mo le taufolo. Na ofu fo'i e i latou o lua'u uma lava, e amata mai lua'u mamoe, lua'u povimasina, lua'u pilitati.

 

"Fa'ato'a ou ofua lava lea o se palusami, e fa'apea lava e faigofie, ae o lea e leai ma se faigofie o le gaosiga o mea taumasami Samoa,” o se tala lea a le tama'ita'i o Matalasi. O taulele'a lava e to'alua sa auai, o i la'ua nei ma se tama e to'atasi sa latou valuaina muamua popo, peita'i e fesuia'i mai lava ina ia o'o ina tatau le niu mo nei mea taumafa uma, ua fa'asolo mai tina i le valupopo, ae o'o ane taulele'a i le tatau o le niu.

 

Ua iloa e le fanau oso tatau, "O le mea a leiloa le taimi e faia ai lea fe'au ma lea fe'au, e le tatau fo'i ona sau e fai umu, e tiga fo'i taliga i le tau fa'atonu so'o." O upu masani ia e fa'alogoina, ae mafua mai ona e le'i mua'i faiumu.

 

O le susua o le tausami i le lua'u mamoe, e le tutusa ma le tigaina e gaosia mai le amataga. A le vave fo'i le 'alo, e maua lava e le papa o ma'a a'asa o le umu, sola i le aiga ua le fia i ai!. Ina ua fu'e le suavai, sa fa'asoa lelei mai le Fa'atonu ma ona sui, se'ia tofusia atoa le matagaluega, ae maise o nai sui a'o'oga i o latou aiga, ina ia talamasine ai le taumafaiga a le Vasega Kuka a le Dywa i taumafa Samoa.

 

"O se taufolo sili lea ona matagofie, leaga sa ou auai i lona gasesega mai, se'ia o'o ia tunu ma fofoe ulu, auau ese fatu ma le fune, tu'i ma fifi fa'atasi ma lona sua suamalie, ua atoa mea uma, e matagofie tele lona tofo,” o se tala 'ata lea a le tama'ita'i o Senileva, lea ua fuafua e fai lana taufolo e fa'atali ai lona tama pe a toe taliu mai Utah.