Ads by Google Ads by Google

Galulue fa’atasi uma malo saili auala taofia ai ulufale mai fualaau fa’asaina


Le afioga i le ali’i kovana ia Lolo Matalasi Moliga. [ata AF]
ausage@samoanews.com

A o galulue fa’atasi ai le malo ma le atunu’u atoa saili auala uma e mafai ai ona taofia le ulufale mai o fualaau fa’asaina i le atunu’u, ua tofia nei e le afioga i le ali’i kovana ia Lolo Matalasi Moliga se Komisi Faapitoa latou te gafa ma le sailiina o auala e taofia ai ma aveesea fualaau fa’asaina i le atunu’u.

 

O lea Komiti Fa’apitoa o lo o aofia ai Fa’atonusili ma sui mai Matagaluega ma Ofisa eseese e 13 a le malo.

 

O le agaga atoa ua mafua ai ona tofia lenei komisi e pei ona taua e Lolo i sana tusi na fa’alauiloa aloaia ai sui o le Komisi ua tofia, e le gata ia taofia le ulufale mai atoa ai ma le aveesea o fualaau fa’asaina i le atunu’u, a ia taofia ai fo’i le sosolo atu i totonu o aoga i le atunu’u.

 

“Ua molimauina tulaga pagatia ua oo i ai Amerika Samoa ona o fualaau fa’asaina. Ua a’afia ai o tatou aiga i le mata’utia ma le malosi o fualaau fa’asaina i le atunu’u”, o se vaega lea o le tusi a Lolo sa tu’uina atu i lana Kapeneta i le aso 2 Aokuso o le tausaga nei, ina ua fa’alauiloa ofisa ma sui ua tofia i le Komisi Fa’apitoa.

 

E tusa ai o le polokalame fa’ataoto a le ali’i kovana, o tiute a le Komisi Faapitoa lenei e aofia ai le taumafai e fa’aitiitia ma aveesea fualaau fa’asaina i le atunu’u, fa’aitiitia ma aveesea isi ituaiga solitulafono o lo o fesootai ma fualaau fa’asaina, fa’amalosia puipuiga ma polokalame fa a’amalosia ai tulafono ma togafitiga mo i latou e a’afia i fualaau fa’asaina, tu’u fa’atasia o fa’amatalaga e fesoasoani i le foiaina o lenei fa’afitauli, aemaise ai o le fa’alauiloa i le atunu’u o gaioiga uma ma taumafaiga ina ia taofia ai le fa’aaogaina ma a’afiaga o fualaau fa’asaina.

 

O ni isi o ofisa ua i ai o latou sui i lenei Komisi Faapitoa e aofia ai le Ofisa o le Kovana, Ofisa o Auaunaga ma Tautua Lautele, Ofisa o le Soifua Maloloina, fa’apea ai ma le Ofisa o Mataupu Tau Samoa, lea o lo o i ai le malosi i le fa’atulagaina o tulafono i totonu o nu’u ma afioaga e talanoaina ai ma fa’amalosia puipuiga i lenei fa’afitauli.

 

O se tasi o fuafuaga ua fa’ataoto a le ali’i kovana mo lenei Komisi Faapitoa, e aofia ai le tatau lea ona fono i masina ta’itasi mo le talanoaina o auala e aga’i ai i luma la latou galuega.

 

“Ua molimauina a’afiaga ua faia e fualaau fa’asaina i o tatou aiga ma o tatou olaga, ma ua tatau ona tatou gaioi e fa’atino soo se auala e foia ai lenei fa’afitauli, e ala i le galulue fa’atasi o matagaluega a le malo ma vaega tumaoti ua tofia e sailia se tali o lenei fa’afitauli”, o se vaega lea o le tusi a le ali’i kovana.

 

Ua ia talosagaina fo’i le tatau lea ona aofia ai ma sui o afioaga, itumalo, ekalesia, fa’apotopotoga tumaoti aemaise ai faalapotopotoga tuto’atasi a le malo o lo o latou unaia malosi auala e puipuia ai le atunuu ma tupulaga talavou mai lenei fa’afitauli.

 

I le fonotaga a le Kapeneta sa usuia i le Ofisa o Fa’atoaga i le taeao ananafi, na fa’ailoa ai e le ali’i kovana le i ai o Amerika Samoa i se tulaga pagatia i le taimi nei, ona o le fa’afitauli ua i ai fualaau fa’asaina i o tatou laufanua, ma ua atagia mai fo’i i sailiiliga o lo o faia, e le o i ai se fa’afanua ua fa’ataoto e mafai ai ona foia lenei fa’afitauli.

 

Sa ia talosagaina fo’i le Komesina o Leoleo ina ia galulue fa’atasi mo le fa’atinoina o taumafaiga uma ina ia foia ai lenei fa’afitauli ua matua ogaoga ona aafiaga i le atunu’u i le taimi nei.