Ua fautuaina e le afioga i le ali’i kovana ia Lolo Matalasi Moliga afioga i Fa’atonusili o Matagaluega uma ma Ofisa Tumaoti a le malo, ina ia amata tapena a latou ripoti i le tulaga atoa o lo o i ai tautua a Ofisa uma o le malo, ma le fa’amoemoe e tatau ona tauaaoina atu ia ripoti i le Ofisa o le Initeria atoa ai ma le Fono Faitulafono, a o le i tapunia le tausaga tupe lenei 2017.

O le mataupu e fa’atatau i le tapenaina lea o ripoti a Matagaluega eseese uma a le malo mo le Initeria ma le Fono Faitulafono, o se tasi lea o mataupu sa lalafo i ai le afioga i le kovana ma lana kapeneta i le vaiaso na te’a nei.

Saunoa le ali’i kovana e fa’apea, o se taimi talafeagai lelei lenei mo le malo e tapena ai ripoti a ana matagaluega taitasi, ma le fa’amoemoe e tu’uina atu i le Ofisa o le Initeria atoa ai ma le Fono Faitulafono, e fa’ailoa atu ai le tulaga tonu e tatau ona taoto i ai le lumana’i o le faigamalo a Amerika Samoa.

“O le taua o ripoti ta’itasi nei mai matagaluega eseese a le malo, ia mafai ai ona fa’amanino i le Initeria ma le Fono Faitulafono auaunaga ma tautua o lo o fa’atinoina e ofisa taitasi a le malo, ma ia fa’ailoa le lumana’i e tatau ona ausia e lea ofisa ma lea ofisa, atoa ai ma ituaiga tautua o lo o outou fa’atinoina mo le atunu’u”, o le saunoaga lea a Lolo.

“O le taua o le tu’uina atu o nei ripoti i le Initeria, ina ia silafia ai e ta’ita’i o le Initeria le tulaga tonu o lo o taoto ai le lumana’i o le faigamalo a Amerika Samoa, ae o le taua o le tu’uina atu o nei ripoti i le Fono Faitulafono, ina ia silafia ai e ta’ita’i o le fono le tulaga manuia o lo o aga’i i ai galuega fa’atino a le malo, aua o le fono, o iina o lo o taoto ai le leo o tagatanu’u o Tutuila ma Manu’a, latou te fia iloaina fo’i le tulaga tonu e tatau ona i ai le lumana’i l le malo”.

O se tasi o itu taua na fa’ailoa e Lolo i lana kapeneta, ona o ripoti nei e le i mafai ona fa’atinoina e isi nofoaiga ua mavae atu, peita’i o se taimi taua lenei ma alaga tatau ai ona faataunu’u nei ripoti ae tu’uina atu i le Initeria.

“O le isi itu taua o le ripoti, e fa’ailoa ai i alo ma fanau le tulaga tonu e tatau ona taoto ai le lumana’i o le atunu’u, e le gata i lena, ae tatau fo’i ona fautua mai outou o fa’atonu i le tulaga tonu e tatau ona i ai lou ofisa, pe tatau ona fa’aauau pea pe leai fo’i, o le isi lena itu taua o le ripoti lea, e te fautua mai ai ia maua ma le lutena kovana ia Lemanu pe tatau ona toe fa’aauau le tautua a lou ofisa i le malo pe leai fo’i”, o le saunoaga lea a Lolo.

O se tasi o itu na taua e Lolo e taua ai le tapenaina o ripoti mai matagaluega taitasi a le malo, e faigofie ai ona silafia e le Fono galuega fa’atino o lo o fa’atinoina e ofisa eseese, ina ia fa’aitiitia ai le tele o fesili o lo o tu’u fesili ai sui o le Fono i le taimi o ana iloiloga, aua o lea ua manino atoatoa tulaga i tautua a ofisa eseese i totonu o le ripoti.

“O le isi itu taua lena o le faamoemoe lenei, ia taofia ai le alu tau to’ai o le malo i le fa’atinoina o lana tautua mo tagata, aua e tele naua manaoga o lo o folasia mai e le atunu’u, peita’i o le fa’afitauli e le o lava tupe e fa’atupe uma ai, ae afai loa e manino auaunaga a ofisa eseese, ona fa’a faigofie ai loa lea iina ona fa’atino tulaga uma e pei ona moomia”, o le isi lea saunoaga a le ali’i kovana.

Na taua e le ali’i kovana le tele o manaoga o lo o moomia le fia fa’aleleia i totonu o le atunu’u e pei o faleaoga, auala, atoa ai ma isi atina’e tetele e tatau ona fausia, peita’i o le fa’afitauli numera tasi o lo o i ai, e le o mafai ona lava se vaega tupe e fa’atino ai lea tulaga, ma ua avea ai le fatuaiga o le sailiina lea o tupe e faatupe ai atina’e mo le malo, o se galuega ua lafo to’atasi atu i le malo, ma ua oo ai lava ina tagi i lima le malo i le tau sailiina o ni tupe e fa’atupe ai galuega lelei mo le atunu’u.

O le taimi nei e pei ona saunoa Lolo, ua fa’aaitalafu e le malo ni isi o ana galuega mo le fausia o auala ma isi atina’e, e mafua mai ona o lo o utiuti le faasoa tau tupe, ae afai e manino tautua a ofisa eseese, ona mafai ai loa lea ona vaavaai le malo i le tulaga tonu e tatau ona maua mai ai isi ana tupe fa’aopoopo e fa’atupe ai le tele o ana galuega atina’e.

Sa ia viia fuafuaga ua taumafai i ai lana kapeneta i le tau sailiina mai lea o isi auala e maua ai tupe faaopoopo mo le malo.

Saunoa Lolo e fa’apea, afai e manino le silasila a le Fono i tiute fa’ataoto a ofisa eseese a le malo, ona fa’a faigofie lea ona latou taliaina soo se talosaga e tu’uina atu mo alagatupe e fa’atupe ai galuega atina’e mo le malo.