O le fonotaga a le Kapeneta a le malo o Samoa i le amataga o le vaiaso nei, na filifilia ai loa le afioga i le Tuia’ana ia Tuimaleali’ifano Va’aletoa Sualauvi II e avea ma Ao o le malo o Samoa, e sui tulaga i le afioga i le Tamaaiga ia Tui Atua Tupua Tamasese Efi sa ia aveaina le nofoa mo nofoaiga sosoo e 2 ua mavae atu.

I se fa’atalatalanoaga a le Samoa News ma le Konesula o le malo o Samoa i Amerika Samoa nei, le afioga a Auseugaefa Va’asatia Poloma Komiti, sa ia fa’amaonia mai ai suiga e pei ona pasia e le Palemene a Samoa i le taeao ananafi.

“O le filifiliga e pei ona autasi i ai le Palemene a Samoa i le vaiaso nei, ma filifilia ai le afioga i le Tuia’ana ia Tuimaleali’ifano e avea ma Ao o le malo o Samoa, o fa’aiuga lava ua mae’a ona pasia ma fa’amauina i totonu o le Fa’avae o le malo. E pei ona silafia i le Fa’avae o Samoa, a mae’a loa le taimi na avea ai Tamasese Meaole ma Malietoa Tanumafili II ma Ao o le malo o Samoa, ona filifili lea o tofi e mulimuli mai ai”, o le saunoaga lea a Auseugaefa i le Samoa News.

“Lea la ua mae’a ona fa’ataunu’uina e le Palemene a Samoa le isi vaega taua o le Fa’avae, o le filifilia lea o le Ao o lona malo, e pei ona tauave mai e Tui Atua mo nofoaiga e 2 ua mavae atu, lea fo’i la ua i ai le suiga e pei ona filifilia i ai le afioga i le Tamaaiga ia Tuimaleali’ifano na te tauaveina le tofi a le malo”.

O le aso 25 Iulai 2017 e pei ona fa’atulaga mai e le Fa’avae e mae’a aloaia ai le tauaveina e Tui Atua o le tofi o le Ao o le malo o Samoa, ona seei ane loa lea o le afioga ia Tuimaleali’ifano mo le tauaveina o le nofoa i le aso e sosoo ai, Iulai 26.

A o le i filifilia le afioga a Tuimaleali’ifano e avea ma Sui Ao o le malo o Samoa, sa muamua galue o ia o se loia mo le Matagaluega o Leoleo a le malo o Samoa.

O le suafa o Tuimaleali’ifano sa to’atolu i ai suafa na filifili mai ai se Ao o le malo o Samoa i le palota sa faia i le 2007 ma le 2012, talu mai le taimi na tuumalo ai le susuga ia Malietoa i le 2007, peita’i e le i fa’amanuiaina lona suafa i ia taimi e 2.