O se tasi o mataupu na tele i ai fesili a afioga i Senatoa i le taimi o le latou iloiloga, e iloilo ai le pili a le faigamalo e fa’ae’e ai le lafoga 1% mo pisinisi uma i le atunu’u, o le auala e fa’amalosia ai e le malo lenei tulafono.

Na taua e le to’atele o afioga i Senatoa e fa’apea, afai o lo o i ai se tulaga fa’aletonu i le fa’amalosia e le malo o le tulafono o lafoga mo pisinisi i le taimi nei, lona uiga o le a faigata fo’i ona latou fa’amalosia le tulafono lenei pe afai ae pasia e le Fono ma saini e le Kovana.

O le agaga atoa ua mafua ai ona manatu le Komiti o le Tupe a le malo e fa’avae le lafoga e 1% mo pisinisi uma i le atunu’u, ina ia laugatasia uma ai pisinisi i le totogiina lea o le lafoga lea i le malo, ma maua ai le avanoa e tau fai fesoasoani uma ai pisinisi i le malo.

O se tasi o itu sa fesiligia e le afioga i le ali’i senatoa ia Magalei Logovi’i, o ia fo’i lea o le taitai komiti, o le faauigaina o le upu “pisinisi” e pei ona taua i le tulafono, pe aofia uma ai tagata ua i ai laisene pisinisi e pei o tagata fai fa’atoaga.

Na faamanino e le Teutupe a le malo ia Ueligitone Tonumaipea, pau pisinisi e aofia i le lafoga e 1% e pei ona fuafuaina i le tulafono, na o pisinisi tetele o lo o faila a latou lafoga i lalo o lafoga tau pisinisi, ae o isi pisinisi o lo o faila a latou lafoga e pei o tagata ta’ito’atasi, e le aofia ai i latou i le lafoga lenei.

E ui i le tele o pisinisi o lo o i ai i le taimi nei, e na o le 13% o lo o totogi a latou lafoga i le malo, ae o le isi vaega to’atele e oo atu i le 87%, e leai ni latou lafoga o totogia i le malo.

Na fesili Magalei i le mafua’aga ua ala ai ona le totogia lafoga a le tele o pisinisi, ae na tali le Teutpue, e mafua mai i tulaga fa’aletonu o lo o alia’e mai i le tulafono mo lafoga o pisinisi, ae afai loa la e pasia le tulafono lenei ma aveese ai faaletonu nei, ona mafai ai loa lea ona tofu sao uma pisinisi i le atina’e o le malo.

Saunoa Misaalefua J. Hudson e fa’apea, afai o lo o mafai e ni isi o pisinisi ona latou faia uiga pi’opi’o ua mafua ai ona le totogia a latou lafoga i le malo i le taimi nei, e mafai fo’i ona latou toe faia uiga le faamaoni ia pe afai ae pasia le tulafono fou lenei.

Na taua e Muagututia e fa’apea, ua tele tausaga e le o i ai se lafoga faapena, ae ina ua ulufale mai le pili a le malo e faatulaga ai le lafoga lenei 1%, na a’e ai loa se fesili ia te ia, pe ua i ai se mea ua tupu i le malo ua mafua ai ona latou manaomia lenei lafoga, ae na saunoa le Teutupe e fa’apea, talu ai ua utiuti le itu tau tupe i le malo, ua finagalo ai loa le kovana ma le taupulega ina ia saili ni isi auala e fesoasoani ai i le pagatia ua i ai le malo.

Na fesili Fonoti T. Aufata i le mafua’aga na faia ai le faaiuga e faaitiitia itula faigaluega a tagata faigaluega a le malo, ae na tali le tofa Iulogologo Pereira, o le isi lea sui o le Komiti o Tupe a le malo, ina ua maitauina e le faigamalo tulaga faaletonu i tupe maua e faatino ai ana galuega fa’atino.

Ae na toe saunoa Fonoti e fa’apea, sa le tatau fua ona faaitiitia itula faigaluega a tagata faigaluega lautele a le malo, ae lava na o Faatonusili e fa’aitiitia a latou itula faigaluega. Ae na toe tali fo’i Iulogologo e fa’apea, o le a fa’aoo i le kovana le fautuaga a le afioga i le Senatoa.

O se tasi o itu na fesiligia e le afioga i le ali’i senatoa ia Satele Galu Satele, o le toatele o tagata faigaluega mai fafo o lo o ulufale mai ma ave galuega, ae o ituaiga galuega ia e mafai fo’i ona fa’atino e tagatanu’u a Amerika Samoa.

Saunoa atili Satele e fa’apea, ua tumu atoa pisinisi Asia i tagata faigaluega mai fafo, ae ua le iloa e tagata o le atunu’u poo fea o le a o e saili galuega ai.

I le tulaga o le lafoga o lo o totogi e pisinisi, na taua ai e Satele le tatau lea ona lelei le fa’amalosiga e le malo, ae afai o lo o masalomia ni faiga le sa’o mai ni isi o pisinisi, e tatau ona su’esu’e lelei pisinisi ia, ae o le fa’afitauli o lo o maitauina, e mafua ona tele le tupe e le o maua e le malo mai lafoga a pisinisi, e le o i ai ni galuega a le malo o faia.

O lo o fa’aauau pea galuega a le Fono mo le iloiloina o le tele o pili tupe a le faigamalo e aofia ai ma le lafoga e 1% mo pisinisi uma i le atunu’u.