Ads by Google Ads by Google

Fautuaina taofia tipi o lafoga Feterale mai siaki o alauni a Senatoa


Le afioga i le ali’i Peresetene o le Senate, Gaoteote Palaie Tofau. [ata AF]
ausage@samoanews.com

Ua fautuaina e le Peresetene o le Senate, le afioga i le Tama’ita’i o le Ao ia Gaoteote Palaie Tofau le Teutupe a le malo, ina ia taofia le toe tipiina o lafoga a le feterale mai siaki o alauni a afioga i Senatoa, ona o lo o manino i le tulafono e leai ni lafoga e aveesea mai i siaki o lafoga a Senatoa ma Faipule.

 

I se iloiloga sa faia i luma o le Senate i le vaiaso na te’a nei, lea fo’i na molimau ai le Teutupe a le malo ia Ueligitone Tonumaipe’a, na tu’uina atu ai e le ali’i peresetene lana fautuaga i le Teutupe, i le mae’a ai lea ona fa’aleo e ni isi o Senatoa o lagona fa’asea i le mafua’aga ua tipi ai fua lafoga mai a latou siaki o alauni, o le autu fo’i lea o le iloiloga sa valaauina e le Komiti o le Paketi a le maota maualuga, lea na ta’ita’ia e le afioga i le ali’i Senatoa ia Magalei Logovi’i.

 

O le iloiloga sa valaauina ina ua fesiligia e ni isi o Senatoa i le taimi o folafolaga a le maota maualuga i le vaiaso na te’a nei, le mafua’aga ua tipi ai lafoga a le feterale o le FICA ma le Medicare mai siaki o a latou alauni o loo maua.

 

O tulafono a le feterale e pei ona fa’amanino e le Teutupe i luma o le komiti e fa’apea, soo se agalatupe fa’aopoopo lava e maua e se tagata faigaluega, e tatau ona tipi mai ai le lafoga o le FICA ma le medicare, afai e le faia lea tulaga, e fa’asala e le Ofisa o Lafoga a le malo tele (IRS) lea tagata.

 

Na fa’amanino e Tonumaipe’a e fa’apea, i lalo o le tulafono a le malo o lo o i ai, a mae’a le tausaga faigaluega, ona faila lea e Senatoa ma Faipule a latou ripoti i le Ofisa o Lafoga a le malo e fa’ailoa atu ai mea sa fa’aalu i ai tupe o a latou alauni o loo maua i le tausaga atoa (expenses report). O le tupe o loo maua e Faipule ma Senatoa mai a latou alauni, e fa’aalu lea e fa’atau ai mea o loo mana’omia mo a latou ofisa e pei o masini computer ma isi lava mea faiglauega e mana’omia.

 

Ae ina ua maitauina le leai o ni ripoti mai Senatoa ma Faipule e fa’atatau i le manaoga e pei ona taua, na fesiligia ai loa le mafua’aga ua le tipi mai ai le lafoga o le FICA ma le medicare mai siaki o alauni a Senatoa ma Faipule, ma faia ai loa le aiaiga, e sili pe a aveese mai le lafoga mai siaki o alauni a Senatoa ma Faipule, ina ia puipuia mai ai i latou mai le a’afia i lalo o tulafono a le IRS.

 

“O le mea moni lava, afai e malaga mai sui o le Ofisa o Lafoga a le malo tele ma siaki atu e leai ni a outou ripoti o failaina atu, e i ai le avanoa e sala ai a outou afioga, o le mafua’aga moni lena sa faia ai loa le maliliega ma ni isi o Senatoa ma Faipule ua mavae atu, ma malilie ai loa i latou i le auala lea, nai lo le tau faila o ripoti i le fa’aiuga o le tausaga”, o le saunoaga lea a le Teutupe a le malo.

 

Saunoa atili le Teutupe e fa’apea, afai e finagalo afioga i Senatoa e faila a latou ripoti e pei ona taua i le fa’aiuga o le tausaga, o se tulaga lelei lena ina ia taofia ai le aveese o lafoga mai a latou siaki.

 

Na fa’amanino e Gaoteote i le Teutupe a le malo e fa’apea, o le tulafono o lo o i ai, e leai se lafoga e aveesea mai i siaki o alauni a Senatoa ma Faipule. Na ioeina fo’i e Gaoteote le saunoaga a le Teutupe e fa’atatau i tulafono a le feterale, lea e tipi ese ai le lafoga mai alaga tupe fa’aopoopo a le tagata faigaluega.

 

“Ae o le itu e fia fa’amanino, o tupe ia e maua mai ai siaki o alauni a afioga i Senatoa, e le o ni tupe mai le feterale, o tupe lotoifale lava a tatou, e leai ma se sene apa a le feterale na alu ai, e le o se tulaga talafeagai la le tipi fua o le lafoga ma alu i le feterale ae o tupe lotoifale ia e maua mai ai alauni a le Fono”, o le saunoaga lea a Gaoteote.

 

Sa ia saunoa atili fo’i e fa’apea, mai le tele o tausaga le nofoaiga a Senatoa ma Faipule ua mavae atu, na leai lava ni lafoga o le FICA ma le medicare na aveesea mai a latou siaki, ae na fa’atoa faia lava le suiga lea ina ua avea le tofa Velega Savali ma teutupe, e aunoa ma le fa’amalamalamaina mai i afioga i Senatoa ma Faipule o le uiga o lenei suiga, ae na te’i lava ua tipi siaki a le Fono.

 

Na taua fo’i e Gaoteote e fa’apea, ana fa’apea o tupe ia ua tipi ese mai i siaki a afioga i Senatoa o loo aoga mo le faigamalo a le atunu’u, o se tulaga lelei lena mo i latou, ae o le itu e fa’anoanoa ai, ona o lea ua tei ai lava ua manuia ai le feterale, ae o tupe o alauni e maua mai i tupe lotoifale.

 

“O le fautuaga i lau susuga a le Teutupe, taofi loa le toe tipi o tupe mai siaki a afioga i Senatoa, tu’u mai e faitalia lava le Toeaina ia ma faila lana ripoti pe a uma le tausaga, ona o loo malamalama fo’i matou i le faitauina o le tulafono, e leai ni lafoga e tipi mai siaki o a matou alauni”, o le saunoaga fa’ai’u lea a Gaoteote.