Ads by Google Ads by Google

Fa’amanatu le atoaga o le 113 tausaga o le fu’a a Manu’a i Malaetele


Ta’ita’i o Manu’a, le afioga i le Kovana o le Falelima ia Laolagi Fonoti Savali Vaeao, ma le afioga i le Senatoa ia Misaalefua J. Hudson. [ata AF]
ausage@samoanews.com

O le aso Gafua o le vaiaso fou, Iulai 17, 2017 ua fa’atulaga i le kalena a le malo o Amerika Samoa, e fa’ataunu’uina ai sauniga mo le fa’amanatuina o le 113 tausaga talu ona sainia le feagaiga i le va o le Iunaite Setete o Amerika ma le itumalo o Manu’a, i le malae o Malaetele i Si’ufaga i Ta’u i Manu’a.

 

O le fonotaga a le Kapeneta i le vaiaso nei, na fa’amaonia ai e le Kovana o le Falelima i Manu’a fuafuaga uma mo le fu’a a Manu’a, le afioga i le Fa’atui ia Laolagi Fonoti Savali Vaeao.

 

O le polokalame e pei ona fa’alauiloa e Laolagi i luma o le Kapeneta, e aofia ai le malaga atu lea o Ta’ita’i o le malo i le taeao o le aso Gafua, mo le molimauina o lenei aso taua mo tagatanu’u uma o Manu’a.

 

O le polokalame e pei ona fuafuaina e aofia ai le sisiina lea o le fu’a i Malaetele, pe a mae’a se sauniga lotu e saunia lava e le aufaigaluega a le Atua i Manu’a, atoa ai ma se taumafataga mo ta’ita’i o le malo ma le itumalo atoa, ma toe malaga mai ai loa lea o ta’ita’i o le malo i Tutuila nei i le aoauli o le aso Gafua lava lea.

 

O le a aofia ai fo’i ma nai fa’afiafiaga ua saunia lava e le itumalo, mo le fa’amoemoe e saga fa’amatagofie atili ai le aso fiafia mo Manu’a.

 

O isi ta’ita’i o le malo e pei o sui o le Kapeneta ma tagata Manu’a o loo alala i Tutuila nei e fia auai i lenei aso taua, o le a malaga atu i le va’a o le MV Sili i le fa’aiuga o le vaiaso, ma le fa’amoemoe a mae’a le sauniga o le fu’a i Manu’a, ona toe malaga mai ai fo’i lea o i latou uma pe a toe fo’i mai le va’a i Tutuila nei.

 

I le aso na tatalaina ai le Ofisa Tutotonu a le malo i Ofu, na taua ai e le afioga i le ali’i kovana ia Lolo Matalasi Moliga i tagata o le itumalo o Manu’a na auai i le molimauina o lea fa’amoemoe taua, le i ai lea o le fuafuaga a le malo e fa’amanatuina le fu’a o Manu’a i lenei tausaga.

 

Mai le tele o folafolaga sa tu’uina atu e le ali’i kovana i tagatanu’u o lona itumalo o Manu’a, sa ia taua ai e fa’apea, e ui i le utiuti o le fa’asoa atoa ai ma le itu tau tupe a le malo i le taimi nei, e le tatau ai lava ona taofia le fa’ataunu’uina o fuafuaga e tatau ona fa’ataunu’uina mo le itumalo, ina ia maua ai e tupulaga talavou le avanoa latou te molimauina ai nei sauniga taua.

 

Sa talosagaina e le sui fofoga fetalai o le maota o sui ia Fetui Fetu Jr i le vaiaso nei le Fofoga Fetalai, mo se avanoa e totogi tasi ai e le Fono pasese o Faipule uma o le maota o sui, ina ia mafai ai ona malaga atu e molimauina le fa’amanatuina o le fu’a a Manu’a i lenei tausaga.

 

Na taua e le afioga i le ali’i faipule mai Fitiuta ia Fetui e fa’apea, o le taua o aso fa’amanatu fa’apenei, e le gata e lagona ai e tagata o le itumalo o Manu’a le lototele pe a fa’atasi uma atu ta’ita’i o le malo, ae o se avanoa lelei fo’i lea e mafai ai ona feiloa’i ma fetufa’i sui o le itumalo ma ta’ita’i o le malo i ona tafa e tolu.

 

Ona o le Aso o Manu’a, o lea ua avea ai le Aso Gafua o le aso malolo a le faigamalo o Amerika Samoa.