Ua aloaia nei suiga a le maota o sui i le pili tupe na talosagaina e le faigamalo a Lolo ma Lemanu, mo le tulafono e aiaia ai se lafoga fou mo meainu suamalie e le aava, ma fa’asolosolo ai ona soloia le lafoga oloa 5%.

O le fa’aiuga e aloaia ai suiga a afioga i Faipule, na alia’e mai ina ua talia e maota e lua le ripoti a le Komiti Teuteu a maota e lua, ina ia aloaia suiga a le maota o sui i le pili na pasia e le senate i le vaiaso na te’a nei.

Na pasia e le Senate le latou tulafono fa’atasi ma suiga, ina ia si’i i le 10% le lafoga oloa i luga o le uafu, peita’i na toe sui e le maota o sui i le 8%.

O se tasi o suiga, o le aveesea lea o le 2 pasene o le lafoga totogi e tagata faigaluega.

O suiga ia na mafua ai loa ona tofia Komiti Teuteu a maota e lua, mo le talanoaina o suiga a le maota o sui. O le Komiti Teuteu a le Senate e aofia ai Tuaolo M. Fruean, Nuanuaolefeagaiga S. Nua ma Magalei Logovi’i. O le Komiti Teuteu a le maota o sui e aofia ai Toeaina Faufano Autele, Lavea Legae’e Palepoi Mauga, ma Vailiuama S. Leasiolagi.

I le mae’a ai o le feiloaiga a Komiti Teuteu sa faia i le maota maualuga, na talia ai loa suiga a le maota o sui, ina ia tu’u i le 8% le maualuga o le lafoga oloa.

O le taeao o le aso Tofi lea na fa’atoa pasia aloaia ai e le maota o sui le ripoti a le Komiti Teuteu, ae o le aso Lulu na talia ai e le Senate le ripoti, ina ua fa’alauiloa i le taimi o le latou tauaofiaga masani.

I le fa’alauiloaina ai o le ripoti a le Komiti Teuteu i luma o le maota o sui, na taua ai e le afioga a Toeaina le taua tele o le finagalo o afioga i Faipule ina ia tu’u mai i lalo i le 8% le lafoga oloa, ona o le vaai alofa i pisinisi ma le atunu’u.

“O le agaga atoa o le maota o sui, e le gata ia maua sina tupe mo le malo, e fesoasoani ai i lana auaunaga, a ia aua fo’i ne’i mamafa le avega e fa’aoo atu e pisinisi i tagata fa’atau. I lo’u talitonuga, ua talafeagai le lafoga e 8% lea ua pasia e fesoasoani ai i le malo i le lumana’i, ae o isi pili tupe e pei ona talosagaina e aofia ai le lafoga o oloa e 7%, e sili pe a fa’ataoto pea seia aulia se isi taimi talafeagai,” o le saunoaga lea a Toeaina.

Saunoa Vailiuama e fa’apea, e le fesiligia le naunau o le Fono Faitulafono e saili ni auala e fesoasoani ai i le itu tau tupe a le malo, ae tatau fo’i ona silasila toto’a Faipule ma Senatoa i auala e fesoasoani ai i le atina’eina o pisinisi i le atunu’u.

“O pisinisi, o le ivi tu lea o le manuia o le tamaoaiga o le malo, afai e fa’aletonu le atina’e o pisinisi, o le a fa’aletonu fo’i tupe maua a le malo, ma a’afia atu ai ma galuega a tagata lautele. Ou te fa’afetai atu i le maota ona o le tofa ua sasa’a, lea ua mafua ai ona tatou faia lenei fa’aiuga lelei ma sa’o mo le atunu’u,” o le saunoaga lea a Vailiuama.

Na fa’afetaia e le sui fofoga fetalai o le maota, afioga Fetui Fetu Jr sui o le Komiti Teuteu a le maota o sui, i lo latou finau malosi lea e fa’aaoga suiga sa fitaituga i ai le maota i le taimi o a latou iloiloga.

Saunoa atili Fetui e fa’apea, o le tiute o le Fono Faitulafono, o le silasila i auala e manuia ai le malo, atoa ai ma auala e manuia ai pisinisi ma le atunu’u atoa.