Ads by Google Ads by Google

To’atolu ua molia fa’aaoga fa’asolitulafono pepa ‘ai mai Food Stamp


[ata: SN]
ausage@samoanews.com

O le mataupu e pei ona molia ai ni tagata se to’atolu i lo latou faaaoga fa’asolitulafono pepa ‘ai mai le polokalame o le Food Stamp a le Matagaluega o Auaunaga ma Tautua Lautele a le malo (DHSS), ua maua ai e le Ofisa o Leoleo mai a latou su’esu’ega le tele o fa’amatalaga eseese e uiga i lenei mataupu.

 

O i latou e to’atolu ua molia i lenei mataupu e aofia ai tagata faigaluega e to’alua a le DHSS, o le ali’i o Vincent Toeava ma le tama’ita’i o Jane Vasa, fa’apea ai le ali’i Faipisinisi Asia o Liren Zhang, poo Kevin fo’i e pei ona iloa ai o ia e le to’atele.

 

E $10,000 lea ua fa’atulaga e totogi ona fa’atoa mafai lea ona tatala Vasa i tua mai le toese i Tafuna, ae ta’i $450,000 mo Toeava ma Zhang. O lo o taofia pea i latou uma nei e to’atolu i le Falepuipui i Tafuna.

 

O le toe fa’aauauina lenei o le ripoti a le Samoa News sa auina atu i le aso ananafi, e tusa ai o suesuega a Leoleo e uiga i lenei mataupu.

 

Na faamatala e Zhang i Leoleo e fa’apea, i se taimi o le masina o Setema 2017, na aga’i atu ai Toeava i le faleoloa o Zhang, le JFL Malae Store i Vailoa ma le anoanoa’i o pepa ‘ai mai le Food Stamp (food coupons), o lo o tusia ai i luga o pepa ‘ai nei igoa o isi Faleoloa.

 

Na fa’atonu e Toeava ia Zhang e fesoasoani atu ia te ia i le tape eseina lea o igoa o isi Faleoloa o lo o tusia i luga o pepa ‘ai eseese uma nei, ae tusi ai le igoa o lana Faleoloa, le ‘JFL Malae Store’, ona alu lea e ave i le Faletupe ina ia maua mai ai se tupe. Na fai fo’i Toeava ia Zhang, la te vaelua tutusa i le tupe e maua mai i pepa ‘ai nei.

 

Na taua e Zhang i Leoleo lona popole i le tulaga e pei ona fai atu ai Toeava ia te ia, ae ina ua toe fa’apea atu Toeava ia te ia, e aua le popole i se mea e tasi, o le a faitalia lava ‘Papa Meki’ (Taeaoafua Dr. Meki Solomona) ma fesoasoani atu ia tei laua, na te’a ese ai loa le popole o Zhang ma ia fesoasoani ai i le fa’atinoina o lenei gaioiga fa’asolitulafono, lea na mafai ai ona la maua le tupe e $86,854.00.

 

Na alu Zhang ma momoli pepa ‘ai ia ua uma ona la toe suia igoa i le pito i luga i le Faletupe o le ANZ Bank, ma fa’atino tulaga uma e pei ona masani ai, o le teuina lea i le teutupe ma le fa’amoemoe ina ia maua mai ai le tupe e $86,854.00. E lei taliaina e le Faletupe pepa ‘ai sa auina atu e Zhang, ona o suiga e pei ona faia i luga o pepa.

 

Na fa’ailoa e Zhang ia Toeava le fa’afitauli ua tula’i mai, i le le taliaina lea e le Faletupe o pepa ‘ai na alu atu ma ia, ma fa’atonuina ai loa e Toeava ia Zhang e fa’atali mai pea i le Faletupe, ae sei taumafai e saili se auala e maua ai se fesoasoani mo i laua.

 

E lei umi ae vaaia e Zhang ia Toeava ua savali atu i totonu o le Faletupe o le ANZ Bank ma se tusi o lo o u’u i lona lima. E le i umi ae toe vaaia e Zhang ia Toeava ua ulufafo mai ma le Faletupe, ma ia fa’atonuina loa o ia e tago i le taga o lo o i ai pepa ‘ai na teena e le Faletupe e toe ave i totonu o le Faletupe, ma sauni e talia le tupe o le a totogi atu e le Faletupe ia te ia.

 

Na alu Zhang i totonu o le Faletupe ma le taga o lo o i ai pepa ‘ai ma toe ave i totonu o le Faletupe, ae fo’i mai i fafo ma le tupe e $86,854.00 i lona lima.

 

Na maua i suesuega a Leoleo, o le tusi lea na alu atu ma Toeava ma ave i le Faletupe, o se tusi sa fa’agaoi lona faia. Sa ia faamalosi fo’i ona saini ai le suafa o le Ta’ita’i o le Polokalame a le Food Stamp. E lei fa’aaogaina fo’i i le pepa na tusia ai le tusi se faailoga a le Ofisa o le DHSS (letterhead).

 

O upu ia o le tusi na alu ma Toeava i le Faletupe ina ia mafai ai ona talia pepa ‘ai na alu atu ma Zhang, ma totogi mai ai e le Faletupe le tupe e pei ona la mauaina:

 

E fia fa’ailoa atu fa’amolemole, o le ali’i faipisinisi o lo o alu atu ma pepa ‘ai mai le polokalame a le Food Stamp, ua mae’a ona fa’amaonia i a matou suesuega tulaga uma e uiga i pepa ‘ai o lo o alu atu ma ia. Sa matou su’esu’eina ma le toto’a vaega uma o lo o tusia i luga o pepa ‘ai ta’itasi, ma fa’amaonia ai tulaga uma o lo o lelei ma fa’amaoni. Ua uma fo’i ona matou telefoni i tagata ta’itasi e ana pepa ‘ai na alu atu ma le ali’i Faipisinisi, ma ua latou fa’amaonia mai fo’i i le matou Ofisa, sa latou fa’atau mai taumafa ma oloa i faleoloa a le ali’i Faipisinisi lena. O le mea lea e talosaga atu ai fa’amolemole, ina ia talia pepa ‘ai e pei ona alu atu ma le ali’i Faipisinisi lena. Afai e i ai ni isi tulaga e fiamalamalama atili ai i lenei mataupu, fa’amolemole fa’afeso’ota’i le ali’i Pule i le vaega o le polokalame ia Vincent Toeava i le telefoni 254-7753”.

 

Talu mai lava le taimi lea, e lei toe misi le aga’i atu o le ali’i Faipisinisi o Zhang i le Faletupe ma le taga e tumu i pepa ‘ai, ma maua mai ai le faitau afe ma afe o tupe i masina ta’itasi.

 

I le vaiaso mulimuli o Setema 2017, na faia ai galuega a le DHSS mo le toe fa’afouina o le pusa o lo o teu ai pepa ‘ai i totonu o le polokalame a le Food Stamp. I lea gaiogia, sa maitauina ai le tele o pusa o pepa ‘ai sa teu i totonu o le pusa ua leaga ma ua sao i ai le vai, ma faia ai loa le fa’aiuga ina ia lafoa’i uma i le lapisi pusa uma nei.

 

O le aso Lua o le vaiaso fou lea ua fa’amoemoe e tu’uina atu ai le vaega mulimuli o lenei ripoti e tusa ai o lenei mataupu.