Ads by Google Ads by Google

Vaiaso Potu Suesue Fa’afoma'I i le LBJ Medical Center ma le Matagaluega o le Soifua Maloloina


O nisi fo’i o le aufaigaluega o lo’o galulue i le isi vaega o le potu suesue fa’afoma’i i le LBJ Medical Center ma ua faia galuega e tusa o le fa’atonuga i la’ei ma mea e fa’aaogaina ina ia mataituina le mama a’ia’i o suesuega e fa’alagolago i ai togafitiga a Foma’i i taimi uma. [ata: Leua Aiono Frost]

Ua laugatasia le Potu Suesue Fa’afoma’i a le Matagaluega o le Soifua Maloloina ma le Potu o Suesuega Fa’afoma’i a le falema’i LBJ i Fagaalu i le fa’amanatuina o le latou vaiaso lenei e taualoa ai le latou galuega ma le tautua aoga tele i togafitiga o gasegase o le mamalu lautele o le atunuu.

 

I le Potu Suesue i le LBJ ua fa’afaigaluega ai le to’a 50 o tagata faigaluega e eseese fo’i o latou matata e fa’atino, ma e tolu sifi e tatau lava ona fesuia’i i ai lenei tautua i le aso e tasi, ina ia tumau le mata’alia ma lona fa’ataunuuiina tonu o galuega a i latou i taimi uma.

 

O le ua avea ma fa’atonu o lea itu o le falema’i o Dr. Amor Gonzales, ma le ua avea ma Pule o le galuega o Lamanda Ioane.

 

O vaega ua aofia i totonu o le Potu o Suesuega Fa’afoma’i i lona atoaga o le tautua e ao ina fa’ataunu’u i aso ta’itasi pe a talosagaina e alii ma tamaitai foma’i e iva lelei: E amata mai i le Phlebotomist; Hemotology; Chemistry; Blood Bank; Serology; MIcrobiology; Histology/Cytology; POC Point of Care ma le Fale Maliu [ Morgue].

 

Ma ua mae’a a’otauina i latou mo le tautuaina o le mamalu o le atunuu e ala i suesuega tatau e mana’omia mai e foma’i ona faia mo se tali maumaututu i gasegase ma auga o gasegase o maua ai i latou ma faia ai fa’aiuga o latou togafitiga.

 

O le vaiaso o Aperila 20 se’ia oo ia Aperila 25, ua avea ma vaitaimi e faataua ai le latou fo’i auaunaga aoga i totonu o le Iunaite Setete ma Teritori uma o Amerika, ua fa’ailoa mai ai e le tamaita’i o Annette Fa’alevao Ilimaleota, “O le agaga fiafia tele e faia ai lenei tautua e aoga i o tatou tagata lautele ae maise i latou ua fa’agasegasea ma ua sulu mai i alii ma tamaita’i foma’i ia maua se togafitiga ina ia toe malolosi i latou.”

 

“Fa’afetai fo’i mo fe’au fa’amanuia mai le atunuu ma ta’ta’i o le tatou malo, peita’i o le fa’amanuiaga mai le Atua e sili lava ona mana’omia i lenei galuega, ina maua le malosi ae maise o le mafaufau tonu ma le atamai fa’apitoa ina ia fa’aauau ai tiute ma tapena le tagata ia fa’aleleia atili tomai aua le tautua ia fa’aauau pea,” o se toe tala lea a Ilimaleota.