Ads by Google Ads by Google

Tu’ua’i Komesina o Leoleo le au Tusitala i lo latou mimilo sese o ana saunoaga


Komesina o Leoleo, tofa Le’i Sonny Thompson [ata AF]
ausage@samoanews.com

Pago Pago, AMERIKA SAMOA

 

E le o se taimi muamua lea ua tu’uaia ai e le Komesina o Leoleo le vaega o Tusitala i le atunuu i lo latou mimiloa lea o le  moni ma le sa’o o le tele o ana saunoaga o lo o fai i luma o le Maota o Sui. Talu ai le mimilo sese e le au fa’asalalau o ana saunoaga, na taua ai e le tofa Le’i Sonny Thompson, ua mafua ai loa ona fai fai upu le atunuu ma lalafo faamatalaga le moni faasaga i ali’i ma tama’ita’i Leoleo.

 

O le vaiaso na te’a nei na molimau ai Le’i ma le Faatonusili o le Matagaluega o le Puipuiga o le Saogalemu Lotoifale ia Alfonzo Pete Galea’i i luma o le Komiti o le Puipuiga o le Saogalemu Lautele a le Maota o Sui, mo le talanoaina o mataupu e faatatau i malaga a va’a alia i le va o Auasi ma Aunu’u.

 

Ina ua maua le avanoa o le Komiti e fesiligia ai moilmau, na fesiligia ai loa e le Sui Fofoga Fetalai ia Fetu Fetui Jr nisi o mataupu e faatatau i le auaunaga a le Ofisa o Leoleo. 

 

Na fesili Fetui Jr i le Komesina o Leoleo, pe moni ripoti ua oo atu i lona Ofisa e faatatau i tagata e to’a 10 e le’i pasia le suega o fualaau faasaina, ae o lo o talia pea lava i totonu o le Aoga Faaleoleo o loo faagasolo i le taimi nei. Saunoa Fetui Jr e faapea, afai e moni lea ripoti, o se tulaga e matua lagona ai lava lona fa’anoanoa.

 

Sa ia fesiligia fo’i le Komesina o Leoleo i se faasea mai se tasi o alii na pasi i le suega Faa Leoleo, peita’i ua le mafai ona maua sona avanoa e auai ai i le Aoga Faa Leoleo. Sa fia malamalama le Sui Fofoga Fetalai pe moni lea tulaga pe leai ai.

 

A o le i maua le avanoa e tali fuaitau ai le Komesina o Leoleo i mataupu na fesiligia e le Sui Fofoga Fetalai, na muamua fa’aali e Le’i lona lagona le fiafia i le ese o mataupu ua fesiligia ai o ia, ese le mataupu na mafua ai ona oo mai i luma o le Komiti e moilmau.

 

Sa ia saunoa i sui o le Komiti e faapea, afai e i ai se afioga i se Faipule e i ai ni mataupu e faatatau i le auaunaga a le Fale Leoleo e fia malamalama ai, e sili pe a telefoni atu i lona Ofisa, ona mafai ai fo’i lea ona ia tali sa’o mai i luga o le telefoni. A le o lena fo’i, tu’u atu se taimi na te suesueina ai lea mataupu, ona tuu mai aloaia lea o sana tali e ala i se tusi e saini ai lona suafa, ma tau aao sa’o atu lava i le Faipule, nai lo le laga o mataupu faapea i totonu o le maota a o faafofoga le “au faitala” o le atunu’u, poo le au fa’asalalau.

 

O le faanoanoaga o le Komesina e pei ona ia taua, e ese lana tala e avatu i luma o le komiti, ae oo atu le tala i le atunuu e ala atu i le au faasalalau, “ua matua ese lava le lalolagi o fa’amatalaga ia e fai iinei”, ona afaina ai lava lea o le Matagaluega o Leoleo i lea aso ma lea aso, o lea masina ma lea masina, ma lalafo ai e tagata upu mataga faasaga i Leoleo, a o i latou fo’i o alo ma fanau pele a le atunu’u.

 

I le tulaga o suega mo fualaau faasaina, na matua teena e Le’i ripoti o loo i ai tagata e to’a 10 e lei pasia le suega o fualaau faasaina ae o loo i ai i le Aoga Faa Leoleo. 

 

I le talanoaina ai o le mataupu i le Aoga Faa Leoleo, na toe oo ai le saunoaga a Le’i e faatatau i lana ulua’i saunoaga sa faia i luma o le Komiti i le masina na te’a nei e fa’atatau i le aofa’i o tagata na pasia le suega Faa Leoleo. Sa ia tu’uaia ai fo’i le Au Faasalalau a le atunuu i le le sa’o o le ripoti sa latou faasalalauina e faatatau i lana ulua’i saunoaga. 

 

Saunoa Le’i e faapea, e pei ona masani ai i soo se suega lava, o le togi e tatau ona pasi ai le tagata e 70%. 

 

I le suega Faa Leoleo sa faia, o i latou uma lava e lei pasi le suega, na mafai ona fesiligia ma faatalatalanoa, ma o latou iloa ai, o i latou o ni tagata atamamai tele ma popoto, e ui ua le pasi le suega. 

 

“E ui lava i le to’atele o i latou e le i pasia le suega e ulufale atu ai i le Aoga Faa Leoleo, ae o le mea moni lava e tatau ona manatua, o ni tagata e atamamai tele i latou nei, e lava fo’i le uta ma le tofa latou te faia ai faaiuga lelei i le olaga,” o le saunoaga lea a Le’i.

 

Saunoa atili Le’i e faapea, o le toatele fo’i o tagata na o atu e su’e i le susega ulufale mo le Aoga Faa Leoleo, e lei sue ona e fia Leoleo, ae na sue ona o le fia maua o ni galuega. E ui la e lei pasia nisi i le suega ulufale, ae na taua e Le’i suega o loo faaauau pea ona faia i totonu o le 5 masina o loo faagasolo ai aoaoga, ma, e i ai le talitonuga e tatau ona pasia uma i latou i le suega faai’u a o le i tapunia le Aoga Faa Leoleo.

 

“E le i mae’a le Aoga Faa Leoleo ae o lo o fa’aauau pea lava i le taimi nei, i lalo o le taitaiga a Leoleo ua silia i le ta’i 20 tausaga o galulue i le galuega, ae ua oo lava fo’i i koleniga a Leoleo, ua lalau mai ai lea tala ma lea tala ma fai mai ai o “Leoleo Puputa” ma isi lava mau upu e faalumaluma ai ali’i ma tamaita’i Leoleo,” o le saunoaga lea a Le’i. 

 

I le mataupu i le gagana le fa’aaloalo o lo o fa’aaoga e Leoleo i le va feagai ma le atunu’u, na faamalulu Le’i i le Komiti pe afai o i ai se tulaga faapea o tula’i mai. Ae o lana molimau, o taeao uma lava e fai lotu atu i le nofoaga o lo o faia ai le Aoga Faa Leoleo, ma ia faamanatu i ali’i ma tamaitai le ava fatafata e tatau ona faaaoga pe a feiloa’i ma le atunu’u.

 

Saunoa le Sui Fofoga Fetalai e faapea, i lona lava talitonuga, e leai se mea e tau natia ai fua mataupu e talanoaina i totonu o le Maota o le atunu’u. 

 

Saunoa le afioga i le ali’i Faipule ia Timusa Tini Lam Yuen e faapea, na te le lagolagoina le saunoaga a Le’i fai mai, tusa lava pe lei pasi le tagata i le suega e ulufale atu ai i le Aoga Faa Leoleo, ae ua latou tuua ai lava le avanoa e auai i le Aoga. I le talitonuga o Timusa, e tatau lava ona toe ave e i latou uma e le’i pasia le suega ulufale ina ia talafeagai le avea o i latou ma Leoleo o le malo tulaga o le pasia o le suega ulufale.

 

“I lo’u lava talitonuga, e le tatau ona Leoleo le tagata e le i pasia le suega ulufale, e le tatau fo’i ona alu lea tagata e feagai ma le atunu’u, ae mafai lava ona tu’u i isi galuega i totonu o le Ofisa o Leoleo, leaga o le tofiga o le Leoleo e fai lava si maualuga ma taua i le malo,” o le saunoaga lea a Tinusa.

 

Na lagolagoina e Fetui Jr le saunoaga a Timusa. Sa ia taua e faapea, i taimi sa galue ai o se Leoleo, sa sili ona maualuga i lona mafaufau le galuega Faa Leoleo, o le mafua’aga fo’i lena e ili tata ai lava lona taofi ae faaletonu se gaioiga a se alii poo se tamaitai Leoleo e faatino i luga o le alatele. 

 

Na faafetaia e le afioga a Gafatasi Afalava le faamaoni o nisi o Leoleo i le faatinoina o latou tiute, e mafua lea ona o le taimi na taofi ai e Leoleo lana ta’avale ma faatonu o ia i lona le usitaia o le Tulafono i luga o le alatele, ae i le taimi o le latou talanoaga ma Leoleo, sa ia molimauina ai le fa’aaloalo o le gagana na fa’aaoga e nei ali’i Leoleo, atoa ai ma le avanoa na tuu atu ia te ia e alu ai e faafou le pepa o lana ta’avale ua mae’a le aoga.

 

E faapena fo’i le saunoaga a le afioga a Vailiuama Steve Leasiolagi, sa ia taua fo’i ni ali’i Leoleo se to’alua na te maitauina pea le galulue malosi i luga o le alatele i le tele o taimi o le aso. 

 

Na lagolagoina e le Faipule mai Manu’a #2 ia Tiaoalii Fau Sai le saunoaga a le Komesina, e ese lava mataupu e aoao atu ai fanau, ese fo’i uiga ma tala latou te faia i luga o le alatele. Ui o lea, na faafetaia e Tiaoalii le auaunaga a ali’i ma tama’ita’i Leoleo mo le puipuia o le atunu’u.