Ads by Google Ads by Google

Tofu Fa’amasinoga Maualuga mataupu fa’asaga ia Siaumau Jr ma Va’avale


[ata: foa'i]
ausage@samoanews.com

Ua tofu atu nei i le Fa’amasinoga Maualuga le mataupu o lo o tu’uaia ai ni ali’i se to’alua mai Petesa i le umia faasolitulafono o vaega o fualaau fa’asaina, ina ua fa’amalieina le Fa’amasinoga Fa’aitumalo i mau sa tu’uina atu e le malo e lagolago ai le latou tagi fa’asaga ia te i laua.

 

Na taua e le afioga i le ali’i Fa’amasino ia Elvis P. Patea i le taimi na fa’ataunuu ai le ulua’i iloiloga o le mataupu a Elliott Siaumau Jr ma Eddieboy Va’avale i le vaiaso na te’a nei e fa’apea, ua manino i mau sa folasia e le malo le maua ai e Leoleo o fualaau fa’asaina i le taimi na latou osofaia ai le fale o Siaumau Jr i le aso 12 o Iulai, 2019.

 

O le aso Faraile na te’a nei na tutula’i ai Siaumau Jr ma Va’avale i luma o le Fa’amasinoga Maualuga, ma la teena ai tu’uaiga fa’asaga ia te i laua.

 

O lo o molia Siaumau Jr i moliaga mamafa e 2, e aofia ai le umia faasolitulafono o vaega o le pauta fa’asaina o le aisa ma le fa’amoemoe e tulei ma fa’atau atu i isi tagata, atoa ai ma le moliaga o le umia faasolitulafono o vaega o le pauta fa’asaina o le aisa. Ae o le susuga a Va’avale, o lo o tu’uaia o ia i le moliaga mamafa e tasi, o lona umia fa’asolitulafono lea o vaega o le pauta fa’asaina o le aisa.

 

E $50,000 le tupe lea ua fa’atulaga e le Fa’amasinoga e tatala ai i tua Siaumau Jr ae $30,000 mo Va’avale.

 

O le tama’ita’i loia sili lagolago ia Christy Dunn na tula’i mo le malo i le taimi o le ulua’i iloiloga o lenei mataupu, ae o le tama’ita’i loia fautua lagolago ia Anna Whiles na tula’i mo i laua ua molia.

 

E to’atasi le molimau na valaau e le malo i le taimi o le iloiloga, o le susuga lea i le ali’i Leoleo Suesue ia Det. Justin Thomsen, o ia fo’i lea na autu i ai le suesueina o lenei mataupu.

 

Na taua e Thomsen i lana molimau e fa’apea, i le aoauli o le aso 12 o Iulai 2019 na aga’i atu ai se vaega toatele o Leoleo e fa’ataunu’u le poloaiga a le Fa’amasinoga, e su’e ma saili ai le nofoaga o le aiga o Siaumau i Petesa, mo le tau sailia o le ali’i pagota o Thomas Siaumau sa sola i tua ma le toese i Tafuna, atoa ai ma le tuuina atu o se tusi saisai mo Elliott Jr, ona o se isi fo’i mataupu e pei ona tu’uaia ai o ia.

 

Ina ua taunu’u Leoleo i totonu o le nofoaga o le aiga o Siaumau, sa aga’i loa Leoleo i le pito i tua o le fale o loo i ai le Fale Inisinia.

 

Na taua e Thomsen i lana molimau e fa’apea, ina ua oo atu lana savali i le tulimanu pito i tua o le fale e faafesaga’i ma le tulaga tonu o lo o i ai le Fale Inisinia, sa ia vaaia ai loa ni ali’i o loo faia sa latou faapotopotoga i le vaega tonu o lo o i ai le Fale Inisinia.

 

Na taua e Thomsen i lana molimau e fa’apea, na te iloaina ni isi o ali’i sa i ai i le faapotopotoga lea, e aofia ai Elliott Jr; Vaavale; Samatua Logoai ma Toenuti Oloaga.

 

Na fesili Dunn i le molimau pe faapefea ona ia iloaina i latou nei e to’afa. Na tali le molimau fai mai, e masani ia Siaumau Jr ona o le tele o mataupu e masani ona latou taofia faapagota ai o ia ona o solitulafono eseese o lo o faia faasaga ia te ia; o le susuga a Va’avale, e masani ai ona o ripoti e faapea o ia le isi tagata o lo o tuleiina fualaau fa’asaina mai le nofoaga o le Le Aute; o le susuga a Oloaga, o lo o i ai ripoti e faapea o ia le isi tagata o loo tuleiina mai le pauta o le aisa mai le nofoaga i Logotaga, ae o le susuga a Logoai, na te iloa o ia mai le nofoaga o lo o galue ai i le Uafu i Fagatogo.

 

Na taua e Thomsen le vaaia o foliga le mautonu o i latou nei ina ua fa’afuase’i ona aga’i atu le latou osofaiga, ae sa sili ai lava foliga le mautonu o Elliott Jr ma Va’avale. A o aga’i atu Leoleo i le nofoaga o lo o talatalanoa mai ai ali’i nei e to’afa, na vaaia e se tasi o Leoleo le taumafai o le ali’i o Va’avale e una’i i lona vae se ato uliuli i lalo o le laulau o lo o latou talatalanoa ai.

 

Na vave gaioiga a Leoleo ma mafai ai loa ona aveese mai le ato uliuli lea na taumafai 
Va’avale e una’i i lalo o le laulau.

 

O le taimi fo’i lea na fa’atonuina ai loa e Leoleo ali’i uma nei e to’afa e aua nei minoi se tasi, a ia nonofo pea i le vaega o lo o i ai ma tu’u uma o latou lima i luga o latou ulu. Sa vaaia le usita’i uma o i latou nei i le fa’atonuga.

 

O le mae’a ai ona fa’atinoina o galuega a Leoleo, atoa ai ma le taofia o ali’i e to’afa i lalo o le vaavaaiga a Leoleo, na auina atu ai loa i latou uma nei i le Ofisa o Leoleo i Tafuna mo suesuega, fa’atasi ai ma le ato uliuli lea sa maua mai ai i lea nofoaga na fa’atinoina ai le osofaiga.

 

O mea sa i totonu o le ato uliuli e aofia ai tama’i pepa iila laiti e 48 ua uma ona utu i ai le pauta pa’epa’e i totonu; e 2 isi taga lapopo’a o lo o i ai tama’i pepa iila laiti e 25 ua uma ona utu i ai le pauta pa’epa’e i totonu; e 2 isi pepa iila feololo o loo i ai fo’i i totonu vaega o le pauta pa’epa’e. Sa fa’apea fo’i ona maua ai ma se tinoitupe e $360 i le tino o le susuga a Elliott Jr.

 

O vaega o le pauta pa’epa’e sa maua i totonu o pepa iila laiti nei, na faia i ai se suega faapitoa a Leoleo, ma fa’amaonia ai loa, o vaega nei o le pauta fa’asaina o le aisa (methmaphetamine).

 

Ina ua fesiligia e Leoleo ia Va’avale, sa ia taua ai e fa’apea, o le ato uliuli sa uu e Elliott Jr i le taimi o le latou talanoa. Ae ina ua fa’afuase’i ona aga’i atu le osofaiga a Leoleo, sa tago ai loa Elliott Jr ma togi atu le ato ia te ia e nana. O lea na ia taumafai ai loa e fa’aaoga lona vae e una’i ai le ato i lalo o le laulau ina ia aua ai ne’i iloa e Leoleo.

 

Ae ina ua fesiligia Elliott Jr, sa ia ioeina ai e fa’apea, o ia e ana le ato uliuli, na avatu e totogi ai le fa’atinoina o ana galuega o lo o fa’agasolo, o le faia lea o ta’avale a tagata. Sa ia taua atili i Leoleo e fa’apea, ua atoa le vaiaso talu ona avatu le ato, peita’i na te lei siakiina lava poo a mea o lo o i ai i totonu.

 

Na fesili Dunn i le molimau pe na faapefea ona latou maua fa’amatalaga e fa’atatau i nei alii ma lo latou aafia ai i fualaau fa’asaina, ae na tali le molimau e fa’apea, e i ai nisi o loo latou galulue fa’atasi mo le tuuina atu o fa’amatalaga e fa’atatau i le aafia ai o i latou nei i le fa’atauina atu o fualaau fa’asaina.

 

Ina ua maua le avanoa e fesiligia ai e le itu tete’e le molimau a le malo, na fesili ai loa ia Whiles ia Thomsen, pe sa maua ni fualaau fa’asaina i le tino o ali’i ia e to’alua. Na tali le molimau e leai.

 

Na toe fesili Whiles i le molimau pe sa ia vaai o uu e Vaavale poo Siaumau Jr le ato lea o lo o tu’uaia na maua i ai vaega o le pauta fa’asaina o le aisa i totonu. Na tali le molimau, e leai.