Ads by Google Ads by Google

Toe molia se ali’i i lona faia o folafolaga tau fa’amata’u i lona tuaoi

ausage@samoanews.com

O le ali’i talavou lea na loka e Leoleo ma molia i le fa’atupu vevesi i le nofoaga o le Maketi i Fagatogo i le masina na te’a nei, na toe taofia faapagota fo’i o ia e Leoleo i le vaiaso na te’a nei ona o tu’uaiga i lona faia o ni folafolaga tau fa’amata’u i lona aiga tuaoi i Mapusaga Fou.

 

O loo tu’uaia e le malo le ali’i o Penheart Faumuina i moliaga mama e 4 e aofia ai le faatupu vevesi i nofoaga faitele, faaoolima i le tulaga tolu, faaleaga meatotino i le tulaga tolu, ma le le usita’i i le poloaiga a le fa’amasinoga.

 

O le amataga o le vaiaso nei na tula’i ai Faumuina i luma o le fa’amasinoga fa’aitumalo, ma ia teena ai tu’uaiga fa’asaga ia te ia. Ua toe tolopo nei lana mataupu e toe fofogaina i le fa’aiuga o le masina nei.

 

E $500 le tupe lea na fa’atulaga e le afioga i le ali’i fa’amasino ia Fiti Sunia e totogi ona fa’atoa mafai lea ona tatala le ua molia i tua, i lalo o tuutuuga e ao ona ia usita’i i ai. O ni isi o ia tuutuuga e aofia ai le faasa lea ona toe alu i le fanua ma le fale o le aiga na a’afia, faasa ona ia toe tagofia le ‘ava malosi, fa’asa ona taumafai e faafesootai molimau a le malo, a ia avea o ia ma tagatanu’u e tausisi i tulafono a le malo i aso uma.

 

O le ali’i loia fautua ia Ryan Anderson o loo tula’i mo Faumuina ae o le tama’ita’i loia sili lagolago ia Bianca Lherisson o loo tula’i mo le itu a le malo i lenei mataupu.

 

I faamaumauga a le fa’amasinoga o lo o taua ai e fa’apea, pe tusa o le itula e 1:20 i le vaveao o le aso Sa na te’a nei, Iulai 29, 2018, na logo ai e se molimau le Ofisa o Leoleo i Tafuna mo se fesoasoani, ona o se tagata na ia tauai atu ma’a i luga o le latou fale, atoa ai ma le lafo atu o upu palauvale i le latou aiga.

 

O le isi ma’a na pau i le ogatotonu o le fale ae o le isi ma’a na a’afia ai le potu malolo. Ina ua aga’i mai tagata o le aiga na a’afia e vaai poo ai lea o loo faia lea uiga le manuia, ae latou vaaia ai le ua molia o loo fealua’i atu i fafo, ma valaau atu i tagata o le aiga, atoa ai ma le ee i luga ma fa’aumuumu.

 

E lei umi se taimi ae taunu’u Leoleo ma latou taumafai loa e pu’e fa’apagota le ua molia, peita’i na alu i le atoa le ua molia ina ia le mafai ai e Leoleo ona pu’e o ia. E lei umi se taimi ae maua loa o ia e Leoleo ma taumafai loa e loka ona lima. Ao taumafai Leoleo e loka lima o Faumuina, sa ia ee i luga ma faapea, “kakala loa a’u i kua ou ke fasiokia uma outou”.

 

Sa molimauina e Leoleo se manu’a i le ulu ma foliga o le ua molia. O lea manu’a na a’afia ai o ia ao le’i taunu’u atu Leoleo i le nofoaga na tula’i mai ai le fa’alavelave.

 

Na logo e Leoleo le Ofisa o le EMS mo se fesoasoani, aemaise ai togafitiga e manaomia mo le ua molia.

 

Na taua e le tama’ita’i na ia logoina Leoleo e fa’apea, na fa’ateia lo latou aiga ina ua tauai e se tagata le latou fale. O le ma’a lapo’a na tofu i totonu o le potu malolo, na mafua ai loa ona laga i fafo ona tuagane ma lona Tama e vaai poo ai, ae fa’ateia ina ua faalogoina le palauvale ane o le ua molia i lona Tama.

 

Ao taumafai ona tuagane e fesili atu i le ali’i ua molia pe aisea ua ia faia ai nei uiga, na fa’aauau pea ona lafo atu e le ua molia upu tau fa’amata’u i le latou aiga, ma folafola lona fasiotia o le latou aiga, e aofia ai ma le fa’aaoga o se agaese e ta tipi ai i latou.

 

Na taunu’u sui o le EMS i le Ofisa o Leoleo i Tafuna, ma faia ai loa le fautuaga ina ia ave le ua molia i le falema’i i Fagaalu mo nisi togafitiga, ona o le tulaga matuia o le manu’a o loo a’afia ai o ia.

 

E to’alua Leoleo na o i le momoliina o Faumuina i le falema’i mo togafitiga. Ina ua mae’a togafitiga ma ua uma fo’i ona vaai e le foma’i le ua molia, na fa’afuase’i ai ona vaaia e Leoleo le alu i le atoa o Faumuina ua sola. Na tuliloa e Leoleo ma maua ai o ia i le isi itu o le falema’i, ma auina atu ai loa o ia i le falepuipui e fa’atali ai le taimi e tula’i ai i luma o le fa’amasinoga fa’aitumalo.