Ads by Google Ads by Google

Toe a’afia i le tulafono se ali’i o lo o nofo vaavaaia


[ata: foa'i]
ausage@samoanews.com

O se ali’i e 45 tausaga le matua o lo o nofovaavaaia mo le 24 masina, e mafua mai i le fa’alavelave lea na ta’usala ai o ia e le Fa’amasinoga Fa’aitumalo i le tausaga na te’a nei, i lona fa’aoolima lea i ni tagata se to’alua e aofia ai se tamaititi e 12 tausaga le matua, ua toe aafia nei fo’i o ia i le tulafono ona o tu’uaiga i lona fa’aoolima lea i se isi fo’i alii i le vaiaso na te’a nei.

 

Na taua e le malo i le latou tagi ua mae’a nei ona fa’aulu i luma o le Fa’amasinoga, ina ua pu’e faapagota e Leoleo ia Tolai Afele, na maua i ai vaega o le pauta fa’asaina o le aisa ia te ia.

 

O le vaiaso na te’a nei na pu’e faapagota ai e Leoleo le susuga a Afele, ma tula’i ai loa o ia i luma o le Fa’amasinoga Fa’aitumalo mo lana ulua’i iloiloga.

 

Ua tu’uaia nei e le malo ia Afele i moliaga mamafa e 2 o le fa’aoolima i le tulaga lua, atoa ai ma le umia faasolitulafono o vaega o le pauta fa’asaina o le aisa. O lo o tu’uaia fo’i o ia i le moliaga o le fa’atupu vevesi i nofoaga faitele.

 

E $10,000 le vaega tupe lea ua fa’atulaga e totogi ona fa’atoa mafai lea ona tatala Afele i tua mai le toese i Tafuna. Ua poloaina Afele e le Fa’amasinoga, e le mafai ona ia toe taumafai e fa’afesoota’i molimau a le malo i soo se auala.

 

O le vaiaso nei lea ua fa’atulaga e fa’ataunu’u ai le ulua’i iloiloga o lenei mataupu i luma o le afioga i le ali’i Fa’amasino ia Elvis P. Patea.

 

E pei ona taua e le malo i le latou tagi e fa’apea, o lenei mataupu na tofu atu i le Ofisa o Leoleo i Tafuna, ina ua talosagaina e se ali’i le fesoasoani a Leoleo, ona o lana uo ua manu’a lona ulu e mafua mai ina ua fa’aoolima i ai le ua molia.

 

Na taua atili e le molimau i Leoleo e fa’apea, o le ali’i e igoa ia “STOLA” na ia faaaoga se fasi paipa u’amea e faaoo ai manu’a i lana uo, e ala i lona sasaina o lona ulu i luma o se faleoloa Asia i Nuuuli.

 

E to’atele Leoleo na aga’i atu e tali i le vala’au mo se fesoasoani. O le tagata e suafa ia STOLA e pei ona taua e le molimau i Leoleo, na mulimuli ane iloa, o lona suafa moni lava o Tolai Afele, o ia lea o lo o molia i lenei mataupu.

 

Na taua e se molimau i Leoleo, sa ia vaaia le taimi na tu’i ai e Afele le gutu o le ali’i na a’afia ma pau ai i lalo. Na mafai ona toe tula’i le ali’i na a’afia, ma sasau atu ai loa fo’i ma lana tu’i i foliga o Afele peita’i na misi lana tu’i.

 

O le taimi lea na tago atu ai loa Afele i se fasi paipa sa uu i lona lima ma sasa ai loa le ulu o le ali’i na a’afia ma manu’a tigaina ai o ia. Na taua e le molimau i Leoleo le palasi i lalo o le ali’i na a’afia ina ua sasa e Afele lona ulu i le paipa u’amea.

 

Ina ua mae’a ona fa’atino e le ua molia lea gaioiga, na oso ai loa i lana ta’avale ma aga’i e se atu loa.

 

E 2 itula talu ona tau sailia e Leoleo ia Afele ae latou maua loa o ia i le fale o lana uo, o lo o taaalo piliaki mai ai ma ni isi o ana uo, ma faia sa latou inuga pia i le vaega tonu o lo o fa’agasolo ai le latou taaloga piliati.

 

Na vaaia e Leoleo le taumafai o Afele e sola ese ina ua ia vaaia le aga’i fa’afuase’i atu o le ta’avale a Leoleo, peita’i na tuai gaioiga a le ua molia ae vave le oo atu o Leoleo ma fa’atonuina ai loa o ia latou te malaga ma Leoleo i le Ofisa i Tafuna mo le fa’atalatalanoaina o le mataupu e pei ona tu’uaia ai o ia.

 

Na vaaia e Leoleo foliga fefe ma le popole o Afele i le taimi lea. Sa vaaia fo’i lona taumafai e tago i totonu o le tago o lona ofuvae o lo o laei, e foliga mai o lo o ia taumafai e aveese mai se mea o lo o i totonu.

 

Na fesili Leoleo ia Afele poo i ai se mea i totonu o le taga o lona ofu, ae na tali le ua molia, o le tupe a lana uo o lo o taumafai e aveese mai i totonu o lana taga. O le taimi lea na fa’atonu ai loa e Leoleo ia Afele e tu’u i luga o ona lima ae se’i saili lona tino poo i ai ni mea e ono lamatia ai le saogalemu o Leoleo.

 

Ina ua saili e Leoleo le tino o Afele, sa maua ai i le taga o lona ofuvae uumi sa faia se tama’i pepa iila o lo o i ai vaega o le pauta fa’asaina o le aisa. Na fesili Leoleo ia Afele poo le a lea pepa iila, ae na tali le ua molia, o le pepa sa tuu atu e lana uo ia te ia e taofi a o fa’agasolo le latou ta’aloga piliaki.

 

Ina ua fesiligia e Leoleo ia Afele e tusa ai o le mataupu na ia faaoolima ai i se ali’i e ala i lona fa’aaogaina o se fasi paipa u’amea e sasa ai lona ulu, na taua ai e le ua molia e fa’apea, o le ali’i lea sa nofo ma gaoi le fale a lona uncle i Tafuna, o le mafua’aga lea na ia faaoolima ai ia te ia.

 

Na ta’utino Afele i Leoleo, sa ia fa’aaogaina se fasi paipa u’amea e sasa ai le ulu o le ali’i na a’afia. Sa ia ioeina fo’i, o le pepa iila lea sa maua i ai vaega o le pauta fa’asaina o le aisa, o le pepa sa ia fa’atau mai i se tasi o ana uo e sau mai Vaitogi.

 

Na musu le ua molia e ta’u i Leoleo le igoa o lana uo na fa’atau mai ai le pepa sa i ai le aisa, sa ia musu fo’i e fa’asino i Leoleo le nofoaga e nofo ai o ia.

 

O le mae’a ai ona fesiligia e Leoleo o Afele, na taofia ai loa o ia i le toese e fa’atali ai le taimi e tula’i ai i luma o le Fa’amasinoga Fa’aitumalo i le vaiaso na te’a nei.

 

O le masina o Iulai o le tausaga na te’a nei na ta’usala ai e le Fa’amasinoga Faaitumalo ia Afele i moliaga mama e 2 o le faaoolima i le tulaga tolu, ma faanofovaavaaia ai loa o ia mo le 24 masina i lalo o tuutuuga faapitoa.

 

O ni isi o ia tuutuuga faapitoa e aofia ai le aua lea ne’i ona toe solia se tulafono a le malo a o faanofovaavaaia ai o ia. E 6 masina na manatu le faamasinoga e faasala ai Afele i le falepuipui, ae na faamalumalu le 5 masina, ae na o le tasi le masina na ia tuliina, fuafua lava i lona usitaia o poloaiga a le fa’amasinoga.