Ua teena e le Fa’amasinoga Maualuga le talosaga a le ali’i o Thomas Siaumau, mo se poloaiga a le fa’amasinoga e fa’ataga ai ona latou fesiligia ma fa’atalatalanoa sui e to’alua o le vaega iloilo iuga lea sa latou ta’usalaina Siaumau i le masina o Mati na te’a nei, i le fa’alavelave lea na ia tafana ai se ta’avale leoleo ao i ai se leoleo i totonu.

O le affoga i le ali’i Fa’amasino Sili lagolago ia Fiti Sunia na sainia le faaiuga, ae lagolagosua ai afioga i ali’i Fa’amasino Lagolago ia Mamea Sala Jr ma Tunupopo Alalafaga.

O lea fa’aiuga, na tuuina atu lea ina ua mae’a ona fa’afofoga ali’i fa’amasino i fa’afinauga a itu e lua, faatasi ai ma mau sa latou folasia e lagolago ai a latou fa’afinauga sa tuuina atu i luma o le fa’amasinoga i le aso 16 o Aperila, 2019.

Na taua e le fa’amasinoga i lana faaiuga e faapea, o le mae’a ai ona fa’afofoga o le fa’amasinoga i ulua’i fa’afinauga e faatatau i lenei mataupui le aso 13 o Mati 2019, na tuuina mai ai loa e le fa’amasinoga lana faaiuga i le aso lava lea e teena ai le talosaga a Siaumau. Mulimuli ane i le aso 27 o Mati, na fa’atoa tuu aloaia mai ai loa e le fa’amasinoga lana faaiuga tusitusia e fa’amanino atili ai le faaiuga na mua’i folasia i luma o le fa’amasinoga.

I le mae’a ai ona teena e le fa’amasinoga o le talosaga a le ua molia, sa ia toe faila ai loa le isi talosaga, ma talosaga i le fa’amasinoga ina ia toe iloilo lana faaiuga e pei ona teena ai lana ulua’i talosaga.

Na faailoa e le loia a Siaumau i le fa’amasinoga e fa’apea, o le feau tusitusia lea na tuuina atu e le tama’ita’i loia a le malo ia Christy Dunn i leoleo i le po na sosoo ma le aso mulimuli o le fa’amasinoga iloilo a Siaumau, ina ia auai uma atu le to’atele o leoleo i le fale fa’amasino, na avea lea ma auala na faaletonu ai mafaufau o alii ma tamaitai iloilo iuga i le latou faaiuga tonu e ao ona faia.

Na teena malosi e le loia a le malo le talosaga a le itu tete’e. Na taua e le tama’ita’i loia ia Dunn e fa’apea, o le folasaga a le itu tete’e lea ua tuuina mai i le taimi nei, o le latou folasaga lava fo’i lea na tuuina mai i le aso 13 o Mati ina ua fa’atoa iloiloina lenei mataupu.

Sa taua e Dunn le leai ni mau fou poo ni isi fa’amatalaga fou na tuuina mai e le itu tete’e e ono mafai ai ona toe suia se isi faaiuga a le fa’amasinoga. Ona o lea tulaga, sa ia finau ai i le fa’amasinoga ina ia teena le talosaga a Siaumau.

Na taua e le fa’amasinoga i lana fa’aiuga tusitusia na tuuina mai i le vaiaso na te’a nei e fa’apea, e tasi lava le mafua’aga e ala ai ona talia e le fa’amasinoga se talosaga ina ia toe iloilo sana faaiuga ua mae’a ona tuuina mai, pe afai ua i ai ni mau faamaonia fou ua folasia e le itu tete’e, poo se tulaga fo’i ua ela ai le faaiuga sa tuuina mai, ona fa’atoa manatu lea o le fa’amasinoga e toe iloilo sana faaiuga.

“O le vaega pito sili ona taua i soo se talosaga ina ia toe iloilo e le fa’amasinoga lana faaiuga, o le faailoa mai lea i le fa’amasinoga o le itu ua ela ma sasi ai lana faaiuga ua mae’a ona tuuina mai. O iina e mafai ai loa e le Vaega Iloilo o le Fa’amasinoga Maualuga ona toe iloilo lana faaiuga e ia lava ma vaavaai poo fea tonu itu o le tulafono ua ela ma sasi ai lana faaiuga,” o se vaega lea o le faaiuga a le fa’amasinoga.

“E talitonu le fa’amasinoga, ua ela Siaumau ma lana itu mo le faailoaina mai o tulaga ua faaletonu ai le faaiuga a le fa’amasinoga.”

“I le folasaga fou e pei ona tuuina mai e Siaumau, e leai ma se vaega o lo o fa’ailoa mai ai ni mau fou poo ni fa’amatalaga fou e ono mafai ai ona toe iloilo e le fa’amasinoga lana faaiuga. Latou te le o faailoaina mai fo’i se vaega o le faaiuga ua le sa’o ona fai.”

“Lona uiga, o le faaiuga e pei ona matou teena ai le talosaga a Siaumau i le masina o Mati o le tausaga nei, o lo o tumau pea lea fa’aiuga, ma, e fa’aauau pea ona teena e le fa’amasinoga le talosaga a Siaumau ma lana itu mo se poloaiga e fa’ataga ai ona latou fesiligia sui o le vaega iloilo iuga.”

O le vaiaso na te’a nei na tula’i ai Siaumau i luma o le fa’amasinoga maualuga mo le lauina o lana fa’asalaga, ina ua ta’usala o ia e le vaega iloilo iuga i moliaga e 7 na afua mai i le fa’alavelave lea na ia tafana ina ai se ta’avale leoleo i le po o le aso 14 o Tesema 2017 i tua o le nofoaga o lo o i ai le malae Baseball i Tafuna.

O moliaga ua ta’usala ai Siaumau e aofia ai moliaga mamafa e 5 e pei o le faaoolima i le tulaga muamua, 2 moliaga o le faaleaga meatotino i le tulaga muamua, umia faasolitulafono o se aupega, faapea ai ma le fesoasoani i fanau laiti i le faia o solitulafono. Ua ta’usala fo’i o ia i moliaga mama e 2 e pei o le faatupu vevesi i nofoaga faitele atoa ai ma le umia faasolitulafono o se a’pega e le fa’atagaina.