Ads by Google Ads by Google

Teena Senate suiga Maota o Sui pili palota mai ai tagata o loo taofia i fafo


Komesina o Palota, Dr. Lealofi Uiagalelei i le taimi na molimau ai i luma o le Komiti a le Maota o Sui i le vaiaso na te’a nei i le talanoaina o le pili a le Senate e tatala ai le avanoa i tagata palota o lo o taofia i fafo e palota mai ai. [ata AF]
ausage@samoanews.com

Pago PAgo, AMERIKA SAMOA - 

 

Ua teena e afioga i Senatoa suiga a le Maota o Sui i le Pili a le Senate e tu’u ai le malosi i le Komesina o le Ofisa o Palota e faataga ai ona palota mai tagata palota uma lava ua mae’a ona lesitala ae o lo o poloka i Amerika ona o le taofia ai o malaga a va’alele, e mafua mai i puipuiga o le faama’i o le COVID-19.

 

O le aso Faraile na te’a nei na pasia ai e le Maota o Sui i le faitauga faatolu le Pili a le Senate faatasi ai ma a latou suiga, ae o le aso Gafua o le vaiaso nei na toe faafo’i mai ai le Pili i le Maota Maualuga mo sa latou faaiuga.

 

O le afioga i le ali’i Senatoa ia Faamausili Mau Mau Jr, o ia fo’i lea na faauluina lenei Tulafono, na ia faatula’i le mau ina ia teena suiga a le Maota o Sui, a ia toe faafo’i lava le Tulafono i le gagana na afua atu ai i le Senate.

 

Saunoa Faamausili e faapea, o suiga ua faia e le Maota o Sui, ua atili ai ona lavelave le Tulafono ma tula’i mai ai isi suiga e le tatau ona faia. I lona talitonuga, o lo o talafeagai lava le Tulafono o Palotaga a le atunu’u mai le gagana na faavae mai ai e Tuaa ua lagomau mai Tia Sa.

 

Saunoa atili Faamausili e faapea, afai e le taliaina e le Maota o Sui le faaiuga a le Senate ina ia teena a latou suiga, ona taatia ai loa lea o le mataupu e faatatau i tagata palota o lo o poloka i fafo, e aua nei toe faia i ai se faaiuga.

 

Na lagolagoina e nisi o Senatoa le mau ma fulisia ai loa le maota atoa e teena suiga a le maota o sui. 

 

O lalafo afioga i Senatoa mo se faaiuga i suiga a le maota o sui, ae o le taimi lea o lo o faafofoga ai le to’atele o afioga i Faipule e aofia ai ma le Fofoga Fetalai, mai le pito i tuao le maota o fono a le Senate, ina ua aga’i atu e faatalitali le taimi e amata ai le iloiloga o le Paketi.

 

Na molimauina e le Samoa News le taumafai atu o le afioga i le Fofoga Fetalai ia Savali Talavou Ale e talanoa atu i le afioga a Faamausili e faamanino le mafua’aga o suiga a le Maota o Sui, peita’i sa vaaia le teena e Faamausili.

 

ILOILOGA A LE MAOTA O SUI

 

O suiga o le maota o sui na afua mai ina ua mae’a se iloiloga sa faia i le aso Tofi o le vaiaso na te’a nei, lea na molimau ai le Komesina o Palota ma le Loia Sili a le malo i se iloiloga na faatautaia e le Komiti o Palotaga a le Maota o Sui, i lalo o le ta’ita’iga a le afioga i le ali’i Faipule ia Titialii Kitara Vaiau o le Ta’ita’i Komiti.

 

Ina ua fesiligia molimau a le malo, na saunoa ai le Loia Sili ia Mitzie Jessop Taase e faapea, o se pili talafeagai ma lelei lenei tulafono, lea ua maua ai le avanoa e palota mai ai tagatanu’u o lo o taofia ma poloka i fafo ona o le tapunia ai o malaga a va’alele. 

 

Na lagolagoina e le Komesina o le Ofisa o Palota le finagalo o le Loia Sili. Saunoa le afioga a Dr. Lealofi Uiagalelei e faapea, o le tulafono lenei, ua mafai ai ona tatala le avanoa e faaopoopo ai tagata e agavaa ona palota mai fafo.

 

Saunoa le Fofoga Fetalai ia Savali Talavou Ale e faapea, e faigofie lava lona taofi i le tulafono, na o le faaopoopo lava o le aofa’i o tagata e agavaa ona palota mai fafo i le lisi o tagata ua mae’a ona i totonu o le palota, ona faigofie loa lea o le tulafono.

 

Mo se faata’ita’iga e pei ona saunoa Savali, pau tagata o loo agavaa i lalo o le tulafono o tagata “palota mai fafo”, e agavaa ona palota, o tagata nuu o loo galulue i fafo e pei o faifeau, sui i vaega ‘au a le malo tele ma fanau aoga. 

 

I le talitonuga o le Fofoga Fetalai, e tatau lava ona sui le Tulafono o Palota, ae faaopoopo loa i ai ma tagata ua le mafai ona paloga i Amerika Samoa ona o loo poloka i fafo i fuafuaga a le malo.

 

Na faamaonia e le Komesina o Palota ia Uiagalelei e faapea, e 188 le aofa’i o pepa palota ua mae’a ona lafo i le meli ma auina atu i fafo mo tagata o loo poloka i fafo ae o loo naunau e fia palota mai.

 

O popolega e pei ona faaalia e nisi o Faipule, o le taimi e palota faalua ai se tagata se to’atasi. Saunoa le Faipule mai Manu’a ia Vesi Talalelei Fautanu Jr e faapea, o lona popolega o lo o i ai i lenei mataupu, ina nei uma ona lafo le pepa palota ma palota mai le tagata sa poloka i fafo, ae te’i ane ua faataga vaalele e toe malaga mai ai le atunuu, ma toe maua ai fo’i lea o le avanoa e toe palota ai a o lea ua mae’a ona fai mai lana palota a o taofia ai i fafo.

 

Na taua fo’i e Vesi popolega ina nei fefiloi palota masani mai fafo ma palota a i lato o loo poloka i fafo, ona faigata lea i le Ofisa o Palota ona faatino le latou galuega.

 

Saunoa Uiagalelei e faapea, o palota uma lava mo tagata o loo taofia i fafo, o le taimi lava e taunuu mai ai i le latou Ofisa, ona taatia ese loa lea e le faafefiloia ma isi palota mai fafo. 

 

I le tulaga o tagata e palota i fafo ae toe malaga mai fo’i iinei ma toe palota faalua ai, na faamanino e Uiagalelei i le maota o sui, e le mafai ona tupu se tulaga faapea. Afai e mae’a ona palota mai le tagata mai fafo ae toe fo’i mai i le atunu’u i le taimi e le i faia ai le palota, e le mafai ona toe palota, e siaki uma lava e le latou Ofisa tagata uma ma a latou ID palota.

 

PILI A LE SENATE

 

E pei ona taua e le Senate i le latou tulafono, o le aso 27 o Mati o le tausaga nei na talosagaina ai e le afioga i le ail’i Kovana ia Lolo M. Moliga le Pulega a le Kamupani va’alele a le Hawaiian Air, ina ia taofia malaga i le va o Amerika Samoa ma Hawaii, ona o puipuiga i le ono ofi mai ai lea o le siama o loo mafua ai le faama’i oti o le COVID-19.

 

Talu mai le masina o Mati e oo mai lava i le taimi nei, ua silia ai i le 5 masina talu ona taofia malaga a le Hawaiian Air mo le fela’uaina o tagata malaga e pei ona masani ai i aso fai soo, se’i vagana ai malaga faapitoa na auina atu ai gasegase i Hawaii mo togafitiga, atoa ai ma fanau aoga ma sui o le Militeli na maua ai fo’i lo latou avanoa.

 

O lo o i ai le faamoemoe e ono faaaua pea lenei fuafuaga seia oo atu i le faaiuga o lenei tausaga ma faasolosolo atu ai lava i le tausaga fou, ona o tulaga lava i le puipuiga o le atunuu mai lenei faama’i.

 

I ni faamaumauga a le malo, e tusa ma le 500 le aofa’i o tagata o le atunuu o loo taofia i fafo ona o le taofia ai o malaga a va’alele, ma o se numera to’atele lea pe a fuafua atu i tagata ua leva na tataona toe fo’i mai i le atunu’u.

 

Ona o lea manaoga, ua manatu ai loa le Senate e ala i le pili sa latou faaulu e tuu atu le malosi i le Komesina o le Ofisa o Palota, mo le faia lea o ni suiga i le tulafono ma taualumaga tau palota, ina ia mafai ai ona palota mai tagata ua mae’a ona lesitala o loo taofia i fafo.

 

Ua tuu atu fo’i i le Komesina o Palota le malosiaga e faia ai gaioiga uma mo le suiga o tulafono ma galuega faatino, ma ia mautinoa e malu puipuia tulaga o le faiga palota tele a le atunuu i le aso 3 o Novema o le tausaga nei.

 

O lenei tulafono ma le malosi ua tuuina atu i le Komesina o Palota e pei ona taua e le Senate i le latou pili tau faaofi, e faamutaina pe a mae’a le palota tele o lo o loma i le masina o Novema o le tausaga nei.

 

I suiga a le Maota o Sui, ua latou aveesea uma ai lava le gagana fou o le tulafono a le Senate, ae tu’u i ai na o le latou suiga e faaupuina e faapea, “Mo na o le paltoaga lava ia Novema 3, 2020, o se tagata agavaa e palota se semanu e mafai lava ona auai i le palotaga, ae ona o gaioiga a le malo na mafua ai ona toesea mai le teritori ma ua le mafai aiona auai i le palota”.