Ads by Google Ads by Google

Tatala i tua mai le Toese i Tafuna le ali’i na ia faaoolima i lona to’alua


[ata: SN]
ausage@samoanews.com

Pago Pago - AMERIKA SAMOA

 

Ua tatala i tua mai le Toese i Tafuna le ali’i mai Samoa na ta’usala i lona fasi faamo’amo’a lea o lona to’alua e ala i lona fa’aaoga o se laau ma se ‘ali e sasa ai lona ulu ma lona tino, ina ua manatu le Faamasinoga Maualuga e faanofovaavaaia o ia mo le 5 tausaga.

 

O le vaiaso nei na tula’i ai le ua molia i luma o le Faamasinoga Maualuga mo le tuuina atu o lana fa’asalaga. O le ali’i Loia Fautua lagolago ia Ryan Anderson na tula’i mo le ali’i ua molia, ae o le tamaitai Loia Sili lagolago ia Kristine Soule’ na tula’i mo le malo.

 

Talu mai le masina o Mati na pu’e faapagota ai e Leoleo le ua molia ma taofia i le Toese i Tafuna, na i ai pea lava o ia i le Toese seia oo mai i le vaiaso nei ina ua tula’i mo le lauina o lana faasalaga, ina ua le mafai ona ia totogi le $15,000 na faatulaga e tatala ai o ia i tua.

 

Na ulua’i tu’uaia le alii na molia i le moliaga mamafa o le faaoolima i le tulaga lua, tasi le moliaga mamafa o le taofia faapagota o se tagata i se auala faasolitulafono, faapea ai ma moliaga mama e 2 o lona faia lea o gaioiga e ono lamatia ai le saogalemu o fanau laiti, o le vaega A lea o solitulafono mamafa.

 

Ae i lalo o le maliliega na sainia e le ua molia ma le malo, lea fo’i na talia e le Faamasinoga Maualuga i le masina na te’a nei, na tali ioe ai le ua molia i le moliaga mamafa o le faaoolima i le tulaga lea, lea e mafai ona faasala ai se tasi i le Toese mo le umi e le siliai le 5 tausaga, pe faasala fo’i i le salatupe e le siliai le $5,000, poo le faasala fo’i i faasalaga uma ia e lua.

 

I le tali ioe ai o le alii ua molia i le solitulafono e pei ona ta’usala ai o ia, na ia ta’utino ai e faapea, i le taeao o le aso 12 o Fepuari o le tausaga na te’a nei, na ia fasi faamo’amo’a ai lona to’alua a o matamata i ai lana fanau, e ala i lona sasa o lona tino i se laau e oo atu i le 12 inisi le umi, atoa ai ma lona faaaoga o se ‘ali e ta ai lona ulu ma lona tino.

 

Na ta’utino atili le ua molia e faapea, sa ia faia nei gaioiga i lona to’alua a o matamata i ai lana fanau. I le taimi na taatia ai lona to’alua i lalo o le fola o le fale, sa aapa atu ma toso lona ulu aga’i i totonu o le potu, ma toe fa’aauau ai lana gaioiga.

 

Ina ua maua le avanoa o le alii ua molia mai le Fa’amasinoga, na ia faatoese ai loa e tusa ai o lana solitulafono, ma ia talosagaina ai loa se isi avanoa mo ia se’i toe fo’i atu ai i tua e mafuta i lona to’alua ma lana fanau ua silia i le 5 masina talu ona latou valavala. 

 

Na taua e le ua molia e faapea, ua aoga le faalavelave na loka ai o ia i le Toese, ua mafai ai ona ia aoaoina se lesona taua mo lona olaga, ma ia iloa ai fo’i le tele o aso ua ma’imau talu ai lona le onosa’i i lona to’alua.

 

Na taua e le ua molia lona molimauina o le to’atele o tupulaga talavou o lo o taofia i le Toese ona o solitulafono eseese o loo tu’uaia ai i latou, ma ua ia iloa ai, e le o se nofoaga lelei le Toese mo ia, aemaise ai lava le tulaga lea, o ia o se Tama e fai le to’alua ma le fanau, e tatau fo’i ona faatino ona tiute faa Tama i totonu o lona aiga.

 

Na talosaga le ali’i loia fautua ia Anderson i le Faamasinoga mo se faasalaga faanofovaavaaia mo le ua molia, atoa ai ma le tatala o ia i tua e toe fo’i e faaleleia lona aiga ua 19 tausaga o tau atina’e mai.

 

Na taua atili e Anderson e faapea, na galue malosi lenei ali’i mo le tele o tausaga e tausi lona to’alua ma lana fanau teine e to’alua, o ia fo’i o se tagata e faalagolago i ai lona aiga i le itu tau tamaoaiga, peita’i o le filifiliga sese sa ia faia, lea ua mafua ai ona faaletonu lona aiga.

 

Na lagolagoina e le loia a le malo ia Kristine’ le talosaga a le itu tete’e mo se faasalaga faanofovaavaaia. Na taua e Kristine’ le lagolagoina e le malo i le manatu, o le ua molia o se tagata e agavaa mo se faasalaga faanofovaavaaia. 

 

Na taua e le Fa’amasinoga Maualuga e faapea, o le mataupu e pei ona ta’usala ai le ua molia, na tofu atu i le Ofisa o Leoleo ina ua logo e lona afafine e 7 tausaga le Ofisa o Leoleo mo se fesoasoani, ina ua ia vaaia le tulaga tigaina o lona tina ina ua mae’a ona faaoolima i ai lona Tama (le ua molia).

 

Na taunuu Leoleo i le fale ma latou maua ai le Tina i totonu o le potu, o loo taatia ai ma lona tino o loo manu’a. Sa molimauina fo’i e Leoleo le gatete o le Tina i le fefe tele ona o sau’aga sa faia faasaga ia te ia e lona to’alua.

 

E le gata na fa’aaoga e le ua molia se laau malo e sasa ai le tino o lona to’alua, ae na ia toe faaaogaina fo’i le ‘ali e faaauau ai le fasiga o lona to’alua ma tula’i mai ai loa manu’a tuga i lona tino.

 

Na faamanino atili fo’i e le Fa’amasinoga Maualuga e faapea, o lo o taua i le Ripoti a le Ofisa Faanofovaavaaia, o le alii ua molia o se Tama sa galue malosi mo le tausiga o lona aiga. O ia fo’i sa faamoemoe tasi i ai lona to’alua ma lana fanau. Ao le i tula’i mai le faalavelave e pei ona nofosala ai o ia, sa fa’aauau pea ona faigaluega o ia mo se lumana’i lelei o lona aiga.

 

Na taua fo’i e le Fa’amasinoga le maua o le avanoa a le Ofisa Faanofovaavaaia e faatalatalanoa ai le Tina na aafia e tusa ai o lenei mataupu, ma taua ai e le Tina lona loto faamagalo i lona to’alua, ma ua ia mana’o fo’i e toe faafo’i atu o ia i lo latou aiga ina ia toe fuata’i se isi taeao fou i le aiga. Na taua atili e le Tina lona sauni e toe talia si ona to’alua i totonu o le aiga.

 

E 5 tausaga na manatu le Faamasinoga e faasala ai le ua molia i le Toese i Tafuna, peita’i ua faamalumalu lona tuliina o lea faasalaga, ae ua nofovaavaaia o ia mo le 5 tausaga i lalo o tuutuuga e ao ona usita’i i ai.

 

O ni isi o ia tuutuuga e aofia ai lona tulia o masina e 20 i le Toese i Tafuna e aunoa ma le tatalaina o ia i tua, peita’i ua finagalo malie le Faamasinoga, o le a lava aso e 160 lea na taofia ai le ua molia i le Toese a o faatali ai se faaiuga o lana mataupu e fai ma ana faasalaga, o le umi o lo o totoe ai o lana faasalaga e 20 masina o le faamalumalu le tuliina sei vagana ua toe tuuina atu se isi faaiuga a le Fa’amasinoga.

 

E $2,000 le salatupe lea ua faatonu e le Faamasinoga le ua molia e totogi i totonu o le ulua’i 20 masina o lana Faasala Nofovaavaaia. 

 

O is tuutuuga o le nofovaavaaia e aofia ai le auai i aoaoga e fesoasoani ai i le tulaga o le ita, asiasi i le Ofisa Faanofovaavaaia faatasi i le masina, ma ia aua nei ona toe faia ni sauaga faasaga i lona to’alua poo lana fanau fo’i.

 

Ua faatagaina fo’i e le Fa’amasinoga le ua molia ina ia toe fo’i i lona aiga, ma maua ai se mafutaga fiafia ma lona to’alua faapea si ana fanau.

 

O le lapataiga mulimuli a le Faamasinoga mo le ua molia, ua fautuaina ai e le Fa’amasinoga o ia ina ia nofouta i le tulaga matuia o le solitulafono lea ua ta’usala ai o ia. Afai ae toe molia mai o ia i se isi mataupu e aofia ai le faia o sau’aga faasaga i lona to’alua, o le a mafai loa ona faasala o ia i le vaega C o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga.

 

O le tausaga e 2018 na ta’usala ai e le Fa’amasinoga Faaitumalo le ua molia i le moliaga o le faaoolima ma le gaoi, ma nofovaavaaia ai o ia mo le 12 masina. E 45 aso na faasala ai o ia i le Toese i Tafuna faapea ai ma lana salatupe e $150.

 

E 2 masina talu ona mae’a le nofovaavaaia e 12 masina a le ua molia i le faaiuga o le 2019, na toe loka ai o ia e Leoleo ma molia i le solitulafono o le ave ta’avale ‘ona. O le tausaga e 2020 na faamaonia ai e le Fa’amasinoga Faaitumalo lana solitulafono ma nofovaavaaia ai loa o ia mo le 6 masina i lalo o tuutuuga e ao ona ia usita’i i ai, e aofia ai le se’i o lona laisene mo le 6 masina.

 

O le silia ai i le tausaga talu ona mae’a la nofovaavaaia e 6 masina ae taofia faapagota loa o ia i le tausaga e 2021 i le mataupu e pei ona faasala ai o ia e le Fa’amasinoga Maualuga.