Ads by Google Ads by Google

Taofia fa’aiuga Komiti a le Maota Maualuga pili a le kovana mo le komiti o femalagaiga


[ata: foa'i]

Pago Pago, AMERIKA SAMOA

 

Ina ua ma’ea se iloiloga i le vaiaso ua te’a a le Komiti o Fa’amasinoga a le Maota Maualuga, sa faia ai sa latou fa’aiuga ina ia taoto pea i le komiti se tulafono taufa’aofi mai le afioga i le Kovana Sili, ae na talosagaina le Loia Sili a le malo e faia suiga talafeagai i le pili ma toe tuuina atu i le Maota. 

 

O lea pili a le kovana, o se tulafono, e fa’asa ai se totino o le Komiti Fa’afoe o Femalaga’iga ona ia tausia/aumaia ni tagata mai fafo ma fa’amanino ai le umi o taimi o sui o le komiti e tautua ai i le Komiti Fa’afoe. 

 

E tele atugaluga sa fa’ailoa e afioga i senetoa i lenei tulafono taufa’aofi i le taimi o la latou iloiloga, ma o lo’o mana’omia ai le malo ina ia tuuina atu suiga e tatau ona fa’alelei ai ma fa’amanino lea mataupu, ae le’i faia se faaiuga i se taimi o i luma. 

 

O suiga i le tulafono, e pei ona taua i le pili a le Kovana, o lo’o fa’ailoa ai, “E le mafai ona tausia/aumaia (sponsor) e se totino o le komiti se tagata mai fafo.” 

 

“O se tagata e tofia i le Komiti Fa’afoe a o ia tausia/vaaia se tagata mai fafo, e tatau ona fa’amuta o lana tausiga lena i totonu o le 60 aso talu ona faia  o le tofiga,” o se vaega lea o le suiga o le tulafono mai le pili a le Kovana. 

 

Ua le gata i lea: “So’o se sui o le Komiti Fa’afoe e vaaia/tausia se tagata mai fafo ae atoa le 60 aso e lei fa’amutaina lana tausiga o le a aveesea loa e le Kovana mai le Komiti” Fa’afoe.

 

O le tulafono o lo’o i ai nei, e to’a fitu totino o le Komiti Fa’afoe e tofia e le kovana ma fa’amonia e le Fono Faitulafono. 

 

Ae ua talosaga mai e le pili a le kovana e fa’apea o nei sui e toa 7 “e fetuutuuna’i lava le umi o latou taimi e le silia” i le 5 tausaga, ae le silia i le ta’ilua a latou nofoaiga soso’o. 

 

O lo’o i ai foi lenei tulafono taufa’aofi i luma o le Maota o Sui mo o se taimi i luma e faia ai iloiloga a le komiti, ae le’i mautu mai le aso i le taimi nei.