Ads by Google Ads by Google

Talosaga Faipule i le ASPA vave faapipi’i loa moli auala i le atunu’u atoa


[ata: foa'i]
ausage@samoanews.com

Pago Pago, AMERIKA SAMOA

 

O le iloiloga lea na faatautaia a le Komiti o le Malosiaga Faaeletise a le Maota o Sui ma sui o le Pulega o le Eletise ma le Suavai a le atunu’u (ASPA) i le vaiaso na te’a nei, na talosagaina ai loa e ni isi o afioga i Faipule sui o le ASPA ina ia vave faapipii loa moli auala mo itumalo ma nu’u i le atunu’u atoa, ina ia fesoasoani ai i le latou taumafaiga mo le palota ia Novema o le tausaga nei.

 

O sui e to’alua o le ASPA na auai i lea iloiloga e aofia ai le Pule Sili ia Wallon Young ma le susuga a Ryan Tuatoo. 

 

O le iloiloga na faatulaga ina ua to’atele faipule latou te fesiligia se tulaga o moli auala i totonu o itumalo, lea ua to’atele le atunu’u e fa’asea i le pogisa o auala i le po aemaise lava pe afai e timuga ma leaga le tau. Na taua e nisi o faipule le faasea o tagata o a latou itumalo, ona ua avea le pogisa o auala i le po ma itu ua afaina ai a latou ta’avale i omo omo i luga o le alatele e le o mafai ona iloa atu.

 

Ina ua fesiligia e le Komiti sui o le ASPA e uiga i moli auala, na taua ai e le susuga a Young e faapea, o le 2 vaiaso talu ai na taunu’u mai ai le latou container sa aumai ai moli auala e 6,000. E 5,400 ua faamoemoe e faapipi’i i Tutuila nei ma le isi 600 i isi motu e 2 e aofia ai Manu’a ma Aunu’u.

 

O le vaiaso na te’a nei na amata galulue ai le aufaigaluega a le ASPA mo le amata faapipiiina o moli auala i nisi o vaega o Tafuna e aofia ai le malae vaalele ma faasolo mai ai i le maga tolu i Nu’uuli.

 

O se tasi o lu’itau tele o loo feagai ma le ASPA i lenei galuega tele o le taimi e faatino ai le galuega. Na taua e Young i le komiti e faapea, e na o taimi lava e mae’a ai le pisi o le alatele e faatino ai galuega mo le faapipiiina o moli auala, e aofia ai le taimi o le po, ma faasolo atu ai i le faaiuga o le vaiaso.

 

O le itula e 9:00 i le po ua fuafua e faatino ai le galuega mo le faapipi’iina o moli auala, ona o le manatu ia aua ne’i faalavelave nei galuega. 

 

Na faailoa e le afioga i le alii Faipule ia Gafatasi Afalava i molimau e faapea, e le o se taimi faigofie lenei mo afioga i Faipule o le maota, ona o lea ua lata mai le palota tele ia Novema, a o lea lava o loo fesiligia e itumalo tulaga o moli auala mo le faamalamalamaina o auala.

 

“O lea ua latalata mai le palota e filifili ai tagata palota poo ai e taitaia le atunu’u mo le isi 4 tausaga, e aofia ai fo’i ma le filifilia o faipule mo le maota o sui, ae tatau ona oo atu i le aso o lea faamoemoe ua mautu ma amata galuega mo le faapipi’iina o moli auala,” o le saunoaga lea a Gafatasi. 

 

Na taua e Gafatasi e faapea, e le laititi le lu’itau o loo taoto mai ala mo afioga i Faipule, peita’i o le faafitauli o loo maitauina, o le tuai lea ona faapipii o moli auala. Sa ia talosaga i sui o le ASPA ina ia amata faapipii loa moli auala ina ia silafia ai e le atunuu aemaise lava i tagata palota, o lea ua amata galuega mo le atunuu, ae sili ai i lo lena, o se avanoa lelei lea e toe manumalo mai ai i latou uma i le isi faiga apalota tele o loo lumana’i nei.

 

Sa ia taua atili fo’i e faapea, e oo lava i le pe o le moli auala e tasi i totonu o le nu’u poo le itumalo, e matua faigata lava ona tau faamalamalama i tagata le mafua’aga o le faaletonu, atoa ai ma taumafaiga ina ia toe faaleleia moli auala i se taimi vave.

 

Na taua e le faipule mai Saole ia Titialii Kitara Vaiau e faapea, e le tatau ona faia ni galuega mo le faapipiiina o moli auala i le aso aso Sa, ona o le aso lea e tapua’i ai Samoa i le Atua, ae tatau ona faatino galuega lelei ia i aso o le vaiaso e aofia ai ma le po.

 

I le tulaga o le tele o faasea mai tagata e tusa ai o galuega faatino, na saunoa ai Titiali’i e fa’apea, e tatau fo’i ona aoaoina mafaufau o tagata o le atunu’u, e le o galuega uma e faatino e Faipule, e tatau fo’i ona i ai se sao o tagatanuu i taumafaiga e faaleleia totonu o afioaga ma le itumalo.

 

Na taua e Titialii e faapea, sa ia fautuaina nisi o lona itumalo, e le o galuega uma e faatino e le faipule. Afai e i ai ni galuega e moomia le fia faaleleia, e tatau i le tagatanu’u ona tago i le telefoni ma faafesoota’i le ASPA pe afai o ni galuega e fitoitonu mo le ASPA, ae le o le faalagolago tasi lava e fai uma e le Faipule galuega nei.

 

Na faafetaia e le Faipule mai Fofo ia Andra Samoa taumafaiga e vave faaleleia le faafitauli i le pepe o moli auala.

 

Na taua Samoa e faapea, o lona itumalo se tasi o nofoaga o loo maitauina le malosi ai o fefaatauaiga i fualaau faasaina. O se tasi o faafitauli o loo maitauina i nofoaga ia, e faaleaga e i latou o loo aafia i fefaatauaiga o fualaau faasaina moli auala ina ia pogisa le nofoaga ma faigata ai ona iloa a latou gaioiga o loo faia.

 

O le itumalo o Fofo e pei ona saunoa le tamaitai Faipule, o le isi lea nofoaga o loo manu a’e ai le tele o solitulafono eseese, faapea ai ma le to’atele o tupulaga talavou e aafia i nei soligulafono, ma o lo o galulue pea le itumalo i ni auala e mafai ai ona foia lenei faafitauli.

 

E le gata i le faafitauli o fualaau faasaina o loo aafia ai tupulaga o le itumalo, ae na taua fo’i e Samoa isi solitulafono o loo manu a’e i le itumalo e pei o le talepe fale ma le gaoi.

 

ISI MATAUPU NA TALANOAINA E LE MAOTA

 

O se tasi o mataupu na talanoaina e le Maota o Sui i le vaiaso nei, o le faatonuga mai le Kovana Sili ia Lolo Moliga e taofia ai taaloga Bingo i le atunu’u. Saunoa le Sui Fofoga Fetalai ia Fetu Fetui Jr e faapea, e le talafeagai le faaiuga e taofia ai taaloga Bingo i le atunu’u i le taimi lenei o puipuiga mo le faama’i o le COVID-19.

 

O le tulaga e le talafeagai ai lenei mataupu e pei ona saunoa Fetui Jr, ua faasolo atoa ai galuega a Leoleo e tapuni ai soo se taaloga Bingo, ua oo lava i taaloga Bingo a aiga o loo faia ma le faamoemoe e mafuta faatasi ai i faaiuga o vaiaso, ua tapunia fo’i e Leoleo.

 

A e o le itu e faanoanoa ai e pei ona saunoa le Sui Fofoga Fetalai, o le mataga o le gagana atoa ai ma amio na faaali e Leoleo i le aiga i le taimi na latou. Na taua e Fetui Jr lona faanoanoa tele i le le mafaufau o upu ma lafo e Leoleo i le taimi na aga’i atu ai e tapuni le taaloga Bingo.

 

Na lagolagoina e le isi faipule mai Manu’a ia Vesi Talalelei Fautanu Jr le saunoaga a Fetui Jr e faatatau i le ta’aloga Bingo na taofi e Leoleo, atoa ai ma le gagana na fa’aaoga e malu o le malo.

 

Saunoa Vesi, o ia sa i ai i le taimi na tula’i mai ai lenei faafitauli, ma, o se itu e lagona ai lona faanoanoa ona o le auala sa fa’aaoga e Leoleo. I lona talitonuga, e tatau ona aami le Komesina sei avatu i ai se fautuaga ina ia silasila toto’a i Leoleo ma le auala o loo faatino ai le latou galuega i le va feagai ma le atunu’u.

 

Saunoa Savali Talavou Ale e faapea, e le talafeagai le taofi o taaloga Bingo ae o loo vaaia pea le tumu tumu o mafutaga i taimi o Faatosina o le Palota i le taimi nei, e le faamalosia ai fo’i tulafono o le nonofo valavala.