Ads by Google Ads by Google

Talitonu Gafatasi e le o faamaoni tagata faigaluega sailia o uta mai fafo


Le afioga i le ali’i Faipule ia Gafatasi Afalava ma le afioga i le Tama’ita’i Faipule o le maota o sui ia Andra Theresa Samoa i le taimi o le iloiloga a le Maota i le vaiaso na te’a nei. [ata AF]
ausage@samoanews.com

Pago Pago, AMERIKA SAMOA

 

A o taumafai ai le malo aemaise lava i Matagaluega ma Ofisa o loo galulue i le faamalosia o Tulafono e tau saili le auala o loo ulufale mai ai fualaau fa’asaina i totonu o le atunu’u, na saunoa ai le afioga i le ali’i Faipule ia Gafatasi Afalava e faapea, e i ai masalosaloga o totonu lava o container o loo aumai ai uta mai fafo o loo sao mai ai fualaau fa’asaina. Ae mafua fo’i ona sao mai i totonu o le atunu’u, e le o faamaoni tagata faigaluega a le Ofisa o le Tiute i le sailia lea o uta ma faamomoli o loo aumai i fafo.

 

O se tasi o itu o loo ofo ai afioga i Faipule, o lea ua silia i le 5 masina talu ona tapunia malaga a va’alele i le va o Amerika Samoa ma le malo tele e aofia ai Hawaii, ae o loo maitauna pea le faatupulaia o le faafitauli o fualaau fa’asaina i totonu o le atunu’u.

 

“O le fesili o loo tula’i mai, o fea o loo liki mai ai nei fualaau fa’asaina i totonu o le atunu’u,” o le fesili lea na fesili ai afioga i Faipule i molimau a le malo na valaau i le iloiloga sa faia i le vaiaso na te’a nei, e talanoaina ai auala o loo sailia ai container oloa o loo auina mai i totonu o le atunu’u.

 

O le vaiaso nei na faataunuuina ai se iloiloga i luma o le Komiti o le Faagaioiga o le Malo a le Maota o Sui, e talanoaina ai mataupu e faatatau i le auala o loo sailia ai e le Ofisa o Tiute uta ma faamomoli mai fafo, atoa ai ma se gaioiga e faaitiitia ai le ono ulufale faanana mai o fualaau fa’asaina i Amerika Samoa.

 

O sui na molimau i lenei iloiloga e aofia ai le Faatonusili o le Pulega o Uafu ma Malaevaalele ia Taimalelagi Dr. Claire Poumele, o le Teutupe Laglago a le malo ia Keith Gebauer ma le Pulesili o le Ofisa o Tiute ia Elisara Pita Elisara. O le iloiloga na ta’ita’ia e le afioga i le ali’i Faipule ia Vailiuama Steve Leasiolagi.

 

O lenei iloiloga na afua mai i se vaega o le molimau a le Komesina o Leoleo ia Le’i Sonny Thompson i le vaiaso na te’a nei, lea sa ia taua ai e faapea, o le Ofisa o Leoleo e lona lua lava i soo se faalavelave e tula’i mai i le uafu, malae vaalele ma le Falema’i, pe afai o se mataupu e aafia ai le aumaia faanana o fualaau fa’asaina. 

 

Saunoa atili Le’i e faapea, o le Ofisa lava o Tiute a le malo, o i latou ia e pito lava i luma o le laina, poo i latou ia e muamua lava suesueina mataupu faapenei ona faatoa pasi atu loa lea i le Ofisa o Leoleo mo le suesueina.

 

Saunoa le afioga a Gafatasi e faapea, ua tele tausaga o pagatia Amerika Samoa i le faafitauli o fualaau fa’asaina, ma ua iso fo’i le atunuu ma ona Ta’ita’i i se auala e foia ai. 

 

Sa ia fia malamalama i le auala o loo faatinoina ai le su’eina o container o loo la’u mai ai uta o oloa a soo se pisinisi i le atunu’u, pe su’e uma container nei i luga o le uafu pe ave lava i luma o le Faleoloa e ana le container e su’e ai.

 

Na faamanino e le Sui Teutpue a le malo ia Gebauer e faapea, e faaaoga le masini o le scanner i le uafu i Fagatogo e saili ai container uta uma lava e ulufale mai i le atunuu ina ia mautinoa e le o sao mai ai nisi oloa e le o faatagaina, ona faatoa momoli atu ai loa lea i tua i nofoaga o loo i ai pisinisi container nei mo le suega fa’ai’u, lea e faatautaia lava e tagata faigaluega a le Ofisa o Tiute.

 

Saunoa Gafatasi e faapea, sa i ai se tasi o faafitauli sa ia maitauina ina ua aga’i mai lana ta’avale i le itui Sisifo o le atunu’u. O loo pisinisi lava alii Asia e la’u oloa mai totonu o le container ma la’u i totonu o le faleoloa, ae ese lava le itu o loo tutu ma piilima mai ai le Sui o le Ofisa o Tiute ma talatalanoa i isi tagata.

 

Saunoa Gafatasi e fa’apea, o le isi lea auala o loo liki mai ai oloa faasaina i le atunu’u, e le o faamaoni le tagata faigaluega a le Ofisa o Tiute i le faatinoina o ona tiute. Afai o se tasi ua tofia na te sailia le container, e tatau i lea tagata ona i ai i le taimi atoa lava e la’u ese ai uta o oloa mai totonu o le container ina ia mautinoa i lana vaai, e le o i ai ni oloa o aumai faanana i totonu o le uta.

 

E faapena fo’i i tagata e malaga mai i le malae vaalele atoa ai ma uta o faamomoli ma meli, e tatau ona fesoasoani Ta’ifau faapitoa a le Ofisa o le Tiute i le sailia o tagata ma uta ina ia mautinoa, e le o sao mai totonu ni fualaau fa’asaina.

 

Ina ua fesiligia le Ofisa o Tiute poo lava tagata faigaluega e fa’atinoina le galuega, na saunoa ai le susuga Gebauer e faapea, e le o taitai lava le aufaigaluega i le taimi nei, o le mafua’aga fo’i lea o loo taoto ai se talosaga i le afioga i le ali’i Kovana, mo se avanoa e faa faigaluega ai nisi tagata faaopoopo e fesoasoani i le galuega.

 

Na fautuaina e Gafatasi molimau a le malo ina ia faamalosi le tulafono ma ia tutusa tagata uma i lalo o le tulafono. Aua ne’i vaai atu loa o se Ta’ita’i o le malo poo ai lava ona ‘alo loa lea o le tulafono.

 

Na lagolagoina e le afioga i le ali’i Faipule ia Vesi Talalelei Fautanu Jr le finagalo o Gafatasi, ma ia taua ai le tatau lea ona i ai ni Ta’ifau aoaoina a le Ofisa o Tiute (K-9) e fesoasoani i le latou galuega.

 

Ina ua fesiligia e le Faipule mai Swains ia molimau pe sa i ai ni uta na aumai faanana na maua i scanner talu ona i ai Amerika Samoa i le tapunia o malaga a va’alele mai fafo, na saunoa Gebauer, “e i ai uta faasaina sa maua”. E le i faalaua’itele e Gebauer poo a uta faasaina sa ia taua na maua.

 

Saunoa le tama’ita’i faipule mai Fofo ia Andra Theresa Samoa e faapea, e tatau lava ona mataalia le aufaigaluega i le faatinoina o a latou tiute, ina nei avea le faatamala ma auala e ofi mai ai fualaau fa’asaina i totonu o le atunu’u.

 

Na taua e Samoa lona molimauina i aso uma e faasalalau i le nusipepa ripoti mai le Faamasinoga e faatatau i tagata e pu’e faapagota ma molia i le umia faasolitulafono o fualaau fa’asaina. Ae o le itu e lelei ai, o loo mafai lava ona faailoa e nei tagata i Leoleo, nofoaga e 2 o loo tele mai ai fualaau faasaina, o le Aute ma le Filifili.

 

Saunoa Gebauer e faapea, o le faafitauli i fualaau fa’asaina i totonu o Amerika Samoa, ua matua avea o se pisinisi e sili atu ona malosi toe tele le tamaoaiga e maua mai ai. Tusa lava fo’i pe taumafai le malo i auala uma ina ia foia ai lenei faafitauli, e galulue lava i latou o loo aafia ai i soo se auala ina ia mafai ona sao mai lenei faafitauli i le atunu’u.