TAAVALE TEUTEUINA - AIGA MA PA'AGA FA'ATUPE & SAUNIGA LOTU ALE MASI

I le fa'aiuga o le vaiaso ua te’a sa fa'atautaia ai ni polokalama a le Miss American Samoa Inc. (MASI), i latou o lo'o nafa ma le sailiga o se tausala lalelei mo Amerika Samoa e fa'aauauina fo'i lea tofi i le tausaga 2018-19, ma auai atu fo'i i le Tauvaga Tausala Lalelei a le Pasefika atoa e faia i Tonga i le fa'aiuga o lenei tausaga.

Na amata i le tauvaga Ta'avale Teuteuina, i le taeao o le To'ona'i, mai le Lotoa a le NAPA i Tafuna, fa'asolo i Fagatogo ma Aua, toe liliu mai i Fagatogo ma fa'amae'a ai i le Maketi i Fagatogo.

I lea tauvaga sa molimauina le tu'uina atoatoa i ai o le malosi ma le fai mea lelei o sui tauva ma o latou paaga ae maise o latou aiga, ina ia mautinoa e mausali teuteuga uma ua faia i ta'avale.

O le vaega lea o le tauvaga, e faamasinoina ese, e le taulia i le tauvaga o togi e sailia ai le pale o le Tausala Lalelei, peita'i o le a maua le fa'ailoga fa'apitoa mo le tapenaga tele. E aofia i nei fa'ailoga fa'apitoa le Tausala Atalelei, e fa'amasinoina lava lea e le Photogenix, ma le isi fo'i o le Tausala Tausa'afia lana amio, e sailia lea e le MASI lava ia.

I le afiafi o lea aso o le 'aiga fa'apitoa sa faia lea i le Tradewinds Hotel Poolside. I lea 'aiga sa taua'aoina ai e le MASI fa'ailoga fa'apitoa mo a latou pa'aga, i latou sa foa'i, aua le tauvaga tausala lalelei i le aso Faraile Oketopa 5, 2018, i le Gov. Rex Lee Auditorium.

O fa'ailoga sa tuuina atu i le Bluesky; TMO Wholesale; Argossy University Mr. Guerro; Visitors Bureau; ASEPA adopted Area; DOH Diabetes Awareness; TAOA, ASTCA; GHC Reids Beverage for Pageant; Tradewinds Hotel - VIP Dinner Alofa Mai Sponsorship; Photogenix; Paradise Pizza; Tautai Rentals; Shoe Tree; Island Floweras; All Stars & Ave Design; Western Union; Pacific Refrigerating; T& T Recycle; Tutuila Store Inc. & Johnson Family & Friends; KHJ/V103; KVZK-TV; ma le Samoa News.

Na faia fo'i sausaunoaga fa'apitoa a tausala o le a tauva ma latou pa'aga fa'apitoa o lo'o sapaia o latou fa'amoemoe. Ae o le taualuga o lena afiafi sa toe sausaunoa ai le tama'ita'i Tausala Lalelei o tutula'i i le tofi, fa'apea ma le avea fo'i ma Tausala Lalelei o le Pasefika atoa, Ms Matauaina Toomalatai.

O le taeao loa na soso'o ai, o le taeao e si'i a'e ai le fa'afetai ma avatu fa'apitoa ai le mana'oga o le MASI ma tausala tauva o lenei tausaga i le Atua i le sauniga sa faia lea i le Malumalu EFKAS i Onenoa.

Ina ua mae'a le sauniga sa ta'ita'ia lava ele fa'afeagaiga taulagi i le afio'aga, ma sa auai uma loa i le Paradise Pizza i Pago Pago mo le 'aiga o le aoauli ma ta'ape mai ai fo'i le fuamanusina.

POLOKALAMA SOS "PELEGA A E UA MALILIU" - OFISA O LE VA TAFUNA

Na fa'atasia e na vala'aulia fa'apitoa ae maise o pa'aga a le SOS - Polokalama mo Aiga i le Ofisa o le VA i Tafuna mo le latou polokalama fa'atino e fa'apa'iaina ai le lotoa ua mae'a totoina ai le Togala'au o le "Fa'amoemoe Misi Alofa" i e pele ua motusia le mafutaga mafana ona o le oti.

O lea fa'atasiga, sa auai le afioga le Sui Kovana o le Malo, Lemanu Peleti Mauga, nisi o fa'atonusili o le malo, sui o le US Army Reserve Maj. Ulisses Taymes ma lana soa, ae maise fo'i o le tama'ita'i na malaga mai fafo i le Health Services mo sui Militeri Lori Daniels LCSW.

O i latou fo'i na sa maua le avanoa muamua e saunoa ai e tusa o le fa'amoemoe, ina ua mae'a le sauniga lotu sa mua'i tapena i ai le susuga le Faife'au, Rev. Asiata mai le EFKAS i Matu'u ma Faganeanea.

Sa fa'ailoa lona lagona e tusa o le taumafaiga a le SOS ma ana pa'aga ina ia totoina ma tausia fa'apitoa se togala'au.

“E le faigofie, peita'i o Iesu sa ia aumaia le fa'ata'ita'iga lelei i lana aga sa faia pe a mae'a galuega fita o lea aso ma lea aso i ana savaliga tala'i le Malo o lona Tama, ma feagai ai ma lagona eseese o tagata na faia ia te ia. Sa maua sona taimi e nofonofo ai i le Togala'au o Ketesemane, i fafo o le faitoto'a o Ierusalema."

I le folasaga a Lemanu, sa ia fa'ailoa ai, "Faafetai i le galulue e tausaili ala e mafai ai ona ola feso'ota'i pea i tatou ma tatou pelega na tu'u atu e tautua le tatou malo tele i ala e tausia ai le saogalemu i o tatou laueleele ma le li'o o tatou aiga. E mautinoa fo'i mai i latou ua mae'a ona va'aia mea faigata e le'i masani ai, o'o i le tau ma le fili e le faigofie, ma ala fo'i o latou fa'atino ai nei tiute i le tafa o taua, e le fai i ai se faiaga pe fa'atalatu, ae matua ese mai le olaga o tatou ola ai i o tatou aiga ma lotoifale.”

"Fa'afetai lea e le o nofoa'i fo'i lo tatou a'apa atu ma fesoasoani i a latou pelega o totoe i aiga, o lo ua nonofo i latou ma lagona o'otia e ao ina faifai malie pea ona fa'ate'ate'a lemu atu e le Agaga o le Atua.  Fa'afetai i tina lagalaga i mea lelei, ua latou taumafai i lenei fo'i ala, e fa'anofo filemu i lagona misialofa ma ia taumafai atili e fa'asolosolo lemu le olaga, e ui ina ua le toe i ai i latou nei i le mafutaga i le tino nei."

Fa'ailoa e le tama'ita'i o Lori Daniels, "E iloga manu'aga o le tino e ave i le falema'i e togafitia ai, peita'i o lagona o'otia alofa mai totonu o le fatu ma le loto, e leai sona vaifofo, ma aafia moni a le tagata atoa, ae le iloa atu se isi mea nai lo le fa'anoanoa i ona fofoga, o le a se togafiti i lea tulaga? Ia fa'atalatalanoa, fa'afiafia ia te ia, a'o ia fo'i e ao ina nofonofo i se togala'au fuamanogi ma le matagofie, e toe fa'ao'o ai i lona agaga, e taua lona ola pea, ma savali i puapuaga o le loto ua o'o mai."

O le Mau ia Fausia se Aiga Fiafia sa o'o atu ai le tama'ita'i o Naomi Vai mo le tele o folasaga fa'apitoa e tusa o Sauaga Eseese i totonu o le Li'o o le Aiga. Ina ia taofia le toe omia o lagona o le fanau, ia matua puipuia lelei ma va'aia lelei i latou ae le o le fa'atauga, fa'atasi ai ai fo'i le anoanoa'i o tima'iga, ia taofia fo'i ma sauaga i tina.