Ads by Google Ads by Google

TALA I VAIFANUA


Meaalofa sa tuu fa’atasia mai e le Rotaract Club e aofia ai ma meaalofa uma na fa’atauina i le foa’i a le BlueSky Amerika Samoa, ina ia tufatufaina atu o fanauiti uma i le atunuu, ua nofoia le Pediatric Ward ma asiasi ane i le DHSS e fa’auia atu ai I fanau a le atunuu. [ata: Leua Aiono Frost]

Pago Pago, AMERIKA SAMOA

$2,000 FOA’I A LE BLUESKY MO MEATA’ALO A LE FANAUITI - AOINA E LE ROTARACT CLUB:

Sa le misia fo’i se avanoa lelei e le Kamupani a le BlueSky Amerika Samoa le avanoa lelei mo le latou foa’i mo le fanauiti, e ala i le fesoasoani atu lea i le Rotaract Club Amerika Samoa, e saili ni meata’alo i vaitau fiafia o le tausaga.

 Ua fiafia le tamaitai o Tiara Drabble e fa’ailoa mai e $2,000. le tau aofa’i o mea ta’alo ua taua’aoina mai e le pulega a le BlueSky mo lea fa’amoemoe, ma o se foa’i ua matua iloga ona fa’afiafiaina ai i latou uma o sui talavou o totino o le Rotaract Club, lea sa matua’ina lea fa’amoemoe, ina ia taua’aoina i fanau uma lava o le atunuu, e gasolo ane i le DHSS mo latou tautua eseese mo i latou, ae o nisi fo’i o lo’o tausia fa’apitoa i le Pediatirc Ward i lenei vaitau fiafia o le tausaga.

“O le fanau lava latou e matua fa’afiafiaina ma latou naunau ia maua se meata’alo i le Kerisimasi ma le Tausaga Fou, ao gasolo mai i latou mo talavai e agava’a ai i latou penefiti nei i le DHSS, ia o le a fa’afiafiaina ai i latou i nei meata’alo ua saunia mo i latou, e ala i le sao o le Rotaract Club, ae o lea ua una’ia malosi nei e le foa’i matagofie a le BlueSky.” O se tala lea a Tiara Drabble, peresetene o le Rotaract Club.

Saunoa le pule a le Bluesky, Paul Young, “O le taumafaiga a le Rotaract ua iloga ai se fesoasoani e le fa’atuaoia i lenei vaitau, mo le fanau. O se sao fo’i e fa’afiafiaina ai agaga o le fanau uma a Amerika Samoa o le a umia se meaalofa mai lea galuega lelei. Ua matou va’aia se avanoa e tausoa ai lea lagona lele, ma ua manatu e fa’atino fo’i le alofa lea ia manuia le taumafaiga.”

Ua mae’a faao’o nisi o nei meaalofa i le fanau o taofia gasegase i le Pediatric Ward o le falemai tele i Faga’alu, o fanau o tausia fa’apitoa i Nofoaga o Tina ma fanau ua sauaina i o latou aiga. Ua mae’a fa’ao’o nisi meaalofa i le fanau o nofosala, ma ua tuuina le tele o meaalofa, pe afai e gasolo ane aiga o lo’o tausia fanau i penefiti mai le DHSS, e mafai ona tuuina i ai meaalofa nei e tina faigaluega o lea matagaluega o Alamanuia Lautele mo Tagata o le atunuu.

O le Rotaract Club o le Kalapu totino lea a le Rotary Club o Amerika Samoa ua fa’atulaia mo le tupulaga talavou ina ia latou una’ia ma fa’atautaia le tele o galuega e aoga mo le mamalu lautele o Amerika Samoa, ae ua sapaia a’ia’i fo’i latou taumafiga uma e le Rotary Club i taimi uma.

LE MAUA LE TINO MALIU O AUNUU CHEN I LE SAMI – TAOFIA FO’I SAILIGA:

O le aoauli o le aso Lulu ua te’a na taofia aloaia ai le sailiga a le Vaega o Leoleo o le Gataifale (Marine Patrol), ina ua atoa le 72 itula o faia pea nei sailiga i le tino o Aunuu Chen i Leala, Vailoa. Na molimauina e nisi sa latou i ai fa’atasi i lea aso le tafea ese atu o ia ma leiloa ai lona tino ile sami, ua le toe maua lava.

E ui la ina ua mae’a lea sailiga, ae sa va’aia le le’I taofia o suesuega a le aiga o Aunu’u, ma sa latou fa’asalalau atu i va’a fagota ma va’aoloa, ia alofagia ma fa’ailoa ane ia I latou pe a latou tau ane i lona tino maliu.

Ua atoa le 39 tausaga o le ali’i faipisinisi, ua tupu fo’i lenei fa’alavelave ae ua toe o se aga lava tatala lana pisinisi tumaoti mai ona uso ma le tuafafine, le “Next Door Eats” e soso’o ma le Aiport Way Gas Station i Tafuna.

O Aunuu ma nisi e to’afa sa fagogota ma ua masani ai lava ona fagota o ia i Leala, peita’i sa molimauina e i latou sa i ai, na tafea ese atu Aunuu i le moana loloto, ona o le malosi o galu, ma le toe iloa atu ai lava.

“O Aunuu ua fa’ailoa mai e nisi o le aufaigaluega, “O le tama Samoa moni lava lea a le aiga, o ona uiga e pei lava o le Samoa ae le se tasi o le aufaipisinisi. E fa’amasani gofie, e le se tasi e iloga mai e pule i se mea pe a matou faigaluega faatasi i aso uma. E fiafia tele o ia e fagota ma o se tasi o mea e fiafia e fai.”

“I le matou galuega, e fiafia matou e fesili i ai i mea e fai, peita’i ua faigata tele lenei mea ua tupu mai, e leai ma se manatu o le a oo le mafutaga ina motusia fa’apea, a’o lona tino fo’i ia toe maua tasi mai lava.” O tala ia a nisi talavou e masani ona fuifui ma faigaluega fa’atasi ma Aunuu i a latou pisinisi, Tutuila Store.

Fa’ailoa fo’i e si ona tuafafine, “Pe fia afe ni tala e faia, e le toe maua mai lava oe, ua mae’a faia na tala uma, ae ua mou atu lava oe i le va’ai ma le mafutaga. Pe fia afe fo’i loimata maligi, e te le toe fo’i mai lava.”

O Aunuu o le lona tolu lea o le fanau a Jane ma Perry Chen, o nisi o tagatanuu o Taiwan na fa’amautu mai i Amerika Samoa i le tausaga e 1977.

Na amata mai ana a’oa’oga i le Samoa Baptist ma fa’aiu ane i le South Pacific Academy ma siitia ai i fafo ana aoaoga i le Iunivesite o Hawaii, Manoa. I le taimi nei, e le o iinei Jane ma Perry Chen ona o lo ua poloka fo’i feoa’iga, a’o i ai i la’ua i Taiwan. Peita’i, o le galuega lava a Aunuu e fa’atino o le fesoasoani  i le Pulega o pisinisi a le latou aiga.

I le taimi nei o lo’o ma’itaga si ona to’alua o Megan, ma o lo’o tau mo le fa’ai’uga o lenei tausaga, ae o lenei ua ta’imua mai lenei fa’alavelave i le tama o le aiga. Ua to’afa ai le fanau.

Fa’amaise le Agaga o le Atua i le tina ma le fanau ae maise le aiga atoa, ona o le oti ua fa’asalavei i le olagama pelega o aiga.

TOE UPU APOAPOAI – KOVANA LOLO MOLIGA:

I lana toe saunoaga mo Aso Fiafia i toe taimi o lana nofoaiga, sa fa’apa’i malu mai ai lana afioga Kovana Lolo Moliga i finagalo o’otia, ona o le taofia pea o ala o feoaiga, ona o le manatu lava i le saogalemu o le atunuu.

 “O lo ua matou iloa lelei le ootia o agaga ma loto ona o le mafutaga ua le mafai ona maua i lenei vaitau o le tausaga, aua ua tapunia ala o feoa’iga. Ua tatou ala tutusa i lena faigata, ina ia maua pea le saogalemu o le atunuu atoa mai le fa’ama’i mata’utia o lo ua i faitoto’a lava le oo mai. Ia avea ia le agaga moni o le Kerisimasi e fa’anofofale ai lagona o le fa’afetai ma le vi’iga i le Atua, aua o lo ua malutia pea i tatou uma i ona a’ao alofa. I latou o lo o opea i fafo atu o le atunuu ona o lenei fa’asa, ua matou lagonaina lo outou tiga, tau ina ia maua le agaga o le filemu ma le fa’amagalo i o outou loto, e taga’i toto’a ai i le agaga moni o le mau o lo ua mafua ai. O le saogalemu lava o tatou aiga e to’atele o lo’o tumau i o tatou laufanua nei ma isi e to’atele o le atunuu.”

“Avea foi lenei avanoa e ma te fa’ailoa atu ai, le taua tele ia te’i ma’ua o outou taito’atasi sa galulue ma tautua le atunuu i so’o se ala, i so’o se vaega o le auaunaga lautele, fa’afetai tele mo latou sapaia o i ma’ua ma a outou tatalo sa maua ai le malosi e fa’atautaia ai tiute ma faiva a’o tatou folau mai i le 8 tausaga o lenei nofoa’iga. Fa’afetai mo a outou talosaga uma sa molia mo i ma’ua ma le ta’ita’iga o le tatou malo. Fa’afetai le tapua’iga ma sa ma’ua lagonaina le mafanafana o a outou talosaga molia ona o le fa’atasi mai o le Atua i so’o se taumafaiga sa lu’ia ai i ma’ua.”

“Ia manuia le Kerisimasi Amerika Samoa, tau ina tatou aulia le tausaga fou ma le manuia.”

(O le lomiga o le folasaga atoa a le Kovana Sili, sa lomia I le lomiga a le Samoa News I le Aso Tofi, Tesema 24, 2020.)

FOA’I LE SOFIAS I LE FANAUITI I LE FALEMA’I:

Ua mae’a faia se foa’i masani a le SOFIAS, e ona fa’atulaga i tausaga ta’itasi, e foa’i ai e i latou mea ta’alo mo le fanau iti o lo’o taofia o latou gasegase i le Pediatric Ward. Ua fa’aopoopo e i latou nisi mea o le foa’i i lenei tausaga, ua saunia ai teu fugala’au mo le vasega o tama’ita’i tausimai i le Ward a tamaiti.

O le Sosaiete O Fa’afafine I Amerika Samoa, o i latou nei ua lauiloa lo latou fai mea lelei i le atunuu, ua i ai fo’i a latou foai e faatutu aga’i i le fesoasoani atu i le tausiga o matua matutua ma e gasegase tumau i le nofoaga o fa’amoemoega, le Hope House i Fatuiaiga, i tausaga ta’itasi.

I lenei tausaga, ua foliga mai e to’aititi lava sui o le SOFIAS sa auai, ma ua fa’ailoa mai i se fa’amatalaga a se tasi o sui iloga, “O le tausaga nei ua le gata ina lutia le lalolagi atoa e le COVID-19, ae ua lutia atu ai ma le fa’alapotopotoga lenei. Peita’i o le fa’amoemoe e muta ai, e galulue pea ma atina’e le taumafaiga ia tumau le fa’amoemoe lelei.”

O lo ua i ai nei sui iloga o lenei fa’alapotopotoga i fafo, le peresetene o Trina Ve’e Tuimaleali’ifano ma le tausala sa filifilia o lenei tausaga, Vanessa Simanu, ae ua fa’ailoa mai o lo’o taumafai atili i la’ua nei e faia fa’aaliga i fafo, ma latou saili ai seleni mo poloketi aoga tele a le SOFIAS ia fa’ataunuu lava.

O le tamaitai o Athena Mauga ma le tina o Ms Siamanu, sa auai i la’ua na i le tufatufaga o meata’alo mo le fanau e avea o se fe’au taua e fa’ailoa ai le agaga foa’i o se tasi mo i latou, ma ia fa’afiafiaina i latou a’o gafa ai ma tiga o le tino ma’I ma taumafaiga mo togafitiga.

Sa fa’afetaia e le vasega o tausima’i ma foma’i le galuega alofa ua saunia fo’I e le SOFIAS, aua o le tino o le tagata e fa’afiafiaina, e vave ona ulufia i ai vaifofo i ona gasegase o fa’ataumaoia ai.