Ads by Google Ads by Google

Tala I Vaifanua


O le susuga le Lt. Col. Ulu Elia Porter (itu taumatau), lea ua tatalia nei lona fa'apinega i lea tofiga fou ua galue ai fo'i o ia i le Weed Army Community Health Hospital i Irwin, Kalefonia. O ia lenei o le ui'i o le fanau e to'avalu a le susuga Robert Asoau and Falefa Tela Porter o Fagatogo ma le Manu'atele. [ata: foa'i]

LT. COL. ULU ELIA PORTER SI'ITIA TOFIGA A'O GALUE I LE WACH

 

O se alo o Amerika Samoa, Ulu Elia Porter, ua si'itia lona tofiga i le Leutenant Colonel a'o galue o le Chief of Beahavioral Health i le falema'i o le Weed Army Community Hospital (WACH) i Fort Irwin, Kalefonia. O se taimi lata mai nei e fa’atulaga ai le sauniga mo le fa’apine ina i lea tofiga fou.

 

Ua atoa le 16 tausaga o lana tautua i le US Army, peita'i ua mafuli nei o ia e saili lona tusipasi maualuga "Doctorate" i le Social Work i le Iunivesite o Southern California ina ia mafai ona ia fesoasoani malosi i fa'aitiitia le femisa'i o ulugali'i i totonu o le Militeri a'o tautua o ni fitafita.

 

O Porter na fa’au’u mai i le Samoana High ma fa'au'u atu ai, ma ulufale atu ai fo'i i le US Army. O ia o le alo o Robert Asoau Porter, ua maliu o ia i Hawaii ma ua lagomau ai, ma le faletua o Falefa Tela o Faleasao, Manu'a. O lo'o soifua pea lenei tina ma ua alaala tumau i le setete o Washington aua o lo'o tautua fo'i se tasi o ona alo tama'ita'i MaryJane Porter i le US Army.

 

Ina ua fesiligia lenei ali’i mai Fagatogo ma le Manu'atele i sona taofi ua ia taumafai ai e matua mautu lana tautua i le Behavioral Health, ae ia fa'aalia ai, "O le to'atele o uso ma tuafafine Samoa i le militeri, e matele ina manatu o matou aiga ua fo'i atu i le militeri o le tama ua toa ma ua gafatia e i latou ona fa'afetauia fa'afitauli e tele ona sa avea ma fitafita, peita'i, e matua leai se faigofie o ia te'i matou ona toe to'i mai i le mafutaga e pei ona sa i ai a'o le'i tu'ua laiga ma le atunu'u pele."

 

"O mea uma sa koleni ai, toe o'o ina tiute i tafa o taua, e matua mana'omia ona malamalama toto'a le mamalu o le atunu'u, e le'i faigofie na mea ona soifua se tasi ma toe tepa i ai, ae fa'afetai e i ai le malosi o mafaufau o fanau a Samoa e gafatia ona tau'avea nei mea mamafatu i o latou mafaufau. O nisi e faigofie ona toe fa'apeleni mai uiga tuai ma tausa'afia, ae i ai nisi e matua le faigofie lava, ma i'u ai ina fa'apea nisi o e pele ia i matou, ua leaga ulu o tama na."

 

O le afuaga a Porter mo lana kosi o tau'avea nei, ina ia mafai ona fesoasoani i uso ma tuafafine sa tautiga i tiute fa'amiliteri. O togafitiga ma taumafaiga ina ia toe fa'afo'i le mafaufautonu i fitafita e ao lava ina tapena lelei fo'i foma'i fa'apitoa.

 

"E galulue fa'atasi le aufaigaluega i le Falema'i i WACH ma lana aufaigaluega tofia ina ia fa'aleleia atili le feso'ota'iga a aiga ma e sa tautua o fitafita i tafa o taua, ia fa'ao'o atu ni togaifitiga e ala i vaila'au e inumua po'o tui, ina ia mafai ona toe fa'afo'i le fiafia i le li'o o lea aiga, ae maise fo'i o lana aganu'u sa soifua a'e ai, ia mataituina ona fo'i a'afiaga i lona toe soifua fa'aauau ai."

 

“I koleniga e fa'atino a'o le'i malaga ese atu le fitafita e tiute i tafa o taua, e matua fa'ao'o ia i latou koleniga e tusa lava o se aso sili ona faigata i tauga o le a feagai ai ma fitafita. Ia tutupu a'e nei mea, ae ua silafia lelei e fitafita aga e faia e fa'asaoina ai lo latou soifua. "Ia mau tagata lava le fitafita e fa'asao lona ola, ona ua mae'a kolenia fa'apitoa i latou i ni mea e tutupu a'o tiute i latou i nofoaga o vevesi,” o se tala tusia lea a Porter.

 

TAPUNIA FALEMA'I TAFUNA MOTUSIA INITENETI

 

Ona ua motusia feso'ota'iga fa'a-Initeneti i le va o le falema'i LBJ i Faga'alu ma le Falema'i Fa'aitumalo i Tafuna, ua le mafai ai ona maua fa'amaumauga o tagata o lo'o lisia i a latou masini komipiuta mo talavai i Tafuna.

 

O le Aso Lulu ma le Aso Tofi na motusia ai lea feso’otaiga.

 

Na maua ni vala'au mai tagata lautele sa gasolo atu i lea falema'i i Tafuna ma fa'ailoa mai ai latou lagona o'otia aua ua o'o atu ma fa'atalitali, ae toe fa'ailoa mai le tala, ua le faia ni talavai. Na toe fa'aauau mai isi i le falema'i i Faga'alu ae o nisi na fa'aaogaina Leone, aua e mautinoa lava o le a to'atele na'ua i latou e uia Faga'alu i ia taeao.

 

"Pe afai e motusia laina nei fa'afeso'ota'i a le Initeneti, e le mafai e le vasega o foma'i ona latou iloa uma talavai a gasegase nei ua o'o atu ia i latou mo siakiga. O le a le mafai fo'i ona iloa e tama'ita'i tausima'i tiute po'o a togafitiga e ao ina latou faia i le gasegase, atoa ai ma le itu e tala mai ai vaila'au, e le mailoa fo'i vaila'au po'o fuala'au e ao ina avatua i le gasegase lava e tasi, mo ona togafitiga. O fa'amaumauga nei e ao ina mailoa, e atoatoa lelei mo tagata uma ua gasegase ua o'o atu mo togafitiga, ae tatau fo'i ona mautu i o latou faila, aua le isi talavai e soso'o mai,” o se tala lea a se tasi na talia maia le telefoni i le falema'i i Tafuna.

 

Ua faailoa mai, ua mae'a soalaupule uma tulaga e ao ina fa'atautaia e le latou fo'i falema'i fa'aleitumalo, ina ia mautinoa ai ua toe fa'aola laina o feso'ota'iga ma le ASTCA, ae ua fai fo'i sina tele o le latou pili i le Bluesky lea sa latou fa'aaogaina o le kamupani mo nei feso'ota'iga.

 

Ua toe tatalaina nei le tautua, ma ua mae'a fo'i ona fa'ataoto le feagaiga mo le totogia o lea so'otaga ae ua suia nei i le ASTCA mo le taimi nei.

 

ELIZABETH PERRI KOMESINA LE TUMAU O INISIUA

 

Ua fa'alauiloa mai e le Ofisa o le Kovana le suiga fou fo'i i le tofiga Komesina o Inisiua, lea ua tofia ai le faletua o Elizabeth Perri na te va'aia le tumau mo le taimi nei.

 

O lea tofiga sa tutula'i ai le susuga Peter Fuimaono ma sa tofia i ai o ia e Kovana Lolo Moliga i le amataga o lenei fo'i nofoa'iga ia Ianuari 2017.

 

O se tusi na fa'auia mai i Ofisa uma o le Malo ae sainia e lana afioga le Lutena Kovana Lemana Peleti Mauga, ua fa'alauiloa ai lea suiga fou.

 

I lea lava tusitusiga sa ia fa'ailoa ai, "Ona o lo'o taumafai pea i tatou e fa'amautu mai ni a tatou vaega tupe totogia mai Inisiua mo meatotino a le Malo ua fa'aleagaina e le ‘afa o Gita, fa'amolemole ia galulue fa'atasi ma Elizabeth Perri ma lana aufaigaluega ina ia mautinoa e tatau ona maua mai e le Malo o Amerika Samoa ana vaega tupe ua agava'a ai mai Inisiua sa faia ai tatou feagaiga mo meatotino uma tau fale ma mea faigaluega ua fa'aleagaina i fa'alavelave fa'anatura fa'afuase'i, le afa o Gita.”

 

O fa'afesili uma ma lisi o aseta ua fa'aleagaina, e ao ina fa'auia le Ofisa o Perri a'o tatalia se tofiga fou a le Kovana i lea fo'i itu o le Malo.