Ads by Google Ads by Google

Tala I Vaifanua


[ata: foa'i]

FA’ATAMA’IA MEA’AI TOE FA’APIPI’IA LEIPO AMERIKA SAMOA

 

Ua a’amaonia ma ua taulimaina e le  suesuega a le Enviromental Heath division a le Matagaluega o le Soifua Maloloina le tulaga o Oloa gaosia i nisi atunuu ae ua toe tu’u i ai leipo a Amerika Samoa, ma ua fa’atau atu i le mamalu o le atunu’u atoa.

 

Ua aofia i nei oloa o M&M, gummy worms, cookies, sunflower seeds, pinati ma pepa ti fo’i. Ua le fa’atau atu oloa nei i o latou pusa gaosia lelei ma o lo’o aofia ai le tele o fa’amatalaga aoga mo le silafia a le tagata fa’atau, ae ua toe fao tagapepa ma fa’atau atu i le tau taugofie. O lea faiga ua fa’aataugofie atili ai le oloa gaosi, ma ua mafai ai ona piki e le mamalu lautele mo latou fanau.

 

 O le leaga la, ona ua le lomia nei le fa’aupuga ua mae’a lomia i le taga na fa’atau mai ai e le faipisinisi le oloa, ma ua leai fo’i la se silafia o i ai o tagata fa’atau, pe mata o lea oloa e le o toe agatonu mo le taumafa a lona aiga, ona ua le toe aoga mo le fofoga taumafa aua ua uma le taimi sa tatau ona fa’aaogaina ai.

 

A’o le sese e sili ona leaga, ua solituina ai e le fa’atau ‘oa ma le faleoloa o faia lea tulaga, tulafono a Amerika Samoa. O ia tulafono ma aiaiga e fa’alauiloa i fefa’ataua’iga, “Aiaiga o Leipo mo Oloa Gaosi,” lea e lisia i le tulafono Amerika Samoa - ASCA Title 25 Chapter 6.

 

E ese mai loa fo’i ae o se vaega fo’i o le tulafono Amerika Samoa Title 27 Chapter 6 - lea e manino lelei ai le fa’ailoaga e le leipo o se oloa gaosia o mea uma o aofia i le gaosiga o lea oloa ma tu’upepa pe tu’uapa mo fefa’ataua’iga.

 

“O le taumafaiga lenei, ona o lea ua matua tu’u mai le fa’atuatuaga atoa o le mamalu o taita’i o le atunu’u, e taofia faiga sese tau oloa fa’atau atu i le mamalu lautele, ia taofiofi mai fo’i auala nei mai le fa’ataunu’u pea, ina ia mautinoa o saogalemu le soifua laulelei o le atunu’u mai fa’ama’i e ona fa’apo’ia ai, aua e tolu lava mea e vave tele ona a’afia ai le soifua maloloina o le tagata; O le ea e manavaina, o le mea’ai e taumafa ai, ma le vaiinu sa e inumia,” o se tala lea a le susuga John Fuimaono o le DOH Public Health & Environmental Health.

 

$1.5MILIONA FA’ALELEIA ALATELE SA LEAGA I LE AFA O GITA:

 

O auala sa fa’aleagaina i le afa o Gita ia Fepuari 2018 ua maua mai ai nei le tinoitupe mai le Matagaluega o Feoaiga ma Fela’ua’iga a le Malo tele e $1.5miliona mo Amerika Samoa.

 

O le fa’alauiloaga o lea tinoitupe ua fa’atulaga mai mo le tatou atunuu, sa fa’aalia ai e Aumua Amata le tatou sui i le Konekeresi, “Ua tatou maua fo’i lenei tinoitupe ina ia fesoasoani atili i galuega toe fa’aleleia o le tatou atunu’u ona o a’afiaga o auala mo feoa’iga ona o le afa tele o Gita.”

 

Ua fa’ailoa mai fo’i e patino lea tinoitupe i le Matagaluega o Galuega Lautele a le Malo o Amerika Samoa.

 

Ua fa’atulaga galuega uma tau le alatele, ma ona alavai ma ona auvai e sopoia ai, e tatau ona fa’aleleia atili e fa’aaogaina ai lea tinoitupe. Ua fa’apea fo’i ona faailoa mai ai le agaga fa’afetai tele o Aumua ona o lenei vaega tupe. Ua ia fa’afetaia foi le tama’ita’i fa’atonu o Galuega Lautele a le tatou malo, Faleosina Faiai Voigt ma i latou uma o le matagaluega ua latou tu’ufa’atasia lea lipoti ua maua ai lea alagatupe.

 

MISS SAMOA NEW ZEALND MANUMALO TAUVAGA TAUSALA SAMOA 2019-2020

 

I lipoti mai Samoa o lo’o faailoa ai i le tauvaga tausala lalelei a Samoa ua fa’amanuiaina ai le taumafaiga a le tamaita’i sa tauva mai o le Tausala Lalelei  o Tagata Samoa Niu Sila, le tamaita’i o Fonoifafo McFarland Seumanu.

 

Ua fa’ailoa mai, na maua e Seumanu le manumalo i le tauvaga Taleni ma le Fesili ma Tali, o i’ina lava na mautinoa ai e pale o ia i le tofi Tausala Lalelei o Samoa.”

 

Peita’i o le tamaita’i ua tulaga lua o lo’o alaala i New South Wales, Ausetalia, Fetui Tuetue lea fo’i sa ia avea le fa’ailoga fa’apitoa mo le Puletasi sili ona mata’ina i lea tauvaga atoa.

 

O Semanu, o le a avea ma sui o Samoa e tauva mo le tofi Tausala Lalelei o le Pasefika lea e tauaofia i Papua Niu Kini i se taimi e le o toe mamao.

 

O le tulaga tolu i le tauvaga lenei o le Tausala Samoa mai Los Angeles, Amerika lea sa ia mauaina le fa’ailoga mo le Ofu Samoa moni sili ona mata’ina, maua fo’i le fa’ailoga o le Ofu Taele tulaga muamua ma le fa’ailoga fo’i o i latou e sili ona to’atele ua filifilia o ia e avea ma tausala lalelei i laina o feso’ota’iga fa’ainiteneti.

 

$250,000 - TAOFIA FA’AAOGA SESE O VAILA’AU O’ONA & FA’ASAINA:

 

Ua sauni nei Amerika Samoa e maua le aotelega e $250,000 mai le vaega tupe na atofa mo setete ma teritori o Amerika, e taofiofi ai le so’ona fa’aaogaina sese o vaila’au o’ona ma le fa’asaina mai le so’ona fa’aaoga e tagata lautele.

 

O lea tinoitupe e mai le State Opiod Response Program, lea e fa’atautaia e le Substance Abuse & Mental Health Services Admin & Centers for Disease Control [CDC]. O le fuafuaga o lenei polokalama na mua’i fa’atula’ia mai e le Food & Drug Administration i le tausaga e 2017.

 

Ona o le fa’ateleina pea o nisi e latou tima’ia le tulaga o le taofiofi mai o le fa’aaogaina pea o vaila’au ma fuala’au o’ona ma e faasaina, o lea ua gaua’i ai le FDA ina ia latou fa’atula’ia lea polokalama, e mafai ai ona va’ai toto’a i le tulaga so’ona fa’aaogaina o nei vaila’au ma fuala’au fa’asaina, ma ua atili ai ona to’atele i latou e mana’omia ona fa’aaogaina fuala’au nei, atoa ma le avea ai ma masani e le motusia le fa’aaogaina pea o nei fuala’au ma vaila’au o’ona ma e fa’asaina.

 

O se vaega lelei o lea fuafuaga fa’ataoto, ua fa’amautu ai le galulue fa’atasi ma le fe’oe’oea’i o i latou  e faufautua i e agava’a i le polokalama, a’o le’i faliu i latou e fa’aaogaina nei fuala’au ma vaila’au o’ona toe fa’asaina i ni togafitiga

 

E mana’omia tele faamaumauga tonu ma ia fa’auia fa’amaumauga uma i le FDA.

 

E ese mai lea ua fa’alauiloa mai fo’i le isi $100,000 mo Amerika Samoa mai le tinoitupe a le Land & Water Consevation, o lea tupe e fa’auia mai i le tatou National Park Services.