Ads by Google Ads by Google

Tala I Vaifanua


Taimi o lo'o tolaulauina mana'oga fa'apitoa mo le talosaga aloa'ia a le aofia na poto i le Misisa Pa'ia i le Malumalu Aiga Pa'ia i Fatuoaiga - "Le talosaga ina ia talosia sui ua muamua atu o le mafutaga a tama malisi tuai, ina ia fa'afetaia i latou i lo latou sao sa fesoasoani ai i lenei Laumua, le atunu'u ma le Malo ae maise i le Ekalesia, o le talosaga lea i le Ali'i." [ata: Leua Aiono Frost]

O le vasega o Tama Tuai a le Aoga Maualuga a Malisi i Amerika Samoa ua vaevaeina i vaitausaga e fa ina ia latou fa'atautaia aso patino ta'itasi mo fa'amoemoega uma ua fa'atulaga e fa'amanatuina ai le atoaga o le 50 tausaga talu ona fa'atula'ia le a'oga maualuga a Malisi i Amerika Samoa. [ata: Leua Aiono Frost]

FA'AILOGAINA 50 TAUSAGA AOGA MAUALUGA A MALISI:

 

Na tatala aloa'ia le fa'amanatuga o le 50 tausaga talu ona fa'avae le A'oga Maualuga a Malisi i Amerika Samoa, i le sauniga pa'ia o le Misisa i le Malumalu o le Aiga Pa'ia i Fatuoaiga. Sa ta'ita'ia fo'i e se tasi o le Komiti Fa'afoe o le Tapenaga mo le 50 tausaga o le Malisi, le afioga Moseniolo Viane Etuale.

 

I le sauiga sa ia tula'i ai mo le Upu a le Atua e folafolaina e fa'amalosi'au fo'i i le vasega o tama tuai sa autova'a i lea Laumua, ina ia tutula'i mai ma le toto'a e tautua le atunu'u lautele ma lana faigamalo, ae maise o lona fa'avaemau e lagolagosua ina ia aluga lelei le malo o Amerika Samoa, le vasega o pisinisi tumaoti ma le aufaifa'ato'aga.

 

Peita'i a'o le'i saunoa o ia i lana lauga fa'apitoa, na ia fa'ailoa mai nisi o taimi taua o tala'aga o le A'oga Maualuga a Malisi.

 

"I le tausaga e 1904 na fa'ato'a ai le Ekalesia Katoliko i Leone. Ona o'o lea i le tausaga e 1915 ua amata ona fa'ato'a le fanua ma amata nofoia le eleele i Atu'u, le nofoaga fo'i lea na amata ai le A'oga a Felela ma ua fa'asolo ina avea fo'i ma ulua'i nofoaga o le a'oga a Malisi i le tausaga e 1969."

 

"Peita'i e na'o le tolu lava tausaga na fa'atula'ia ai le a'oga i Atu'u ae toe si'itia le a'oga i le Malae i Malaeloa, lea na fa'atula'ia tumau ai loa. O le to'a 32 o le fanau a'oga na amatalia ai le a'oga, o i latou lava fo'i na sa tautiga i le taumafaiga e fela'ua'i le tele o mea uma, ina ia fa'avae tumau i Malaeloa."

 

"I le tausaga 1973 na mua'i faia ai le fa'au'uga o le vasega 12 i lea Laumua, ma sa fa'au'u ai sui e to'alua o totoe nei, Fiu Johnny Saelua, Taulapapa William Sword ma le tofa Fagafaga Daniel Langkilde, toe lava o se aga ona aulia mai lenei 50 tausaga o le laumua sa utuvai ai."

 

Mai lea fo'i vaitau, sa ia faailoa mai ai sui patino e to'alua o ta'ita'i o le Ekalesia Katoliko i le Teritori. "Mai le amataga mai o lenei fa'amoemoe sa avea lava le afioga Katinale Pio Taofinu'u ma Ta'ita'i o le Pule'aga Samoa ma Pago Pago, ma e 18 tausaga o lea tautua mata'ina, o le ta'ita'iga a Bishop Quinn Weitzel e 27 tausaga ma le ta'ita'iga a Bishop Peter Brown ua atoa nei le lima tausaga."

 

Sa ia fa'aleo fo'i le fa'afetai i le vasega o faia'oga muamua lava i lenei aoga, le vasega o Felela, o faia'oga taulele'a sa gasolo mai fo'i, ina ia a'otauina tupulaga o Amerika Samoa i lena vaitau.

 

"Ua le vaea le fa'afetai tele, aua o Felela sa autova'a mai o faia'oga sili ona onosa'i, lelei i le faiva o le a'oa'o mai o i matou, ae maise o le fa'avae mai o ni fanau a'oga ua aoga i le malo, ekalesia, pisinisi ma aiga o Amerika Samoa i lenei vaitau o le soifuaga. Ua ia te'i tatou le Fa'amasino, le Loia Sili, le Pule o tagata faigaluega o le Ofisa o le Kovana Sili o le atunu'u, ua ia te'i tatou fo'i le Fa'atonu o le Pulega o le Suau'u, ua i ai ma Foma'i, o Faufautua Fa'aloia a le Malo, ua iloga le latou galuega sa faia i na vaitau, ina ia atamamai i matou.s"

 

"O le tausaga 2011 na tapunia aloa'ia ai le Laumua i Malaeloa, ae ua tu'ufa'atasia ma le a'oga a tama'ita'i, le A'oga maualuga a Fa'asao, lea ua fa'asuafaina nei Fa'asao Marist High. Tusa lava pe ua tu'ufa'atasia, ae o lo'o fa'aauau pea ona fa'atumau le igoa Marist High. O le afuaga lena o lenei vaiaso atoa, ina ia tatou patipatia faiva o le a'oa'o atu sa fa'atino e Felela ma fa'asolo mai ai i faia'oga o na vaitau tau amata ona tu'ufeula le mulia'a, lea ua fa'asolosolo ai pea ona fa'aleleia a'oa'oga i Fa'asao Marist High i lenei vaitau."

 

"O le mea moni, e tusa po'o le a lava le to'alaiti o tupulaga o lo'o autova'a i lenei Laumua, ae mautinoa e afua mai Onenoa se'ia pa'ia Fagali'i, o lo'o alaala ai lava se tasi o tama tuai a le Malisi” i le teritori.

 

O le fa'afetai mulimuli i le Kovana ma le Faigamalo i mea uma e augani atu ai mo se fesoasoani, e le o taliesea lava. Fa'afetai i matua, aua sa le pa'ole le latou taumafaiga ina ia popoto fanau, ma latou fa'asoasoa seleni itiiti sa maua, ina ia totogia ai a'oga a latou fanau, mai le amataga o Malisi lea ua atoa nei le 50 tausaga.

 

Ua ma’ea fa’atulaga polokalama atoa o lenei vaiaso mo le fa’amanatuina o le 50 tausaga.

 

MATAGOFIE FA'AMANATUINA 20 TAUSAGA BLUESKY AMERIKA SAMOA

 

Na matua fa'afiafiaina mamalu lautele o le atunu'u sa mafai ona fa'atasi ane i le Malae o Suigaula a le Atuvasa i Utulei, e maimoaina ma auai i le tele o fa'afiafiaga na tapena lelei e le Bluesky Amerika Samoa mo le fa'amanatuina o le latou 20 tausaga talu ona fa’avae i le teritori.

 

E tele faleie sa folasia ai oloa eseese, o ta'aloga o so'o se ituaiga, sa fa'atulaga mo le fa'afiafiaina o le mamalu lautele na auai, ae maise o le aufaigaluega a le Bluesky Amerika Samoa ma o latou aiga uma. E le gata i lea sa fa'atulaga fo'i se vaega o le sami mo a latou ta'aloga i luga o le vai, o se tasi fo'i o mata'aga sa fa'afiafia atili ai le fanau. Sa i ai foi fale’aiga.

 

Na i ai fo'i le avanoa o le ali'i pese lauiloa o Fiji ma nisi o lana au fa'aili atofa mo le taina o ana pesega. O se isi fo'i sa taito'aluaina le ali'i pese o Fiji, o le ali'i lea o Big Boy Cisco ma le au USOs mai USA.

 

AMATALIA A'OA'OGA FA'APITOA GALUEGA A LE STEM/STEAM

 

Ina ia fesoasoani atili e una'ia le tomai o fanau talavou o le atunu'u ina ia lelei taumafaiga i galuega faainisinia, ae maise o tauvaga STEM/STEAM nei e fa'atino e a'oga maualuluga uma i le vaitau fa'ai'ui'u o tausaga fa'alea'oga ta'itasi, ua mafua ai ona mafuli le vasega o faufautua ma le Komiti Fa'afoe o le STEM/STEAM, ina ia fa'ataunu'u le semina fa'apitoa mo fanau a'oga talavou.

 

O nei semina ua fa’atulaga mo 24 Iulai se'ia o'o ia Aokuso 14, 2019 i le A'oga Maualuga o Matata Eseese i Nuuuli.

 

E na'o le 75 avanoa ua fa'atulaga mo lea Semina fa'apitoa a le STEM/STEAM i lenei tausaga.