Ads by Google Ads by Google

Tala I Vaifanua


Kovana o Hawaii David Y. Ige ma le afioga Igafo Maria Brown Va'a i le sauniga mamalu sa fa'ae'e ai i le tama'ita'i fitafita tuai Samoa lona tofi Peresetene VFW Dept. Hawaii mo le tausaga 2018-2019. [ata: foa'i]

IGAFO MARIA BROWN VA'A - VFW DEPT. HAWAII COMMANDER

 

Ua tutula'i nei le tama'ita'i Vetereni, le afioga Igafo Maria Brown Va'a i le tulaga taiulu o le VFW Dept Hawaii Commander, po'o le Peresetene o le Hawaii Pacific Vetereni o Taua Fa'avaomalo, ma o se tulaga ua fa'ato'a tulai ai lea o se tamaita'i fitafita tuai mai Amerika Samoa.

 

O Igafo ua litaea mai le US Army, ma o lo'o tautua fo'i i le tatou VA Office iinei, ma sa avea o se ta'ita'i o le VFW i Amerika Samoa. O lona soloa'i atu i le tofiga peresetene o le Dept Hawaii VFW, ua malolo ese mai ai le sui sa tula'i ai o Commander Retired Staff Sgt Jonathan Hoomanaonui.

 

I le sauniga fa'atauaina ai le suiga tofi lenei i Pagoda Hotel i Honolulu sa fa'atasi ane i ai le Kovana o Hawaii, Gov. David Y. Ige. Sa ia fa'amanuia fo'i ia Igafo Maria Brown Va'a i le aso 23 Iuni, 2018. O lona lea tofiga o le a ia tau'avea i le tausaga 2018-2019 ona toe suia fo'i lea.

 

TOE TIMA'I TOMAI AVETA'AVALE POLOKALAMA MEA'AI FANAUA'OGA

 

I vaitau lenei ua malolo le tele o galuega kiliva ma tapena uta mo fela'ua'iga a le vasega o ave ta'avale ma sui faigaluega i le faleteuoloa a le Polokalama o Mea'ai a Fanau A'oga - school lunch - ua aumaia ai se tasi o ali'i Inisinia & Faia'oga a le OSHA Dennis Fisher, ina ia toe tima'i o ia i le vasega o ave taavale ma latou soa, ia nofouta i ala uma e mautinoa ai lo latou saogalemu a'o fa'atautaia tiute mo le polokalama lenei.

 

O le aoaoga na fa'atino i le malae o le OMV i Tafuna. Amata mai le aoaoga i le taimi e siakia ai mea uma o le ta'avale, pe e alagatatau ona fealua'i i luga o le alatele ma la'u ai mea'ai a le fanau a'oga, ma fe'avea'i ai oe le 'aveta'avale ma lou soa o lua to'alua.

 

"E tatau ona i ai lisi o mea e ao ina mua'i siaki, le vai o le afi o le ta'avale, suau'u, suau'u o le kia, suau'u o le ea malulu, suau'u o le afi, siaki po'o lava le kesi o le ta'avale. Ia lelei moli ina ne'i pogisa le afiafi pe a tutupu ni fa'aletonu a'o lelei moli o le ta'avale, moli taofi ia mautinoa lava o mumu uma itu e lua, moli mo saini o le afe o le ta'avale i le itu taumatau ma le itu tauagavale, moli fa'ailo o ta'avale e fa'ailoa mai ai ua atoatoa le ta'avale ua sauni e malaga i le alatele, ma ua mautinoa fo'i ua sapaia le ola o feo'ai ai."

 

O le tima'i lea ma fa'asino atoa le tele o nei mau mea e utu ma tulaga o i ai fa'atumu e fa'aaogaina, ia tofu le suau'u ma le fa'atumu, ae le tasi le fa'atumu mo mea uma e utu i le ta'avale afi.

 

O i latou o lo ua fa'avasegaina lenei a'oa'oga, o le fa'auluuluga fo'i lea o le polokalama o mea'ai a fanau a'oga: Christina Fuala'au o le sui fa'atonu; Floyd Scanlan - Division Head Warehouse; Ainuu Netta Ala Division Head Operation & Administration; Joseph Solofa Division Head Personnell. O i latou fa'atasi ma ave ta'avale ua fa'atautaia le a'oa'oga mo le vaiaso atoa. O le aso ua fa'ao'o atu ai le a'oa'oga i le Warehouse.

 

POLOKALAMA FAITAU TUSI FALETUSI TAUMAFANAFANA

 

E 250 fanau mai le 5 tausaga se'ia o'o i le 12 tausaga le matutua ua aofia nei i le polokalama faitau tusi lea e fa'atautaia e Luisa Kuaea ma lona to'alua Kenneth Kuaea. Ua galulue feso'ota'i i latou ma sui volenitia mai le ASCC, Ekalesia a Iesu o le Au Pa'ia o Aso E Gata Ai [LDS], o nisi fo'i o tama ma teine tuai a le BYU.

 

O sui volenitia ua mafai ona fesoasoani i lenei tausaga i le polokalama faitautusi ua au nei i le 20 ma ua avea ma se fa'amama avega i le fa'amoemoe e fesoasoani e a'oa'o ma faitau tusi i fanau. E lua aso o le vaiaso e fa'atino ai le polokalama, aso Lua ma aso Tofi mai le 9:00 - 11:30 i le taeao.

 

"O lenei fa'amoemoe ua fa'ato'a lua tausaga talu ona faia, o le lona lua ai lenei o tu'uaga umi o a'oga ua fa'atino ai, ae o lea e silia lava i le 250 fanau ua auai ai. Fa'afetaia le agaga pe a va'aia le naunau o fanau e fia iloa ona faitau tusi ma le malamalama lelei i tala ua faitauina. Ma ua foliga mai ua fa'aosofia ai le lagona i le to'atele ina ia una'ia malosi le iloa faitau ma le malamalama o le fanau talavou, aua o lea ua fa'atula'ia mai isi polokalama faitau tusi ma o se fiafiaga tele lava lea i lo'u nei sui faatauva'a,” ose tala lea mai i sui o lenei polokalama.

 

O lo'o ua fuafua fo'i e i la'ua o le a toe soso'o fo'i lea fa'amoemoe i le tausaga a sau, pe afai o le a va'aia lava le naunau o matua e fa'aulu mai suafa o fanau ina ia fiafia e fa'atau tusi ma malamalama lelei i a latou vasega o lo'o ua fa'agasolo ai latou olaga a'oa'oina.

 

VA'A SUESUE ALE NOAA

 

Ua taula nei i le uafu i Fagatogo, le va'a su'esu'e a le NOAA, ma o galuega fa'atulaga ua fa'ailoa mai, "O matou suesuega ma fa'amaumauga lona fitu lenei mo a'au i le teritori, ma o se galuega fa'aauau mo suesuega tetele e iloga ai le olaola lelei o 'amu i ogasami i Amerika Samoa nei, Guam, Hawaii ma Northern Mariannas.”

 

O lea suesuega atoa ua mafai ona mata'i ai le aotelega o i'a ma lo latou tupu lauolaola ua i ai, o le lauolaola fo'i o 'amu e fa'atusatusa i isi tausaga ua te'a i suesuega fo'i fa'apenei sa faia muamua, ae maise fo'i o le aotelega o le sosia o le gataifale i o tatou ogasami uma.

 

E ta'i tolu tausaga ma faia nei suesuega.

 

O le susuga Dr Bernard Vargas Angel sa ia fa'ailoa mai, "E aofia faatasi Tutuila i lona gataifale, Manu'a i lona fo'i gataifale ma le motu tu'ufua o Muliava po'o le Rose Island lea e matele ina fa'aigoaina ai e le NOAA”.

 

Afai e va'aia e nisi o le atunu'u ni va'a laiti ae o lo'o i ai ma nisi e maulu o lo'o va'aia ai, o i latou na o tagata maulu e fa'atino suesuega taua nei a le NOAA.