Ads by Google Ads by Google

Tala I Vaifanua


O le tama'ita'i ua fa'au'u fo'i ma le togisilia, Vaimalu Kitara Vaiau, mai le University of Hawaii Manoa i lona fa'ailoga Bachelor of Arts in English...Malo le tauata'i!! [ata: foa'i]

TOGISILIA VAIMALU VAIAU - UH BACHELOR'S COURSE HAWAII

 

Ua maua fo'i se isi 'ai o Amerika Samoa e ala i ana Lupe Fa'alele i le taua fa'alemafaufau, i le sailiga o le atamai lautele. O le tama'ita'i mai Aunu'u ma Alofau, Vaimalu Kitara Vai'au lea ua tula'i mai o le togisilia i lana kosi Bachelor's of Art in English, lea na fa'asikolasipi e le malo o Amerika Samoa, ua ia ausia fo'i togi sili ona maualuluga Summa Cum Laude, i lona fa'au'uga na fa'ato'a mavae atu nei i le vaiaso na te'a.

 

O ia fo'i lenei sa avea lona tausaga fa'au'u ASCC 2017 Summa Cum Laude, ma sa ia maua ai le avanoa e faigaluega ai fa'aa'oa'o i le Ofisa o Aumua Amata, faipule o Amerika Samoa i le Konekeresi, i lena lava tausaga, e ala i so'otaga fa'avaomalo i le atu Asia ma le Pasefika.

 

I le tausaga e 2010 fa'au'u mai ai lenei talavou mai le A'oga Maualuga i Fagaitua ma o ia o se tasi na soifua a'e i le motu laititi o Aunu'u, i ona matua, le afioga le Faipule Titiali'i Kitara ma Etevise Vaiau o Aunuu ma Alofau. O ia o le lona fa lea o le fanau tama'ita'i. Fa'amalo le tauivi i le sailiga o le atamai i lea fo'i alo o Amerika Samoa, fa'afetai fa'aea aiga ma le tatou malo.

 

MANUMALO SAMOANA TAUVAGA PESE A AOGA MAUALULUGA I AMERIKA SAMOA

 

I le tauvaga pese lea sa faia a A'oga Maualuluga na fa'aulu ma auai i le Tauvaga Pese A'oga Maualuluga i Amerika Samoa, ua sola ai fo'i le Laumua o le Malie ma le fa'ailoga muamua.

 

O le aufaipese lenei a Samoana High o lo'o ta'ita'ia ma fa'atonutonu e le ali'i o Pati Pati Jr., ma ua iloga fo'i le latou taumafaiga i lenei tausaga, aua e tolu lelei vaega o le tauvaga lenei na togisilia ai Samoana i lenei tausaga.

 

O le tauvaga lenei sa faia lea i le ASCC Multi Purpose Center i Mapusaga. Na malo Samoana i le Akapela, pese e leai ni mea fa'aili e taina ai, malo i le latou pese fa'atauva, ma toe malo i le latou pese fa'aleaganuu na tapena i ai.

 

O le Aufaipese a Leone High lea e ta'ita'ia mai e Sililo Asalemo, sa mauaina le fa'ailoga po'o le tulaga muamua o le Pese Ta'ito'atasi po'o le solo ma o i latou fo'i na tulaga lua ia Samoana i lenei tausaga.

 

O le aufaipese a Tafuna High, lea e ta'ita'ia mai e John Mailo na tulaga tolu a'o le aufaipese a Fagaitua High, lea e ta'ita'ia mai e Sam Tofiga na tulaga fa i lenei tausaga. E ui ina faigata tele le fa'amasinoina o le taumafaiga a le fanau e ala i musika ma pesega i lenei tausaga, peita'i o ali'i ma tama'ita'i fa'amasino sa sili atu ona faigata le latou galuega na fa'atino i lea aso, aua e le'i fa'atamala lava a'oga uma na auai i lea tauvaga i o latou sao na fofogaina.

 

O fa'amasino sa aofia ai: Tapaau Dr. Dan Aga, Kuki Tuiasosopo, Poe Mageo, Saluafata Letoe ma Arona Magaseu.

 

FUAFUA FALEMA’I FA’AMALOLO TOTOGI MO TALAVAI I LE LBJ

 

I le fonotaga a le kapineta i le vaiaso ua te’a sa fa’alauiloa ai e le pule sili o le Falema’i a le LBJ, Faumuina John Faumuina, se fuafuaga a le pulega a le falema’i e “suspend”, pe fa’amalolo i se taimi le tumau, le $10 lea o lo’o totogi mo talavai i nisi o potu talavai - clinics - a le LBJ.

 

Saunoa Faumuina e fa’apea, “masalo o le amataga o le masina o Iuni” e “suspend” ai le totogi o talavai (facility fee).

 

“O le a fa’amalolo mo lenei vaitaimi. O le a le toe totogia le ta’i $10 e totogi e le atunu’u i clinics. Ae totogi lava i luma o le Emergency Room ma le Pharmacy, ae o isi clinics uma i totonu o le falema’i o le a suspend, fa’amalolo,” ose fa’amatalaga lea a Faumuina.

 

“Se’i tatou mata’i, pe alualu i se tulaga lelei, ona tatou alualu ai la’ia. Ae a alualu fo’i ua le lelei mai vaega a le [malo fetarale], ia ona toe foi lea i le totogi i clinics,” o se tala lea a Faumuina ma ia toe fa’amanino i lea fa’amalolo e patino mo i latou e umia ID Amerika Samoa ma Amerika.

 

Fa’ailoa foi e Faumuina, o le a i ai se fa’aaliga fa’alauaitele mo le mamalu o le atunu’u i se taimi lata mai e uiga i lenei mataupu.

 

2 MOLIA MAI LE OSOFA'IGA A LEOLEO I LOGOTALA HILL

 

E to'alua ni ali'i talavou ua saisaitia ma ua fa'aauau fo'i le la'ua iloiloga i le Fa'amasinoga Fa'aitumalo, talu mai le osofa'iga a Leoleo i le Logotala Hill i Vaitogi.

 

E to'afitu i latou sa taofia e leoleo i le latou osofa'iga, ina ia fesiligia e tusa ai o latou tulaga masalomia, peita'i ua na'o le to'alua o nei sui ua saisaitia nei ina ia fa'aauau ai suesuega ma fa'amau atili o la'ua moliaga pe afai o le a fa'amaonia solitulafono.

 

O la'ua tupe e tatala ai i tua ua fa'atulagaina lea i le na'o le $5,000 a le tagata e to'atasi. Mai le osofa'iga lea a Leoleo i Logotala Hill, ua fa'amauina ai le maua o La'au Marijuana, sikaleti marijuana, fana ma le tinoitupe. O lo’o fa’aauau pea suesuegaa leoleo i lenei mataupu.