Ads by Google Ads by Google

Taitai tufuga To’oto’o Tile i le vaega vane la’au (wood carvers) a Amerika Samoa mo le Fa’aaliga Tu ma Aganu’u a le Pasefika (FestPAC 2024)


[ata: foa'i]

Pago Pago - AMERIKA SAMOA

I le tapenapena atu ai o Amerika Samoa mo le Fa’aaliga lona 13 o Tu ma Aganu’u o le Pasefika, ia Iuni 6-16, i Honolulu, Hawaii, ua filifilia ai nei le tofa ia To’oto’o Tile Tuala-Tamaalelagi, e avea ma taitai tufuga i le fa’alapotopotoga o vaega vane la’au (wood carvers) o le a auai atu i lenei faamoemoe i Honolulu.

Ua fa’ailoa mai e To’oto’o, o le tele o a latou galuega taulima, ua mae’a ona lafoina atu i Hawaii, seia vagana ai nisi o a latou galuega o lo’o faia i le taimi nei, ma e faamoemoe, e fa’amae’aina i le taimi o le FestPAC i Hawaii.

O le tofa ia To’oto’o, e 43 tausaga lona soifua, mai i le afioaga o Laulii ma sa ia fa’aalia lona agaga fiafia ma le agaga fa’afetai, ona o lenei avanoa matagofie ua o latou maua, e fa’alauiloa atu ai a latou galuega taulima.  Ae le gata i lea, o le a maua ai foi se avanoa e fetufaa’i ma fefa’asoaa’i ai a latou taleni ma isi foi ‘carvers’ mai i isi atunu’u o le Pasefika, e pei o le manulauti lea a le FestPAC – O le toe faatuputupuina pea o le Pasefika.

E to’afitu ni ‘carvers’ o le a faimalaga atu mo lenei faamoemoe mai Amerika Samoa, e aofia ai ni tama matutua mai i le Ofisa o Tama ma Tina Matutua (TAOA), lea o lo’o ta’ita’ia mai e le susuga ia Maoa’e Ioane, faapea ma le to’atolu mai i le vaega a le Arts Council.

Sa fa’asoa mai Tootoo, i sona talitonuga, o i latou ua faamanuiaina i nei taleni, e pei o le tusiata, po o le vane la’au, po o le a lava se taleni, ua filifilia i latou e le Atua ma ua tu’uina atu ia i latou le tiutetauave, o le fa’asaoina o a latou aganu’u e ala i a latou galuega taulima faapea le a’oa’oina o fanau talavou, ina ia mafai ona ola pea lea vaega o le latou aganu’u.

Na saunoa Tootoo, o le a’oa’oina atu, o le fafaguina ma le fa’afaileleina lea o le taleni o lo’o i totonu o loto ma agaga o atisi taitasi, aua e pei ona iaia tagata fai musika, ta’a’alo, fomai, loia ma isi taleni faapena, e iai foi tufuga atisi ma vane la’au (carvers).

O le tofa ia Tootoo o le lona tolu o se fanau e to’a 11 a le tofa ia Aeoainu’u Aleki Tuala-Tamaalelagi ma Elisapeta Vaiaoga-Tuala-Tamaalelagi, lea ua fai’ilagi lo la folauga.  O le tofa ia Aeoainu’u o se tusitala ua loa na galue i le Samoa News.

Sa amataina mai le olaga o a’oa’oga a Tile i le aoga tulaga muamua a Laulii ona fa’aauau atu ai lea i le aoga maualuga a Fagaitua, seia ona faau’u mai i le 1987 ma e lua tausaga na tausi aiga ai lenei alii.  Ma ona o se popolega i si ona tua’a ina ne’i mulimuli i ta’iga a tamaiti ma ona tagofia ai ava fa’asaina ma le pia, o lea na ia fa’aulu ai lona alo i le aoga o le ‘Fine Arts’ i le Kolisi a Leulumoega Fou i Samoa.

Ona sa maitau lava e Aeoainu’u le fiafia tele o si ona alo e tusi ata i totonu o ana tusi a’oga talu mai lona la’ititi, o lea na ia fa’aaogaina ai o ia i lea a’oga ina ia mafai ona fa’afaileleina ma atina’eina lana taleni tusi ata.

Atonu na musuia le tofa ia Aeoainu’u i lenei la’asaga i le soifuaga o si ona alo, aua o iina na fafaguina ai le taleni moni a Tile, i lalo o le ta’ita’iga a le ulua’i faatonusili o le a’oga, ina ua faavaeina i le 1987, le alii Italia o Ernesto Coter.

E pei ona sa fa’asoa mai e Tootoo, o Coter na tatalaina le faitoto’a i se lalolagi sili atu lona matagofie ma le maoa’e, ma fafaguina, faafaileleina ma atina’eina o lana taleni, lea ua iai nei.

Ina ua litaea ma toe fo’i atu i lona atunu’u i Italia ia le alii faiaoga o Coter, i le 2003, na fetaui lava ma le tausaga faai’u a Tile, ma sa fa’amae’aina ana a’oa’oga i lalo o le ta’ita’iga a nisi o ulua’i tamaiti a’oga a Coter, o le susuga ia Pelenato Liufau ma si ona faletua o Susana Fa’asau-Liufau.

Ina ua mae’a lona fa’au’uga sa nofo ai pea Tootoo i Samoa e lata i le ono tausaga ma fesoasoani i si ona uso matua, le susuga ia Taulapapa Tivia ma si ona faletua ia Michelle i le tatalaina o sa latou pisinisi elei, o ata tusia faapea ma ‘carvings’.

I le tomanatu a Tootoo i le fa’ato’a amataina o le latou pisinisi se’ia o’o ina ola ma tupu i se pisinisi, na silia ma le to’a 50 ana tagata faigaluega, i ni lala se tolu, lea sa tautuaina, e le gata o tagata lotoifale ae faapea foi mai so’o se itu o le lalolagi.

A’o iai pea o ia i le kamupani a le ‘Samoa Lokostyle’, na fai ma asiasi mai Tootoo i nai ona matua i Amerika Samoa, ma o se tasi o ana asiasiga sa faia ai loa ma lona nofo i lona suafa matai ia Tootoo mai i le aiga sa Salanoa i Laulii, lea o lo’o matai ai si ona tua’a.

I le 2008, na toe fo’i mai ai loa Tootoo i Amerika Samoa mo le fa’aaliga lona 10 a le FesPAC, ma na maua ai le avanoa e fa’aali ai lana taleni faapea ma se tasi o ana galuega taulima, e pe a ma le valu futu le umi,  na faaigoaina “O le Ala i le Pule o le Tautua”, na fa’aali ai tiute ma feau a se taule’ale’a.  Sa iai lenei galuega taulima i luma o le fale mata’aga a le malo (Jean P. Haydon Museum) ae e le’i toe fa’afouna.

O se tasi o galuega tele a Tootoo, sa faia lea mo le EFKAS i Vatia, o le vaneina lea o le pa o le falesa, lea tu tonu lava i tua o le pulela’a.  Ma ina ua amata ona va’aia e le lautele le matagofie o galuega a lenei tufuga, sa amata loa ona talosagaina lana taleni mo le faamatagofieina o totonu o le tele o malumalu a ekalesia, e pei o Lauli’i, Fagatogo, Utulei, Fa’agalu ma isi afioaga.

E tele lava nisi tufuga ua fa’amanavaina e le Atua a latou galuega, ua faapea ona aloaia e Tootoo i lana galuega, e pei o Sven V. Ortquist, o se tasi o ‘carver’ sili ona lauiloa i totonu o le Pasefika faapea susuga ia Iosua To’afa ma Sauleone Ueligitone.

O le taimi nei, o lo’o galue To’oto’o i totonu o le Arts Council, i le atina’eina o galuega taulima, e aofia ai le aoaoina ai o fanau iti ma fanau talavou i taimi o malologa o aoga.

Ae o se tulaga o lo’o moemiti ai Tootoo, o le faavaeina lea o se a’oga e mafai ona a’oa’oina ma atina’eina ai nei taleni faapitoa, e pei o le a’oga sa ia amata mai ai.  Na saunoa le alii tufuga, o se tulaga lenei e tatau ona faia mo fanau o le lumana’i, e le i iloa o lo’o ia i latou le taleni.  Ta’ua e Tootoo, o le taimi nei, ua toatele fanau talavou ua matele i luga o ‘social media’ ma ua tineia ai a latou taleni mai i le Atua.

O lo’o galue malosi nei Tootoo e saili se polokalama feterale e mafai ona faatupeina lenei faamoemoe.  E le gata i lea o lona taumafai lea e u’una’ia ia le Ofisa o A’oga, ina ia mafai ona aofia le polokalama o le ‘Fine Arts’ i totonu o vasega a fanau aoga, ina ia mafai ona maua mai ai se fesoasoani mai i le malo e pu’eia ai puna’oa o lo’o ia mana’omia.

Sa fa’asoaina mai e Tootoo lona agaga fa’afetai i si ona tua’a ona o le faasinoina o ia i lenei auala ua faamanuiaina ai lona olaga.  Na ta’ua e Tootoo le fautuaina o ia e si ona tua’a ina ia aua ne’i ona ia faatusatusaina ana galuega i seisi, ae ia tauva lava o ia ma ia.  

E le gata i lea, o le viiga sili ma le faafetai i le agaga o lenei tufuga, e mo lona Atua ona o lenei taleni ua faamanuiaina ai o ia.