Ads by Google Ads by Google

Su’esu’e e Leoleo fualaau fa’asaina na taumafai e fa’aulufale i le Toese


[ata: foa'i]
ausage@samoanews.com

O loo suesueina e le vaega a le DPS Vice i le taimi nei se mataupu e fa’atatau i fualaau fa’asaina na taumafai se tagata e fa’aulufale fa’anana i totonu o le toese i le aso Lulu o le vaiaso na te’a nei.

 

Na fa’amaonia mai e se Leoleo le tauaaoina lea e le Vice o le ripoti e uiga i lenei mataupu, ma o loo faia i ai a latou suesuega. O fualaau fa’asaina na taumafai se tagata e fa’aulufale fa’anana i totonu o le toese, ua i lalo nei o le vaavaaiga a le Vice.

 

O se suega sa faia i  vaega o fualaau fa’asaina i le vaiaso ua te’a ma ua fa’amaonia ai, o vaega o le pauta fa’asaina o le aisa lea na taumafai lenei tagata e fa’aulufale fa’asolitulafono atu i totonu o le toese.

 

Na taua e se molimau fa’atuatuaina i le Samoa News e faapea, o lenei mataupu na alia’e mai i le vaveao o le aso Lulu o le vaiaso na te’a nei, ina ua alu atu se tama’ita’i e momoli atu se afifi mo se ali’i pagota o loo taofia i totonu o le toese.

 

E na o le aso Lulu lava o lo o fa’ataga ai aiga o pagota o loo taofia i totonu, ona momoli atu ni taumafa poo ni lavalava mo i latou o loo taofia i le falepuipui.

 

Pe tusa o le itula e 3:00 i le vaveao o le aso Lulu na te’a nei, na aga’i atu ai se tama’ita’i ma momoli atu se afifi mo se ali’i pagota. Na fa’ailoa e le pagota i se Leoleo fou e lei leva ona galue i le toese lona manaoga o loo i ai, i le fia piki mai lea o lana afifi o loo alu atu ma lana uo tama’ita’i.

 

O aso Lulu uma lava e pei ona taua e le molimau, o le aso lea e fa’ataga ai aiga o pagota ona aga’i atu e momoli atu taumafa, lavalava, poo ni isi fo’i o meatotino e mana’omia e pagota. O le taimi e fa’ataga ai aiga ona momoli atu tulaga faapea o le 8:00 i le taeao e oo atu i le 3:00 i le afiafi.

 

Na taua e le molimau i le Samoa News e fa’apea, ina ua mae’a ona tu’u atu e le tama’ita’i le afifi i le Leoleo, na toe fo’i ai loa le tama’ita’i ae aga’i sa’o atu loa le Leoleo ma le afifi i le fale o loo taofia ai le pagota e ana le afifi, e aunoa ma su’eina o le afifi poo a mea o loo i ai i totonu.

 

Na iloa mai e se tasi o Leoleo sinia o loo i totonu o le ofisa le Leoleo fou ma le afifi, ona ia valaau mai lea i le Leoleo fou e toe fo’i atu ma le afifi se’i su’e poo a mea o loo i ai i totonu.

 

O le afifi, o se pusa cereal. Ina ua saili totonu o le afifi, sa maua i ai le pepa susu, o le mitiafu, fa’atasi ai ma se pepa iila o lo o i ai vaega o le pauta fa’asaina o le aisa.

 

O le ali’i pagota lea na fa’amoemoe e ave i ai le afifi, o lo o taofia i le toese ona o tu’uaiga i lona umia fa’asolitulafono o vaega o le pauta fa’asaina o le aisa. O se osofaiga sa faia e Leoleo i le masina o Iulai na te’a nei i se vaega i sisifo o le atunu’u, na pu’e fa’apagota atu ai loa lea ali’i.

 

O le tama’ita’i lea na alu atu ma le afifi, e lua ni tagi a le malo fa’asaga ia te ia, i lona umia fa’asolitulafono o vaega o le fualaau fa’asaina o le aisa. O loo i luma o le fa’amasinoga maualuga ana mataupu, ma ua fa’amoemoe o se taimi o lenei masina e toe tula’i ai o ia i luma o le fa’amasinoga.

 

E le o se taimi muamua lenei ua alia’e mai ai ni tulaga fa’apenei i le toese i Tafuna, i le masalomia lea o le i ai o fualaau fa’asaina.

 

O se osofaiga sa faia e Leoleo i le toese i le masina o Me o le tausaga nei, na maua ai e Leoleo Suesue se paipa e ula ai le aisa o loo nana i tua o se tasi o sela i totonu o le toese. O lea osofaiga na faia ina ua mae’a ona faia se suega i ni ali’i pagota se to’atolu, ae fa’amaonia ai lo latou fa’aaogaina o le fualaau fa’asaina o le aisa.

 

O i latou ia e aofia ai John Tuupo, Tolupo Hodges ma Wayne Gasolo. Ua mae’a ona fa’amaonia tu’uaiga fa’asaga ia Tuupo ma Gasolo, i lo la fa’aaogaina lea o le fualaau fa’asaina o le aisa ao taofia ai i laua i le toese i Tafuna, ma ua atagia mai ai lo la le usitaia o le poloaiga a le fa’amasinoga na tuuina atu ia te i laua, e fa’asa ai ona la toe fa’aaogaina fualaau fa’asaina poo le ‘ava malosi.

 

E 60 aso lea ua toe faaopoopo e le fa’amasinoga i le fa’asalaga a Gasolo o loo tuliina nei, ae 90 aso i le fa’asalaga a Tuupo.