Ads by Google Ads by Google

Pasia e le Maota o Sui le afioga Lefiti e avea ma Komesina o Leoleo


Le Komesina filifilia o le Matagaluega o le Puipuiga o le Saogalemu Lautele, le afioga i le Faatui ia Lefiti Falelaulii Pese i le mae’a ai o lana iloiloga i luma o le Maota o Sui i le vaiaso nei. [ata AF]
ausage@samoanews.com

Pago Pago, AMERIKA SAMOA

 

Na pasia e le Maota o Sui i se auala faapitoa tofiga a le afioga i le ali’i Kovana ia Lemanu P. S Mauga mo le afioga i le Faatui ia Lefiti Falelaulii Pese e avea ma Komesina o le Matagaluega o le Puipuiga o le Saogalemu Lautele i le vaiaso nei.

 

E le i faaaoga e le Maota o Sui e auala e masani ona palota ai tofiga a le Kovana mo soo se faatonusili, e ala i le palota faalilolilo, ae na latou fa’aaogaina le auala o le palota siilima ma faailoa ai loa le faaiuga e fulisia i latou uma e lagolago le avea o le afioga a Lefiti ma sui o le Kapeneta a Lemanu ma Talauega.

 

O le vaiaso nei na faataunuu ai le iloiloga a le Komiti o le Puipuiga o le Saogalemu Lautele a le Maota o Sui, e fesiligia ai agava’a o le afioga i le Faatui ia Lefiti e pei ona masani ai le Fono Faitulafono. O le iloiloga na taitaia e le afioga i le Taitai Komiti ia Avagafono Vaimaga Maiava, o le sa avea ma sui komesina mo le Matagaluega o le Puipuiga o le Saogalemu Lautele mo le tele o tausaga.

 

E lei i ai le afioga a Lefiti i luma o le Komiti i le taimi na amata ai le iloiloga. Na tula’i le afioga i le ali’i Faipule mai Aua ia Faimealelei Anthony Fu’e Allen ma faatula’i le mau ina ia fa’aagafua tulafono a le maota, ae tu’u sa’o loa le suafa o le afioga i le Faatui ia Lefiti e palota i le taimi o le tauaofiaga a le maota, e aunoa ma le tau afio mai o le Faatui i luma o le Komiti mo se iloiloga.

 

Na taua e Faimealelei e fa’apea, e le masani ona tula’i se isi i taimi o iloiloga, ae talu ai o le maualuga o le fa’aaloalo, o le mafua’aga lea ua ia manatu ai, e faaagafua tulafono a le maota, aua ne’i afio mai Lefiti i luma o le Komiti mo se iloiloga, ae sauni le maota mo lana faaiuga. 

 

Sa ia taua tausaga ua mavae, sa filifilia ai fo’i nisi o Faasuaga ma Faatui i nofoa o le Kapeneta, e leai se isi o i latou na oo mai i luma o le Maota o Sui mo se iloiloga. 

 

Na vave ona faalua e le mamalu o le Komiti le mau ma lagolagoina ai loa le leai o se iloiloga e faataunu’uina.

 

Saunoa le afioga a Vailiuama Steve Leasiolagi e faapea, o loo faia le fonotaga faapitoa a le Fofoga Fetalai ma Lefiti i le maota i tua, ae mae’a se faaiuga a Faipule, ona latou afifio uma lea i tua e lulu aao ma faatalofa i le afioga i le Faatui.

 

Na faafetaia e le afioga i le alii Faipule ia Alumamalu Filoiali’i Ale le finagalo ua tasi i ai le Komiti. Sa ia taua e faapea, e le fesiligia le tofa faatupu lea ua tasi i ai le maota, ona o le maualuga o le latou vaavaai i le afioga i le Faatui.

 

Saunoa le sui o le itumalo o le Ituau, afioga Manumaua Wayne Wilson e faapea, e tatau lava ona tu’u le avanoa i le afioga i le Faatui e afio mai ai i luma o le Komiti se’i aumai sana saunoaga faamanuia ona latou lulu aao ai lea ma faatofa.

 

Saunoa Manumaua e faapea, o le mea e ta’u o le fa’aaloalo maualuga, o le tu’u atu o le avanoa i le afioga i le Faatui e afio mai ai i totonu o le Maota Fono a le atunu’u e aumai sana saunoaga faamanuia, ae na te lagolagoina le leai o se iloiloga e faataunuuina.

 

Na faaui lavea le Sui Fofoga Fetalai ia Fetu Fetui Jr ma ia taua lona naunau mai e aloaia tulafono a le maota, ona o le maualuga o lana vaai i le afio mai o se tasi o Tama o le Itumalo o le Manu’atele. 

 

Saunoa atili Fetu e faapea, o lea ua mae’a ona faalua le mau ma ua pasia, ina ia faaagafua le iloiloga, e le tatau fo’i ona afio mai le afioga i le Faatui i totonu o le maota, peita’i, o lea ua toe aumai finagalo o sui mamalu, ma ua atagia mai ai le le mautonu o le faaiuga ua mae’a ona pasia.

 

Na faamanino e le afioga i le Taitai Komiti ia Avagafono, ua mae’a ona pasia le mau sa faaluaina ma ua fulisia i ai le komiti atoa.

 

Na toe faatula’i ai loa e Fetu le mau e sui ai le ulua’i mau, ina ia tu’u loa le avanoa i le afioga i le Faatui e afio mai ai i totonu o le Maota mo sana saunoaga faamanuia.

 

Na toe saunoa Faimealelei e faapea, e mama lava le mafua’aga na ia faatula’i ai le mau, ona o lona faanaunauga, ia fai se fa’aaloalo maualuga a le maota i le afioga i le Faatui. Sa ia taua nisi o Faatonu na pasia e le Maota i tausaga ua mavae e aunoa ma ni iloiloga sa faia, ona o le taimi lea sa poloka ai Faatonu filifilia ia i fafo.

 

Na toe maua le avanoa o le Sui Fofoga Fetalai ia Fetu ma ia taua ai e faapea, e le o se taimi muamua lenei o le a oo mai ai le afioga i le Faatui ia Lefiti i luma o le Maota. E faalua ona ulufale le afioga a Lefiti i le Maota Fono tuai, ae afai ae afio mai i totonu o le maota i le taeao lea, lona uiga ua faatolu ai loa iina ona asiasi mai i totonu o le maota o sui.

 

Sa ia taua fo’i le taimi na afio mai ai le afioga i le Maoputasi ia Mauga Tasi Asuega, faapea ai ma le afioga ia Galea’i M. Tu’ufuli. O le fiangalo o Fetu, e taua le ulufale mai o le afioga i le Faatui ia Lefiti se’i feiloa’i ma le maota ma aumai sana saunoaga faamanuia.

 

A o faia felafolafoaiga a le Komiti, o le taimi lea na ulufale mai ai loa i totonu o le afioga i le Fofoga Fetalai ia Savali Talavou Ale, o se ulua’i iloiloga fo’i lea ua auai le Fofoga Fetalai talu ona faagasolo mai iloiloga mo le faamaoniga o tofiga a le Kovana. 

 

Saunoa Savali e faapea, sa i ai lona taofi e le oo felafolafoaiga a le Komiti i se tulaga faapea, ui o lea, sa ia taua le leai o se afaina o le afio mai o le afioga i le Faatui i totonu o le Maota latou te feiloa’i ma faasoa. Pau le itu na faafetaia e Savali, o le finagalo autasi o le Komiti ina ia taofi le faia o se iloiloga ae tau lava o se saunoaga faamanuia a le afioga i le Faatui.

 

Na maua le avanoa e afio mai ai le afioga i le Faatui ia Lefiti ma feiloa’i loa ma le Komiti i lea taeao. 

 

Sa ia taua lona faafetaia o le afioga i le ali’i Kovana ia Lemanu i lona manatu e filifilia o ia e avea ma Komesina o Leoleo. Na taua e Lefiti tausaga e 52 na tautua ai mo le malo o Amerika Samoa i soo se lala ma soo se vaega lava. Sa taua fo’i e faapea, na te le o manatuaina pe sa i ai se tulafono na ia gausia pe solia fo’i. I lona talitonuga, o nai ona agva’a faatauva’a ma le poto mai le Atua, ua mafua ai ona tofia o ia e le Kovana mo lenei tofiga.

 

Sa ia faamanuia i le mamalu o le maota o sui, o sui filifilia o Tutuila ma Manu’a.

 

Na faafetaia e le Fofoga Fetalai le afioga i le Faatui e tusa ai o lana saunoaga. Na taua e Savali e faapea, e lei soona tofia o ia e avea ma Komesina o Leoleo, ona ua silafia e le Kovana e i ai le tomai ma le agava’a e mafai ai ona ia faafoeina le galuega.

 

TAUAOFIAGA A LE MAOTA

 

I le taimi o le tauaofiaga a le Maota Sui, na tula’i ai loa le afioga i le ali’i faipule ia Lavea F. P. Mauga ma faatula’i le mau ina ia fa’aagafua tulafono a le malo, ae faatino le palota siilima e pasia ai le afioga i le Faatui ia Lefiti, ona e i ai lona talitonuga, e i ai nei afioga i faipule e le palota.

 

Na fautuaina e Savali le afioga a Lavea ina ia teuteu faalelei ana saunoaga i totonu o le maota. E le tatau ona aiaina e le isi faipule le finagalo o le isi faipule. 

 

Na pasia le mau ma faatino ai loa le palota sii lima, ma fulisia ai le maota o sui e pasia tofiga a le Kovana mo le afioga i le Faatui ia Lefiti e avea ma Komesina o Leoleo.