Pago Pago, AMERIKA SAMOA - E 72 tausaga o se Tama Matua ua taofia nei e Leoleo i le Falepuipui i Tafuna, ona o tu’uaiga i lona faia lea o uiga mataga faasotoma i se teineitiiti e 12 tausaga le matua. O lenei mataupu na tofu atu i le Ofisa o Leoleo i Tafuna, ina ua logo e le tuagane o le teineitiiti na aafia e 6 tausaga le matua lona Tina e tusa ai o uiga mataga na faia e le ua molia i lona tuafafine.

[Talu ai puipuiga i le ono mafai lea ona iloa le o lo o aafia i lenei mataupu, o le a le mafai ai e le Samoa News ona faailoa le igoa o le alii o loo molia i lenei mataupu.]

E pei ona taua e le malo i le latou tagi e fa’apea, o lenei mataupu na tofu atu i le Ofisa o Leoleo i Tafuna, ina ua talosagaina e le Tina o le teineitiiti na aafia se fesoasoani a Leoleo, ona o lana tama e 12 tausaga le matua na fai i ai e se Tama Matua e 72 tausaga le matua ni uiga mataga ia te ia. O le mae’a ai ona logo e le Tina o Leoleo, sa ia logoina ai loa fo’i ma le Falema’i i Faga’alu ma ia talosagaina le faia o se siaki faapitoa i lana tama pe na aafia o ia i ni feusuaiga faamalosi.

O le mae’a ai o se suesuega faapitoa na faia i le teineitiiti na aafia, na tuuina mai ai loa se ripoti mai le Foma’i, e le o aafia o ia i ni faiga faafeusuaiga faamalosi.

Na taua e le Tina o le teineitiiti na aafia i Leoleo ina ua fesiligia o ia e fa’apea, pe tusa o le itula e 10:21 i le po o le aso 5 o Iuni 2020 ao faigaluega, na vili atu ai lana tama e 6 tausaga le matua ia te ia ma faailoa atu uiga mataga na faia e le Tama Matua e 72 tausaga le matua i lana tama. 

E le i toe faatali le Tina ae na ia faanatinati atu loa i le fale ma aveese mai lana fanau e to’atolu e aofia ai lana tama teine na aafia ae aga’i atu loa i le Falema’i mo le faia o se siaki i lana tama. Sa ia logoina fo’i le Ofisa o Leoleo i Tafuna ma faailoa i ai le mataupu.

Na maua i suesuega a Leoleo e fa’apea, o le tamaitiiti e 6 tausaga le matua na alu e siaki lona taufafine, ae na te’i ina ua ia vaaia ai ma le ua molia i totonu o le potu. Sa ia liliu ma toe fo’i, ona toe sau ai loa lea ma ia tu’itu’i le faitoto’a, ma ia vaaia ai le faateia tele o le ua molia ina ua vaai atu ia te ia.

Na maua le avanoa e fesiligia ai e Leoleo le teineitiiti na aafia a o i ai lona Tina e tusa ai o le faalavelave na tula’i mai i le va o ia ma le ua molia. 

Na taua e le teineititi na aafia e fa’apea, o ia sa taoto i luga o le moega ma faatutu ona vae, ae na te’i ina ua ia faalogoina le pa’i atu o se tagata i ona vae ma tatala ese, ae faatino loa uiga mataga ia te ia. Na ia faliu e vaai poo ai, ma ia iloa ai o le ua molia, o ia fo’i o lona uncle. 

Sa ia taumafai e tete’e ese le ua molia peita’i sa fai si ona malosi ma faaauau ai pea ona ia faia uiga mataga ia te ia. E le i umi ona faia e le ua molia uiga mataga ia te ia ae faafuase’i loa ona tatagi lana telefoni. Ona tu lea i luga o le ua molia ua tali lana telefoni ma fealualua’i solo i totonu o le potu, ina ua mae’a ona talanoa i le telefoni, sa ia toe faasaga atu ma toe fa’aauau le faia o uiga mataga ia te ia.

Na taua e le teineititi na aafia lona taumafai malosi e una’i ese le ua molia, ona ua avea uiga mataga ua ia faia ma itu ua amata ai ona ia fefe, peita’i sa malosi fo’i le taumafai mai a le ua molia e taofi ese ona lima. 

E le i umi se taimi ae toe tatagi le telefoni a le ua molia, ona taofi fo’i lea o ana gaioiga o loo faia ae tali lana telefoni mo sina taimi. Ina ua mae’a ona talanoa i le telefoni, sa ia toe faliu atu ma toe faaauau le faia o uiga mataga ia te ia. Na taua e le teineititi lona taumafai e ee i luga peita’i na tu’u e le ua molia lona lima i lona gutu e taofi ai o ia mai le ee i luga.

A o faia e le ua molia uiga mataga ia te ia, na faateia i laua ina ua ia faalogoina le tu’itu’i atu o se tagata i le faitoto’a, na ia autilo i le faitoto’a ma ia iloa ai lona tuagane e 6 tausaga o loo tu atu i le faitoto’a ma tu’itu’i ai. O le taimi lea na ia tu ai loa i luga ma savali i le Fale Taele e taele ma tagi ae na tula’i fo’i le ua molia ma savali i fafo.

O le mae’a ai ona fesiligia e Leoleo o le teineititi na aafia ma lona Tina, na latou aga’i atu ai loa i le fale a le ua molia mo le sailia mai o ia. Na taunuu Leoleo ma latou maua le ua molia i lona fale, ma latou faailoa loa i ai le mafua’aga o le latou sailia o ia, ona o tu’uaiga i lona faia o uiga mataga i se teineitiiti e 12 tausaga le matua. 

Na ita le ua molia ma palauvale ia te ia lava ma faapea atu i Leoleo, na te le i faia se mea leaga e tasi i le teineitiiti o loo taua. Ae ina ua ta’u i ai e Leoleo, o loo i ai le molimau na vaai i gaioiga sa ia faia, na sui ai loa ma le manatu o le ua molia ma ia faapea atu i Leoleo, e sa’o sa la talanoa ma le teineitiiti na aafia ma ia kisi atu fo’i i ai i lona fatafata ma ona alafau.

Na malie le ua molia e fai sana faamatalaga i Leoleo e tusa ai o lenei mataupu. Sa ia taua e fa’apea, sa la talanoa ma le teineitiiti na aafia i totonu o le potu, ma ia kisi atu ai i lona fatafata ma ona gutu. 

Na fesili Leoleo i le alii ua molia pe na te iloa le lanu o ofu o le teineitiiti na aafia o loo faia, na ta’u e le ua molia lanu o ofu o le teineitiiti o loo faia, ma faamaonia ai e Leoleo le moni o lana molimau.

Sa ia taua atili i Leoleo e fa’apea, na mafua ona ia kisi atu i le teineitiiti, ina ia faailoa atu ai lona alofa ma lona amanaia o ia.

O le 2 vaiaso talu ai na tula’i ai le ua molia i luma o le Fa’amasinoga Faaitumalo. O le ali’i Loia Fautua lagolago ia Bob Stuart na tula’i mo le ua molia i le taimi o lana ulua’i iloiloga, ae o le tama’ita’i loia sili lagolago ia Kristie Soule na faui ma sui o le malo.

Ua molia e le malo le ua molia i le moliaga e tasi o le faia o uiga mataga faasaga i fanau laiti, o le vaega B lea o solitulafono mamafa, lea e mafai ona faasala ai se tasi i le Toese mai le 10 e oo atu i le 30 tausaga; tasi le moliaga o le faia o uiga mataga faasotoma, o le vaega B lea o solitulafono mamafa, lea e mafai ona faasala ai se tasi i le Toese mo le umi e oo atu i le 15 tausaga le umi; ma moliaga e 3 o le tagofia lea o itutinosa o se teineitiiti e i lalo o le 12 tausaga, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala foi i le salatupe e oo atu i le $5,000, pe faasala foi i faasalaga uma ia e lua.

E $50,000 le vaega tupe lea ua fa’atulaga e totogi ona faatoa mafai lea ona tatala le ua molia i tua.

I le taimi o le ulua’i iloiloga o lenei mataupu, na manatu ai le ua molia e tuu sa’o atu loa lana mataupu i luma o le Fa’amasinoga Maualuga e faataunu’u ai sona faamasinoga autu. 

O le aso 7 o Aokuso lea ua faatulaga e toe tula’i ai le ua molia i luma o le Fa’amasinoga Maualuga.