Ads by Google Ads by Google

Molia se Tina i lona ave fa’agaoi silia $110,000 mai le Forsgrens


[ata: foa'i]
ausage@samoanews.com

O le Tina lea o lo o tu’uaia i lona ave fa’agaoi o se vaega tupe tele mai le kamupani a le Forsgrens sa galue ai o ia, sa ia fa’ailoa i le Pule o le Kamupani faapea ai Leoleo Suesue, sa ia fa’aaoga se vaega o lea tupe e totogi ai lana ta’avale, totogi ai pili a le latou aiga faapea ai ma mea faitupe a le lotu, toe fa’atupe ai ma le malaga a le latou aiga sa alu i Ausetalia.

 

O le vaiaso na te’a nei na pu’e fa’apagota ai e Leoleo ia Jennifer Atafu, i lalo o se poloaiga mai le fa’amasinoga, lea na sainia ina ua mafai ona tu’u fa’atasi le ripoti ma le tagi tusitusia a le malo fa’asaga ia te ia.

 

O le aso Faraile o le vaiaso na te’a nei na tula’i ai Atafu i luma o le Fa’amasinoga Fa’aitumalo mo lana ulua’i iloiloga. O le ali’i loia tua ia Marcellus T. Uiagalelei na tula’i mo ia i lana ulua’i iloiloga, ae o le tama’ita’i loia sili liagolago ia Christy Dunn sa tula’i mo le malo.

 

O loo molia e le malo ia Atafu i moliaga mamafa e 2 o le gaoi, atoa ai ma le ave fa’agaoi o tupe sa tu’uina atu i lalo o lana vaavaaiga, o le vaega C lea o solitulafono mamafa, lea e mafai ona faasala ai se tasii le toese mo le umi e le silia i le 7 tausaga, pe faasala fo’i i le salatupe e le silia i le $5,000, poo faasalaga uma ia e lua.

 

E $90,000 le vaega tupe lea ua fa’atulaga e le afioga i le ali’i fa’amasino ia Fiti Sunia e totogi ona fa’atoa mafai lea ona tatala ia Atafu.

 

TAGI A LE MALO

 

I le tagi a le malo o lo o taua ai e fa’apea, i le aso 3 o Setema 2018, na maitauina ai e le Peresetene o le kamupani a le Forsgren’s Ltd, Inc se eseesega mata’utia i le ripoti o tupe a le kamupani o lo i i ai, ma fa’amaumauga o lo o tuuina mai i teugatupe a le Faletupe.

 

I le mataiuina ai e le Peresetene o le Kamupani o lea eseesega tele, sa ia fa’afesootai ai loa Atafu i lona fia malamalamaa i le mafua’aga ua ala ai ona tula’i mai lenei fa’aletonu, peita’i na fa’ailoa i ai e Atafu e faapea, o ni isi o taimi e fa’aletonu ai masini a le Faletupe, atonu o le mafua’aga lena e ala ai ona vaaia eseesega.

 

Na toe faailoa atili i ai e Atafu i le Peresetene o le Kamupani e fa’apea, e ui i tulaga faaletonu i masini a le faletupe, ae i ai lona talitonuga e i ai lava le taimi e mafai ai ona latou galulue e toe fa’asa’o faamaumauga ma toe fa’aleleia lea fa’aletonu. Na faailoa atili fo’i e le ua molia i le Peresetene e fa’apea, o le a ia tuuina atu ia te ia le ripoti sa’o e tusa ai o teugatupe a le kamupani, i le taimi e mae’a ai ona toe fa’aleleia e le faletupe la latou masini.

 

O Atafu e pei ona taua i fa’amaumauga a le fa’amasinoga, sa galue o ia i le aoina mai lea o tupe mai pisinisi eseese o loo i lalo o le pulega a le Forsgren ma teu i le faletupe.

 

I le aso na sosoo ai, na toe talanoa ai Atafu ma le Peresetene e uiga i lenei mataupu, o iina na ia faailoa ai loa lona fa’aaogaina o tupe a le kamupani mo ia lava.

 

I le fa’afofoga ai o le Peresetene i le ta’utinoga a Atafu, sa ia fa’atonuina ai loa le Pule o le Vaega o Tupe a le kamupani ina ia amata se suesuega faalotoifale e uiga i lenei mataupu. Sa fia manino le Peresetene i fa’amaumauga uma e fa’atatau i tupe sa ao ma tupe fo’i sa teu e Atafu i totonu o le faletupe, ina ia mafai ai ona fa’atusatusa faamaumauga nei e lua ma iloa tonu ai loa le aofa’i o le tupe a le kamupani ua leiloa.

 

Na ta’utino fo’i Atafu i le Pule o le Ofisa sa fa’atinoina le suesuega i lona fa’aaogaina lea o tupe a le kamupani mo ia lava. Sa ia fa’atoese fo’i e tusa ai o lona le fa’amaoni i le fa’atinoina o lana galuega.

 

E pei ona taua e Atafu i le Pule o le Kamupani, e tusa ua 3 nei tausaga o fa’aauau pea lona ave faagaoi o tupe a le kamupani. O ni isi o tupe sa ia fa’aaoga e totogi ai lana ta’avale, o isi tupe sa fa’aaoga mo manaoga a lona aiga e aofia ai le latou malaga i Ausetalia, atoa ai ma isi tupe na fa’atupe ai manaoga a le Ekalesia.

 

E pei ona maua i suesuega a le Kamupani, e tele naua se vaega tupe a le kamupani na leiloa mai i le gaioiga a Atafu, peita’i na taua e Atafu i le Pule o le kamupani, e tusa ma le $90,000 le aofa’iga o le tupe sa ia fa’aaogaina.

 

Ae i suesuega a le kamupani na manino mai ai, e tusa ma le $118,910.30 le aofa’i o le tupe ua manino na fa’aaoga e Atafu.

 

I le aso 1 o Oketopa, 2018, na fesiligia ai loa e Leoleo Suesue ia Atafu e tusa ai o lenei mataupu. I lea fa’atalatalanoaga, na ta’utino ai Atafu i lona ave fa’agaoi o se vasega tupe tele mai le kamupani sa galue ai. O ia vaega tupe sa ia aveese mai i tupe e ao mai i isi pisinisi e aofia ai le ofisa autu, o le Koko Bean, Sports Domain, Niuborn ma le Carl’s Jr.

 

Na ta’utino Atafu i Leoleo e fa’apea, o le tausaga e 2015 na amata ai ona ia ave faagaoia tupe a le kamupani. O ni isi o tupe sa ia fa’aaoga e totogi ai isi manaoga a le kamupani, ae o isi tupe sa ia fa’aaogaina mo ia lava. I le aso 20 o Setema 2018, na tusi ai e Atafu se tusi ma ave i le Peresetene o le Kamupani e fa’atatau i lenei mataupu. E le gata sa ia fa’atoese i ai e tusa ai o le mea sese sa ia faia, ae sa ia fa’ailoa fo’i i ai e fa’apea, e tusa ma le $119,000 le aofa’i o le tupe a le kamupani sa ia fa’aaogaina i se auala fa’asolitulafono.