E le i atoa se vaiaso talu ona mae’a le lauina o le fa’asalaga a se ali’i ave pasi, lea ua ta’usala i lona faia o uiga mataga i se teineititi aoga e 16 tausaga le matua, a o lea fo’i ua toe molia e le malo se ali’i ave taxi i lona faia lea o uiga mataga i se teineitiiti aoga e 14 tausaga le matua.

O le vaiaso na te’a nei na pu’e fa’apagota ai e Leoleo le ali’i o Sapena Anesi, ma molia ai loa o ia e le malo i moliaga e 3, lea e aofia ai le moliaga mamafa e tasi o lona tagofia lea o itutinosa o se teneititi e laititi i lalo o le tulafono, atoa ai ma moliaga mama e 2 o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti.

O le aso Tofi o le vaiaso nei ua fa’atulaga e faia ai le ulua’i iloiloga o le mataupu a Anesi i luma o le afioga i le ali’i Fa’amasino ia Elvis P. Patea.

E $10,000 le tupe lea ua fa’atulaga e totogi ona fa’atoa mafai lea ona tatala Anesi i tua mai le toese i Tafuna. E ui na finau malosi Anderson i le fa’amasinoga ina ia fa’aitiitia le tupe e tatala ai Anesi i tua, pe tatala fo’i o ia e aunoa ma se tupe e totogi, ae na lagolagoina e le fa’amasinoga le fa’afinauga a le loia mo le malo, susuga Woodrow Jason Mitchell, ina ia taofia pea o ia i le toese se’i vagana ua totogi le $10,000.

Na taua e Anderson e fa’apea, o le ulua’i taimi lenei ua molia ai e le malo ia Anesi i se solitulafono, e leai fo’i ni solitulafono na ta’usala pe na molia muamua ai o ia i tausaga ua mavae.

Na finau malosi Mitchell ina ia fa’atumau le tupe ua mae’a ona fa’atulaga e le fa’amasinoga e tatala ai i tua Anesi, ona o puipuiga lava mo le saogalemu o fanau teine a le atunu’u. Na taua e Mitchell e fa’apea, e ui o le ulua’i taimi lenei ua tu’uaia ai Anesi i se solitulafono, ae foliga mai i le siosiomaga o le mataupu e pei ona tula’i mai, e fai lava si matuia o gaioiga sa faia e le ua molia.

Na fa’ailoa e le loia a le malo i le fa’amasinoga e faapea, e le tatau ona tatalaina i tua le ua molia e aunoa ma se tupe e totogi, e pei ona finau mai i ai lana loia. Afai fo’i e tatala o ia i tua, e tatau ona mautinoa e le sola ese o ia ma le atunu’u.

TAGI A LE MALO FA’ASAGA IA ANESI

O lenei mataupu na tofu atu i le Ofisa o Leoleo i Tafuna i le taeao o le aso 10 o Setema, 2019, ina ua talosagaina e le Tina o le teineitiiti na a’afia se fesoasoani a Leoleo, fa’asaga i ni uiga mataga sa taumafai le ua molia e faia i lana tama e 14 tausaga le matua.

Na taua e le Tina i Leoleo e fa’apea, e ui latou te le aiga ma Anesi, ae ua pei lava o ia o se totino o le latou aiga, e mafana fo’i le mafutaga a Anesi ma le Tama o le teineitiiti na a’afia.

Na aga’i atu Leoleo i le fale o le aiga na aumai le Tina ma lana tama teine na a’afia, ma aga’i atu loa i le Ofisa o Leoleo mo le fa’atalatalanoaina o lenei mataupu. E le auai le Tama o le tama’ita’i na a’afia i le suesueina o lenei mataupu, ona sa faigaluega o ia i le taeao lea.

Na taua e le teineititi na a’afia i Leoleo e fa’apea, na fa’ateia o ia ao taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o loo fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o loo tootuli i luma o lona ulu ma tago atu i lona tafatafa.

Na musumusu atu le ua molia i le teineititi na a’afia ma fai atu i ai, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma al ese loa.

Na taua atili e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa ma le manatu ina ia fa’amalie ai lagona tu’inanau o le tino.

Na taua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua mae’a, sa ia aga’i atu ai loa i totonu o le latou fale, ae na matua fa’ateia o ia ina ua ia vaaia le ua molia o loo tootuli i luma o le moega a lona tuafafine.

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o loo saili lana CD.

Na taua e le ali’i lea i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu.

O le mae’a ai ona fesiligia e Leoleo o le teineititi na a’afia ma lona Tina, na aga’i atu ai loa e saili le ua molia, ma latou maua atu ai lana pasi o loo tu i le maketi i Fagatogo, ma pu’e fa’apagota mai ai loa o ia.

Ina ua fesiligia e Leoleo ia Anesi e tusa ai o lenei mataupu, sa ia teena malosi ai lona tagofia o itutinosa o le tama’ita’i o lo o tu’uaia na a’afia i lenei mataupu. Na taua e Anesi e fa’apea, na malie le tama’ita’i e alu atu i totonu o lona potu i le po la te talanoa ai, peita’i, ina ua taunuu i totonu o le potu, sa toe liliu ai lona mafaufau ma ia manatu ai, e le tatau ona ia faia ni uiga mataga i lenei tama’ita’i.