Pago Pago - AMERIKA SAMOA

O le aso 13 o Aperila, 2024, na valaau atu ai se mafine i le Ofisa a Leoleo i Tafuna mo se fesoasoani, ona o ni alii se to’atolu o lo’o fasia le to’alua a lona uso, i luma o le latou fale i Nu’uuli.

Sa agai atu leoleo i le nofoaga sa tupu ai le faalavelave ma faasino ifo iai e le mafine na valaau i le Ofisa a Leoleo ia alii e to’atolu o lo’o iai i fafo o le latou fale ma sa lokaina mai ai loa e leoleo ia Isitolo Latu, Junior Natu ma Alton Latusaio.

I le faamatalaga a le mafine na valaau i le ofisa a leoleo, sa amata le faalavelave ina ua ia fai atu ia Latusaio e fa’alelei lo la va ma se tasi o le ulugalii lea na a’afia.  Ae peitai, ina ua manava atu Natu ma Latu mai i galuega, sa fa’alogoina e le mafine na valaau i leoleo, ia se pisa i fafo o le latou fale.  Sa ta’ua e le mafine lenei, na pau lava le tulaga na ia iloa atu, o le totolia o foliga o se tasi o le ulugalii, lea ua a’afia.

Sa faapea foi ona faatalanoaina e leoleo ia le uso o le mafine na valaau i leoleo, ma sa ia faamatalaina i leoleo e faapea, na o la manava mai ma lona toalua, ma o la o atu i lo la fale, ua fa’aleagaina uma mea totino sa i totonu.  

Na valaau loa le uso o le mafine na valaau i leoleo, i se tasi o to’alua a alii e to’atolu ua molia, ma fesili iai pe iai se mea ua le fiafia ai.  Ma tula’i mai ai loa se fevesiaiga i le va o le uso a le mafine na valaau i leoleo, ma se tasi o faletua a i latou e toatolu ua molia.

Ma na faamatala foi e le uso a le mafine na valaau i leoleo, a’o faia se galuega a lona to’alua i fafo o le la fale, ae ona va’ai mai, ua fasi atu Latu ma Latusaio.  Ma sa ia ta’ua foi le u’uina e Latu o se suo, ma sasa ai lima ma vae o lona to’alua, ae o lo’o u’u e Latusaio se samala, o lo’o sasa ai le ulu a lona toalua, ae o le taimi lea o lo’o tatu’i ai e Natu foliga o lona toalua.

Sa ta’ua foi e le uso o le mafine na valaau i leoleo, lona oso mai e fesoasoani i lona toalua, ae togi o ia e Natu i le samala, ma tau i lona papatua.

Na faapea foi ona fa’atalanoaina e leoleo ia le na a’afia i lenei mataupu, ma sa ia ta’ua le fasito’atele o ia e i latou ua molia, ma ona o le pogisa tele, sa ia le iloa ai po o ai na u’uina le samala ae o ai na fa’aaogaina le suo e fasi ai o ia.

Sa faapea loa ona avefaapagotaina uma Latu, Natu ma Latusaio e leoleo ma molia i latou i moliaga e lua;

Faitauga 1:  Faao’olima i lona tulaga e lua – o se vaega ‘D’ o solitulafono mamafa, e mafai ona nofosala ai se tasi i le falepuipui, i le le silia ma le lima (5) tausaga, po o se sala tupe e le silia ma le $500; po o faasalaga uma e lua.

Faitauga 2:  Faatupu Vevesi i nofoaiga faitele – o se vaega ‘B’ o solitulafono mama, e mafai ona nofosala ai se tasi i le le sili atu ma le ono (6) masina, po o se sala tupe e le sili atu ma le $5,000; po o faasalaga uma e lua.

E $500 le vaegatupe faatulagaina mo Latu ma Natu, e mafai ona tatalaina ai i la’ua e faatalitali ai a la faamasinoga, ae $10,000 mo Latusaio.