Ads by Google Ads by Google

Maua fualaau faasaina i le alii na pu’e faapagota i le faia o uiga mataga


[ata: SN]
ausage@samoanews.com

Pago Pago, AMERIKA SAMOA

 

O le masina na te’a nei na pu’e faapagota ai e Leoleo se ali’i talavou mai Tafuna ona o tu’uaiga i lona faia lea o ni uiga mataga i se tamaitai talavou e 16 tausaga le matua. Ae ina ua taofia faapagota e Leoleo le ua molia, na maua ai vaega o fualaau faasaina i le taga o le ofu vae uumi a le alii ua molia sa laei i lea aso.

 

Ina ua fesiligia e Leoleo Suesue le tamaitai na aafia e tusa ai o lenei mataupu, sa ia taua ai e faapea, e silia i le fa’a 10 ona faia e lenei ali’i uiga mataga ia te ia i soo se taimi la te fetaui ma feiloa’i ai i totonu o le 8 masina o le la mafutaga.

 

O le masina na te’a nei na tula’i ai le susuga a Talosaga Logomau i luma o le Faamasinoga Faaitumalo mo lana ulua’i iloiloga.

 

E 2 tagi ua faila e le malo faasaga i le susuga a Logomau.

 

I le tagi muamua, ua tu’uaia ai o ia i le solitulafono o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e oo atu i le $20,000.

 

I le tagi lona lua, ua molia e le malo lenei ali’i i le moliaga e 3 o le faia o uiga mataga faasotoma faapea ai ma le moliaga e tasi o le faiaiga faamalosi ma se tama’ita’i e laititi i lalo o le tulafono, o le vaega B lea o solitulafono mamafa, lea e mafai ona fa’asala ai se tasi i le Toese mai le 5 e oo atu i le 15 tausaga le umi; faapea ai ma le moliaga o le tagofia o itutinosa o se tamaitai laititi, o le vaega D lea o solitulafono mamafa, lea e faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, pe fa’asala fo’i i faasalaga uma ia e lua.

 

E $35,000 le vaega tupe lea ua fa’atulaga e le Fa’amasinoga e totogi ona fa’atoa mafai lea ona tatala i tua mai le Toese i Tafuna le alii ua molia e faatalitali ai taualumaga o lana mataupu.

 

Na talosaga le loia fautua a le ua molia mo se avanoa e faaitiitia ai le tupe e tatala ai i tua le ua molia. Na taua e lana loia e fa’apea, o le tagi faasaga i le alii ua molia ua na o ni tuuaiga lava, faatoa faamaonia lava pe afai e tuuina mai se faaiuga a le Faamasinoga e faamaonia ai. 

 

Na tete’e malosi le loia a le malo ma ia finau i le Fa’amasinoga ina ia faatumau pea le tupe e tatala ai le ua molia i tua, ona o le matuia o lana gaioiga sa faia. Sa taua atili fo’i e le itu a le malo e fa’apea, o le tamaitai na aafia e na o le 15 tausaga, faatusatusa i le alii ua molia e 32 ona tausaga, tusa lea e 17 tausaga e va ai.

 

Na talia e le Fa’amasinoga le faafinauga tete’e a le malo ma faatumau ai loa le tupe e tatala ai i tua le ua molia.

 

Afai ae tatala i tua mai le Toese le ua molia, ua poloaina o ia e le Fa’amasinoga ina ia usitai i tulafono uma a le malo, auai i soo se taimi e valaau ai lana mataupu, ma aua ne’i taumafai e tuua le atunuu pe sola ese fo’i e aunoa ma se faatonuga a le Fa’amasinoga. E le mafai ona ia toe taumafai e faafesootai molimau a le malo i soo se auala, e aofia ai ma le tama’ita’i na a’afia i lenei mataupu.

 

Afai la te fetaui ma le tama’ita’i na aafia poo ni molimau a le malo i soo se vaega o le atunu’u, ia alu ese mai ai ma le filemu.

 

Ua fautuaina fo’i e le Fa’amasinoga le ua molia ina ia aua ne’i ona toe taumafai i se isi auala e aofia ai telefoni poo le Facebook e faafesoota’i le tamaitai na a’afia.

 

TU’UAIGA FAASAGA IA LOGOMAU

 

E pei ona taua e le malo i le latou tagi e fa’apea, o lenei mataupu na tofu atu i le Ofisa o Leoleo i Tafuna, ina ua aga’i atu se Tina ma sana tama teine i le vaveao o le aso 11 o Iulai, 2021 ma faila sa laua tagi faasaga ia i se alii e nofo latalava i le nofoaga o lo o nofo ai le tamaitai na aafia ma lona aiga, i lona faia o uiga mataga i le tama’ita’i na a’afia.

 

O le alii na faia faasaga i ai le tagi o  le susuga lea a Talosaga Logomau, o ia fo’i lea ua molia e le malo i lenei mataupu.

 

O le Tina ma le tamaitai talavou na aga’i i le Ofisa o Leoleo, o le tama’ita’i lea na aafia ma lona Tina.

 

Na taua e le Tina i Leoleo e fa’apea, ua leva ona i ai masalosaloga ia i laua ma lona to’alua e uiga i lenei mataupu peita’i sa taumafai lava e saili ni faamaoniga poo ni auala e mafai ai ona la maua taitaiga talanoaga poo le mafutaga i le va o le alii ua molia nei ma lana tama teine. 

 

O le vaveao o le aso e pei ona taua, aso 10 o Iulai pe tusa o le itula e 3:00 i le vaveao e pei ona taua e le Tina i Leoleo, na logoina ai o ia e lona to’alua, e le moe lana tama teine i le potu, e le o i ai fo’i lana telefoni i luga o le laulau e pei ona masani ona teu ai ae le iloa poo fea o i ai.

 

Na avea le mataala o le Tama o le aiga ma itu na nofo sauni ai loa le ulugalii ma faatalitali i totonu o le fale a o tape moli, i le taimi e fo’i atu ai le la tama teine i le fale. Ae pe tusa o le itula e 4:45 i le vaveao lava lea, na vaaia ai loa e le ulugalii le aga’i atu o le la tama teine i le fale, ma faafuase’i ai loa ona ki e le ulugalii le moli ina ua ulufale le la tama teine i totonu o le fale. 

 

O le mae’a ai ona fesiligia e le ulugalii o le la tama teine i le mea sa i ai i le po atoa, faapea ai ma le mafua’aga na ia tuua ai lo latou aiga ae alu ese ma le fale, na aga’i atu ai loa le Tina faatasi ai ma lana tama teine i le Ofisa o Leoleo i Tafuna mo le failaina o le tagi faasaga i le alii ua molia.

 

Na manino i suesuega a Leoleo, o masaniga i taimi o taaloga soka i afiafi atoa ai ma le mafutaga i totonu o le nu’u i le va o le ua molia ma le tama’ita’i o loo aafia, na atagia mai ai i le aiga o le tama’ita’i na a’afia, o fai si leva o fesootai i laua nei, ma e foliga mai fo’i o loo aafia i laua nei i se mafutaga faaleulugali’i.

 

O le mae’a ai ona fesiligia o le Tama e tusa ai o lenei mataupu, na fesiligia ai loa e Leoleo le tama’ita’i na aafia e uiga i tu’uaiga faasaga i le ali’i ua molia. Na taua e le tama’it’ai na a’afia i Leoleo e fa’apea, o le masina o Setema o le tausaga na te’a nei na amata ai ona la masani ma le ali’i ua molia i se taaloga Soka o loo i ai i le latou nu’u.

 

Na taua e le tama’ita’i na aafia le alu atu o le alii ua molia ma faatalanoa o ia i le taimi muamua lava, ma fesili atu pe mafai ona fai se le mafutaga faale uo. Na amata mai ai lava i le taimi lea ona la masani, ma faaauau ai pea lava ona la fetaui i le taimi o taaloga Soka i le afiafi ma faamasani pea le isi i le tasi.

 

Na aga’i atu le la mafutaga i le fa’aaoga lea o telefoni ma fesootaiga i luga o le Facebook la te talanoa ai i isi taimi e ese mai i taimi o taaloga Soka, seia oo lava ina masani atili le isi i le tasi.

 

Na taua e le tama’ita’i na aafia le masina o Novema o le tausaga na te’a nei na fai atu ai lana uo (le alii ua molia) ia te ia e alu atu i lona fale i le po la te eva ma tafafao ai. Na alu le tamaitai na aafia i le fale o lana uo i le po e pei ona ia talosagaina ma o iina lea na tula’i mai ai loa le ulua’i faalavelave e pei ona faamalosi ai o ia e lana uo tama ua molia nei la te feusua’i ae le’i mana’o i ai.

 

Na taua e le tama’ita’i na aafia e faapea, o le ulua’i taimi lea ua fai ai sana uo tama, ae o le ulua’i taimi fo’i lea ua aafia ai o ia i tulaga tau feusuaiga. Sa lagona le tiga o lona tino peita’i ua leai se mea e mafai ona o lea ua mae’a ona tupu le faalavelave ia te ia. 

 

Ina ua mae’a le faalavelave e pei ona faamalosi ai e le ua molia le tamaitai na aafia, na ia fai ai loa i le tamaitai, afai loa e fasi o ia e ona matua, ona alu atu loa lea la te nonofo, ua ia sauni fo’i e tausi o ia ma atia’e le la aiga fou.

 

Talu mai lava le taimi lea, sa fa’aauau ai pea le mafutaga faaleulugalii i le va o le ali’i ua molia ma le tamaitai na aafia. E pei ona taua e le na aafia, e silia i le fa’a 10 ona la faiaiga ma lana uo tama, ma o nisi taimi, e oo atu lava i le 15 minute le umi e faatino ai e lana uo tama uiga mataga nei ia te ia, ae pe faa 2 i le fa’a 4 i le vaiaso ona la fetaui ma talanoa, ma ua atili ai lava ona mafana le la mafutaga faaleulugali’i.

 

O nisi fo’i o taimi e pei ona taua e le tama’ita’i na aafia, e faatino ai e Asomau isi uiga mataga ia te ia e aunoa ma sona malamalama i ai.

 

O le masina na te’a nei na pu’e faapagota ai e Leoleo le alii ua molia mai lona aiga ma auina atu loa i le Ofisa i Tafuna mo le faatalatalanoaina o lenei mataupu. Ina ua fesiligia e Leoleo le ua molia, sa ia ioeina ai faamatalaga uma e uiga ia te ia ma le tamaitai na aafia, atoa ai ma lona faatoese i Leoleo e tusa ai o lana solitulafono.

 

Na tete’e le ua molia i tu’uaiga e faapea sa ia faamalosia le tamaitai na aafia i le taimi o le ulua’i feusuaiga. O lana faamatalaga i Leoleo, sa malie lava i ai le tamaitai e ui sa ia iloa lelei e laititi le tamaitai i lalo o le tulafono.

 

Sa ia ioeina fo’i lona fa’aaoga o lana telefoni faapea ai ma fesootaiga i luga o le Facebook la te feiloa’i ma talanoa ai ma le tamaitai na aafia, ina ia mafai ai ona maua se avanoa la te talanoa ma faamasani atili ai.

 

Na ioe fo’i le ua molia, o ia na tauanauina le tama’ita’i na aafia e alu atu i lona fale i le po muamua lava na tula’i mai ai le faalavelave, atoa ai ma isi fo’i po seia oo lava i le po lea na maua ai loa e le aiga o le tama’ita’i le alu ese mai o le tama’ita’i mai lo latou fale.

 

Ao lei auina atu le alii ua molia i le Ofisa o Leoleo i Tafuna ma suesuega, na saili e Leoleo lona tino mo ni aupega. I totonu o le taga o lona ofuvae uumi sa laei, na maua ai e Leoleo ni taga pepa iila laiti se 2. O le isi pepa iila na maua ai vaega o le pauta o le aisa ae o le isi pepa na maua ai lau mariuana.