Ads by Google Ads by Google

Lu’itauina fanau talavou a le teritori e amata atu nei ona sauni e tauaveina le tagavai a le atunu’u i ta’aloga faavaomalo i le lumana’i


[ata: foa'i]

Pago Pago - AMERIKA SAMOA

Na aofia potopoto ia ‘au ta’a’alo e tolu ia sa ausia le tulaga muamua i liki o le Sisiga Fu’a 2024, faapea ma alii ma tamaitai, ma a latou faiaoga, mai i asosi eseese, i se faatasiga tele na faia i le Maliu Mai, i le po o le aso Toonai, Aperila 20, 2024, e tapunia aloaia ai Taaloga o le Sisiga Fu’a o lenei tausaga.

O lenei polokalama sa faatulagaina ma tu’ufa’atasia e le Komiti Olimipeka Faavaomalo a Amerika Samoa (ASNOC) ma sa faapea foi ona auai ai ma aiga o alii ma tamaitai ta’a’alo, faiaoga ma taitai o faalapotopotoga o taaloga.

O malo fa’aaloalogia o le afiafi, na aofia ai le Failautusi o le Ofisa o Mataupu tau Samoa, le afioga i le Ma’opu Mauga Tasi Asuega ma le faletua, faapea le sui Peresetene o le Maota o le Senate, le afioga Senatoa Magalei Logovii, o taitai sinia o le malo, o taitai sinia o asosi o ta’aloga faapea le sui o le ORADO (Oceania Regional Anti-Doping Organization), le susuga ia Quintyn Stephan.

E pei ona sa fa’asoa mai le Failautusi a le ASNOC, le susuga ia Vaiala Ethan Lake, o se avanoa taua lenei ua mafai ona potopoto ai asosi o fa’agatama eseese, i lalo o se nofoaga e tasi, ina mafai ona aloaia i latou e tusa ai ma a latou toleniga ma tapenapenaga aua liki o le Sisiga Fu’a na alo atu iai, e aofia ai asosi o Afeleti (athletics), netipolo, volipolo ma lakapi.  Sa le i mafai ona auai asosi Si’isi’i U’amea Mamafa ma Tino Mamaso (bodybuilding).

Sa aloaia ai foi i lea afiafi ia le Asosi Tenisi Talavou a Amerika Samoa, lea na faato’a taliu mai ma taamilosaga tenisi i Tahiti.

O le susuga i Faafeagaiga ia Fulifuli Taveuveu na fofogaina talosaga o le faamoemoe, ma ina ua mae’a le tatalo amata, sa faapea ona alo atu le susuga i le Peresetene o le ASNOC, le susuga ia Tuiatua Ed Imo, mo lana saunoaga faafeiloai. 

Sa ia faamamafaina ai le taua o le tu’uto o tagata ta’a’alo i a latou tapenapenaga mo isi ta’amilosaga o lo’o i luma atu, lea o le a auai atu ai le teritori, e pei o Taaloga o le Pasefika lea ua faatulagaina mo Palau, i le tausaga fou.

Sa faapea ona saunoa le susuga ia Quentin Stephan mai i le faalapotopotoga a le ORADO, mai Fiti ma sa ia faamaninoina le latou matafaioi, lea e mataituina ai ma le taofia o le fa’aaogaina o fualaau faasaina, i totonu o ta’aloga.

Sa saunoa Stephan, o fa’agatama, o se vaega taua lea i le atina’eina o motu o le Pasefika ma e faamanuiaina nei taumafaiga, pe afai e le a’afia ai ma fualaau faasaina, aua o le agaga o le ta’alo lelei faapea le fa’aaloalo mo tagata ta’a’alo uma, e aofia i lea taumafaiga.

Na fa’aalia foi e Stephan, e mafai e Amerika Samoa ona avea ma se tasi o malo sili i totonu o ta’aloga Olimipeka, pe afai e fa’aauau pea ona u’umau i le agaga o le ta’alo lelei ma le fa’aaloalo.

Na ta’ua foi e Stephan e faapea, o lo latou auai mai, e mo le puipuiga ma le tautuaina o tagata ta’a’alo uma o Amerika Samoa, ma ia faamautuina ni ta’aloga mama, fea ma le saogalemu.

I le tautalaga a le Failautusi a le ASNOC, le susuga Vaiala, sa ia toe faaleoina ai le taua o le tapenapena vave, e pei ona sa saunoa ai le Peresetene o le ASNOC.  Sa ia faamanatuina atu ia i latou na aofia potopoto i lea afiafi, ia Taaloga Olimipeka a le Autalavou lea foi e faia i le tausaga 2026 i Dakar, Senegal.

Sa ta’ua e Vaiala le agavaa o Amerika Samoa e tauva i ta’aloga ia, talu mai le 2010 ma o le toe faia lenei o nei ta’aloga talu ona taofia mai i le 2022, ona o tapu o le Koviti-19.

Sa ia u’una’ia fanau talavou ina ia faatuina loa ni a latou sini i le taimi nei mo le amataina o a latou tapenapenaga, ma ia aua nei faatagaina ni tulaga e avea ma puniala pe tosina ai i latou mai i le ausia o a latou sini faatuina.

Sa fa’aalia foi e Vaiala le tatau loa i faiaoga ona amtaina toleniga aua le sauni atu mo Taaloga o le Pasefika i Tahiti i le 2027.  E soso’o mai ai ma Olimipeka o le Tau Mafanafana (Sumemr) i Los Angeles, i le 2028.  Ma na ta’ua e Vaiala, o alii ma tamaitai ta’a’alo lea ua atoa le ta’i 16 o tausaga, o le a maua se avanoa e mafai ai ona auai i ia ta’aloga, pe afai e fa’amaoni i a latou toleniga ma ‘ai mea’ai e maua ai le soifua maloloina.

Na faamamafaina e le alii Failautusi ia le taua tele o le fa’amaa’i o taleni a fanau talavou, aua o i latou ia o le a tauaveina le tagavai a Amerika Samoa i ta’aloga fa’avaomalo i le lumanai, e pei o Ta’aloga o le Pasefika o le 2029, lea o lo’o tausinio ai nei Amerika Samoa ina ia talimalo ai.

O isi motu o lo’o tausinio foi mo le avanoa e talimalo ai, o le atu Kuki ma le atu Solomona, ae ona o lea ua mae’a ona talimalo ia le atu Solomona i ta’aloga o le tausaga ua tuanai, ua toe ai nei na’o le atu Kuki e tauva ma le teritori.

Na fa’aalia e le susuga i le alii failautusi, le maua mai o le faaiuga ia Setema.  Sa talimalo foi Amerika Samoa i Taaloga o le Pasefika, i le 1997 ae o le atu Kuki, na talimalo i le 1985.

Na saunoa foi Vaiala, i lona vaaia o le tele o alii ma tamaitai ta’a’alo talavou, e ui ina e le o ausia e i latou tausaga faatulagaina mo le Olimipeka o lenei tausaga, ae i le fa tausaga o i luma o le a mafai ona tauva i le Olimipeka o le 2028 i L.A, ma leisi fa tausaga, e mafai ona ta’a’alo i le Olimipeka o le 2032, i Ausetalia.

Na ta’ua e le alii Failautusi i fanau ta’a’alo talavou e faapea, e mafai e i latou uma ona avea ma sui o Amerika Samoa i le Olimipeka 2032 i Ausetalia, ae e tatau ona o latou galulue punoua’i mo lea avanoa, e amata atu i le taimi nei.