Pago Pago - AMERIKA SAMOA

Ua lokaina nei le susuga ia Junior Falefata mai i le afioaga o Vailoa ina ua masalomia i lona faaoolima i lana teine i totonu o se falesa ma le togiina o lona tua’a i se ma’a.  Ua molia ai nei Falefata i le faatupu vevesi, o le faaoolima i lona tulaga e tolu i faalavelave na tupu i le aso 29 o Oketopa, 2023 ia ma le faaoolima i lona tuaa i le aso 29 o Oketopa, 2023.

E $1,000 le tinoitupe ua fa’atonuina e tatau ona totogi e mafai ai ona tatala le ua molia mai i le falepuipui.

O lenei faalavelave na tulai mai i le aso 29 o Oketopa, 2023 i le 1 i le aoauli ina ua valaau le susuga ia Siataga Falefata, le tua’a o Junior ma lipotia i leoleo lona faaoolima i lana teine a’o latou iai i le falesa.  Na agai atu ai loa leoleo i le fale o le aiga o Falefata, lea na talanoa ai ma le teine a le ua molia.  Sa faamatala e le uo teine e faapea, a’o latou i totonu o le falesa, na tu’i ai e le ua molia, ia lona ulu ma sulu atu ai i le tina a le ua molia, lea na saofai i ona autafa.  

Sa ta’ua e le uo teine le tuuaia o ia e le ua molia, i lona tilotilo i isi tamaloloa i totonu o le falesa.  Ae ina ua tete’e e le uo teine i le faamatalaga a le ua molia, na palauvale ane iai le ua molia ma faapea atu e aua le pepelo.  Ona tulai lea i luga ma savali i fafo mai i le falesa.

Sa faamatala e le uo teine lona u’uina mai o le lima a lana tama teine e ono tausaga ma la o atu i fafo, ae mulimuli atu ai le tua’a o le ua molia ma fesili i lona atalii po o le a le me aua tupu, ae tago ai le ua molia i le u’u mai se ma’a ma togi ai lona tua’a.

Sa faamatala foi e le uo teine i l eoleo, o le aso 28 o Oketopa, 2023, a’o la iai ma le ua molia i totonu o le la poto, na tu’uaia ai o ia e le ua molia, i le fai o seisi ana uo tama ma fasi ai o ia.  Sa faamatala e le uo teine a Falefata, na amata sauaina mai lava o ia e le ua molia, mai i le tausaga e 2022 ma ua ia toe salamo i lona fa’auo atu iai.

Ina ua fa’atalanoa e leoleo ia le tua’a o le ua molia, sa ia ta’ua ai e faapea, e na te le iloa lelei le mea na tupu, ae sa ia faalogoina le e’e o se tagata ma ia iloa mai o lona atalii.  Ae ina ua ia fesiligia lona atalii i le mea o lo o tupe, ae tago lona atalii (le ua molia) i le togi o ia i le ma’a, ae na misi o ia, ae tau le ma’a i lana taavale.  Ae e leai se vaega o le taavale o leaga.

Sa faatalanoaina foi e leoleo le tina o le ua molia ma sa ia faamaonia faamatalaga a le uo teine a lana tama, ma ia faapea atu i leoleo, o lana tama o se tagata fua tele ma e le o se taimi muamua lenei ua faia ai se mea faapea i lana uo teine.

Sa faamatala foi e matua o le ua molia, i leoleo, o le a logoina atu le ofisa o leoleo, pe a toe fo’i ifo le ua molia, i le fale.  Ae na ave e leoleo ia le uo teine ma si ona alo e 6 tausaga i le vaega a le Social Service, ma aveina atu ai i la’ua i le nofoaiga o sulufaiga.

I le aso 30 o Oketopa, 2023, na o’o atu ai Falefata ma lona tina i le ofisa a leoleo ma fa’ailoa atu e le tina i leoleo, sa valaau atu se tasi mai i le ofisa a le Social Services, ua toe fia fo’i atu le uo teine i le latou aiga, ae peitai, e na o le pau le auala e mafai ai ona toe fo’i mai i la’ua i lo la aiga, o le ave’ese o Falefata mai i le fale.

Sa saunoa le tina, e ui i le faigata o lenei mea, ae ua alagatatau ona tu’u atu lona alo i a’ao o le malo, ina ia mafai ona toe fo’i mai le uo teine ma si ona alo latou te nonofo, ma ia avea ma se aoaoga i le ua molia, ma atonu o le taofia ai lona sauaina o lana uo teine.

Sa ta’ua e le ua molia i leoleo lona fua i le tilotilo o lana uo teine i tamaloloa i totonu o le falesa ma o lea na ia tu’iina ai o ia ma sa ia faapea atu i leoleo, ua ia salamo i lana mea sa fai ma o le a le toe faia.

Sa iai seisi molimau na iai i totonu o le falesa i le taimi na tutpu ai nei mea uma ma sa mafai ona ia faamaonia le faamatalaga a le uo teine.

O le alii o Falefata o se tagatanu’u o Amerika Samoa ma e 18 tausaga o lona soifua.

O lo o lokaina nei o ia i le falepuipui e faatali ai le taimi o lona faamasinoga.