Pago Pago - AMERIKA SAMOA

O le taeao o le aso 4 o Aperila, na fa’afeso’ota’i ai e se fafine ia le Ofisa Leoleo i Tafuna, mo se fesoasoani, ona o se alii 50 tausaga, o lo’o faatupu vevesi i Amanave.

(O le a le lomia suafa o i latou ua a’afia i lenei mataupu ona o le puipuiga o fanau talavou)

E tusa ai ma fa’amaumauga a le malo, o lo’o ua molia lenei alii ona o le palauvale i se alii talavou e 14 tausaga faapea ma lona togiina o le vae o le alii talavou, i se ma’a.

O moliaga o le ua molia, e aofia ai;

Faitauga 1:  Fa’ao’olima i lona tulaga e lua – o se vaega ‘D’ o solitulafono mamafa, e mafai ona nofosala ai se tasi i le falepuipui, i le le sili atu ma le lima (5) tausaga, po o se sala tupe e le silia ma le $5,000; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai se tasi i le falepuipui i le le sili atu ma masina e 12, po o se sala tupe e le silia ma le $1,000; po o fa’asalaga uma e lua.

Faitauga 3:  Faatupu Vevesi i Nofoaga Faitele – o se vaega ‘B’ o solitulafono mama, e mafai ona nofosala ai se tasi i le falepuipui, e le silia ma le ono (6) masina, po o se sala tupe e le silia ma le $500; po o faasalaga uma e lua.

Faitauga 4:  Faia o se tulaga e ono a’afia ai le saogalemu o se tamaititi/teineititi – o se vaga ‘A’ o solitulafono mama, e mafai ona faafalepuipui ai se tasi i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

I le taunu’u atu o leoleo i le nofoaga na tupu ai le faalavelave, sa faamatalaina ifo iai e le tina na valaau mai i le ofisa a leoleo, le nofonofo o nai ona alo e to’atolu, (17, 15 ma le 14 tausaga le matutua o nei alii), i luma o le latou faletalimalo, o lo’o fai ai ni a latou meaa’oga.  Ae fa’afuase’i ona valaau mai le ua molia, i lona alo e 14 tausaga, e alu atu i fafo.

O iina na lagona mai ai e le tina ia le tali atu o lona alo i le ua molia, e tusa ai ma le ‘niece’ a le ua molia, e faapea, e na te le’i talanoa lava i le ‘niece’ a le ua molia, talu ona alu ‘ese le ‘niece’ mai i le faleoloa.

Ae peitai, na tu’uaia e le ua molia ia le alii 14 tausaga, i le pepelo ma le fia fa’alogo i le faamatalaga a le alii 14 tausaga.  Ae ua fa’aauau ona palauvale le ua molia i le alii 14 tausaga.

Ina ua savali mai le tina i le nofoaga o tutu atu ai lona alo ma le ua molia, sa ia va’aia le tu’iina fa’alua e le ua molia ia lona alo, i le itu agavale o ona foliga.  E taunu’u atu le tina, ua savali ese le ua molia.

Sa faamatala foi e le tina le tamomo’e atu o lana fanau tama (17 ma le 15 tausaga), aga’i i le ua molia, ae peitai, sa u’u mai e le ua molia ia se ma’a ma togi mai ai la’ua, ae na tau le ma’a i le tuli a lona alo 14 tausaga.  Ma o iina na ia vala’auina ai loa leoleo mo se fesoasoani.

Na faamatala e le na a’afia i leoleo (14 tausaga), e faapea, a’o latou fai meaaoga ma ona uso i le latou faletalimao, sa valaau mai le ua molia e alu atu e la te talanoa, ae peitai, e taunu’u atu, ae tago le ua molia, i le tu’i o ia ma tau i lona taliga tauagavale.  Sa faamatala foi e le alii 14 tausaga, le toe tu’i mai o ia e le ua molia, ma tau i lona mata tauagavale ma ia pa’u ai i lalo.

Sa ta’ua e le alii 14 tausaga le tamomo’e atu o ona uso matutua ae liliu le ua molia ma u’u mai le ma’a ma togi mai ai latou.

Na aga’i atu loa leoleo e su’e le ua molia ma mauaina atu o ia i lona fale ma lokaina mai loa o ia ma aveina atu i le ofisa a leoleo i Tafuna mo le fa’aauauina o suesuega.

A’o iai le ua molia i le ofisa a leoleo, na lagonaina e leoleo ia le malosi o le manogi pia o lenei alii, faatasi ai ma le mumu o ona mata ma le tosotoso loloa o lana tausaga.

E $8,000 le vaegatupe faatulagaina sa mafai ona tatalaina ai lenei alii mai i le falepuipui, e faatali ai lona faamasinoga.