Tala I Vaifanua
VAIASO O FOLIGA ESEESE & HALLOWEEN TAMA MA TINA MATUTUA
Na amata mai i le aso Gafua o le vaiaso nei na la’eia e tagata matutua la’ei ma teuga mai atunuu eseese ma so’o se isi lava sikaili ua mafai ona e fiafia e la’eia. O se taumafaiga ina ia o’o ane i le teao ananafi, ua toe lava o tagata ma agaga leaga ua tatau ona e fa’afoliga i ai. Le aso ua fa’apea ona manatu le to’atele, o aitu ma fa’ataulaitu e feoa’i solo ai i le laueleele, po’o le aso o le Halloween.
Peita’i e le o se lagona lea sa afua ai ona manatu le afioga le Faipule o Amerika Samoa i le Konekeresi, Aumua Amata na faia se foa’i taua mo matua uma lava o lo’o galulue ma o lo’o aofia i le tatou Matagaluega mo Tama ma Tina Matutua o le atunu’u i Pago Pago.
O le taeao o le aso Lua na faia ai le foa’i a Aumua i le TAOA, o pusa sukaleti ma isi ituaiga mea taumafai suamalie.
I le tama’ita’i fa’atonu o le TAOA, Evelyn Lili’o Satele, ua ia fa’ailoa mai ai lona agaga fa’afetai, mo le foa’i taua. “A tuu i se isi itu, o se foa’i e sili ona aoga mo matua matutua lenei foa’i nai lo le vasega o fanau iti. Aua e tatau lava na fealua’i se matua ma sina meataumafa suamalie i lana ato po’o lana taga, e toe fa’ate’i ai le suka.”
O le aso ananafi na matua fa’ateleina ai le lole i lalo o le faleie a le tama’ita’i Faipule i le lotoa a le Tedi o Samoa i Fagatogo, na tufatufa atu ai lole o so’o se ituaiga mo le fanauiti.
PULE SILI O LE MEATOSO VA’A - VA’AIA E LIU SIAKISONE I LE TAIMI NEI
E o’o mai lava i le aso Lua o le vaiaso nei, ua le mautinoa po’o le a tonu le i’uga, pe toe faigaluega le ali’i pule sili o le Meatoso Ma’a, Moefa’auo Bill Emmsley.
Ua va’aia nei e le ali’i Taitaifono o le Meatoso Vaa, Fepulea’i Liu Siakisone lea vaega tele o le Malo mo se taimi le tumau. Na tu’ua le galuega e Moefa’auo i le aso Faraile ua te’a, ma ua le toe fo’i ane i lana galuega.
O se tasi o vaega e matua tele fo’i tupe maua a le Malo e maua ai, pe a mafai ona tatala e tautuaina le vasega o va’a femalaga’i i le vasa pe a manaomia ni galuega toe lipea i o latou tino ma totoga.
Ua le gata la ina le mautinoa se faaiuga i le galuega ale ali’i pule sili, ae ua fememea’i fo’i lagona o le aufaigaluega, aua e le o i ai lava se fa’ailo mo i latou, i se mea o le a aga atu i ai lea tofiga maualuga i le latou itu o le tautua a le malo.